1. O le ā o loo fai mai ai se agelu, ma o le ā le aafiaga iā i tatou?

 PE A talanoa atu se agelu iā te oe, pe e te faalogo i ai? I aso nei, o loo talanoa mai se agelu “i atunuu uma, ma ituaiga uma, ma gagana uma, ma tagata uma.” O le ā o loo fai mai ai? “Ia matataʻu i le Atua ma ia faamamaluina o ia . . . Ia tapuaʻi i Lē na faia le lagi, ma le lalolagi.” (Faaa. 14:​6, 7) E na o Ieova le Atua moni e toʻatasi e tatau ona tapuaʻi i ai tagata uma. Maʻeu lo tatou lotofaafetai ona ua ia tuuina mai se faaeaga tautele, o le tapuaʻi atu iā te ia i lona malumalu sili faaleagaga!

2. O le ā le malumalu sili faaleagaga o Ieova? (Tagaʻi foʻi i le pusa “ O Vala e Lē o Faasino Atu i ai le Malumalu Faaleagaga.”)

² O le ā tonu lava le malumalu sili faaleagaga, ma o fea e tatou te maua ai faamatalaga e faatatau i lenā malumalu? O le malumalu sili faaleagaga o se malumalu faafaatusa. E faasino atu i le faatulagaga a Ieova mo le ofoina atu o le tapuaʻiga e na te taliaina, e faavae i le taulaga togiola a Iesu. Na faamatalaina e le aposetolo o Paulo lenei faatulagaga i lana tusi i Kerisiano Eperu i le uluaʻi senituri na nonofo i Iutaia. b

3-4. O ā popolega na iai iā Paulo e faatatau i Kerisiano Eperu na nonofo i Iutaia, ma na faapefea ona ia fesoasoani iā i latou?

³ Aiseā na tusi atu ai Paulo i Kerisiano Eperu na nonofo i Iutaia? E foliga mai e lua ni māfuaaga autū. Muamua, ina ia faalaeiauina i latou. O le toʻatele o nei Kerisiano na ola aʻe i le lotu Iutaia. Atonu na tauemua i latou e taʻitaʻi lotu ona o le  avea ma Kerisiano. Aiseā? Talu ai e leʻi iai se malumalu matagofie mo Kerisiano e tapuaʻi ai, leai se fata faitaulaga e ofo atu ai taulaga i le Atua, ma e leʻi iai foʻi ni ositaulaga e auauna mo i latou. O na mea na ono lotovaivai ai soo o Keriso ma faavaivaia ai lo latou faatuatua. (Epe. 2:1; 3:​12, 14) Atonu na faaosoosoina nisi o i latou e toe foʻi i le lotu Iutaia.

⁴ Lua, na faapea atu Paulo i Kerisiano Eperu e latou te leʻi faia ni taumafaiga e malamalama ai i aʻoaʻoga fou po o aʻoaʻoga loloto faaleagaga, o “meaʻai aano” ia o loo iai i le Afioga a le Atua. (Epe. 5:​11-14) Na iai lava nisi o i latou na tausia pea le Tulafono a Mose. Ae na faamatalaina e Paulo, e lē mafai e taulaga na manaʻomia i le Tulafono ona aveesea atoatoa ai agasala. O le māfuaaga lenā na “faalēaogāina” ai le Tulafono. O lea na aʻoaʻo atu ai e Paulo nisi o upu moni loloto. Na ia faamanatu atu i ona uso Kerisiano “le faamoemoe e sili atu ona lelei” e faavae i le taulaga a Iesu, lea e mafai ona fesoasoani iā i latou e “faalatalata atu ai i le Atua.”—Epe. 7:​18, 19.

5. O le ā e manaʻomia ona tatou malamalama ai mai i le tusi o Eperu, ma aiseā?

⁵ Na faamatala e Paulo i ona uso Kerisiano Eperu, le māfuaaga ua sili atu ai le auala o loo latou tapuaʻi ai i le taimi lenei, nai lo o le auala na latou tapuaʻi ai i le taimi ua teʻa. O le auala na tapuaʻi ai tagata Iutaia, ua na o se “ata o mea o loo i le lumanaʻi, a o le mea moni ua i le Keriso lea.” (Kolo. 2:17) O le ata lafoia o se mea, ua na ona faaata mai ai o lenā mea ae e lē o le mea moni lenā. I se tulaga talitutusa, na pei le auala na tapuaʻi ai tagata Iutaia i le taimi ua teʻa o se ata lafoia, auā mulimuli ane, o le a iai se isi auala e sili atu e tapuaʻi ai. E manaʻomia ona tatou malamalama i le faatulagaga ua saunia e Ieova mo i tatou, ina ia faamagalo ai a tatou agasala ma tapuaʻi atu iā te ia i le auala e na te taliaina. Seʻi o tatou faatusatusa le “ata” (le auala na tapuaʻi ai tagata Iutaia) ma “le mea moni” (le auala e tapuaʻi ai Kerisiano), e pei ona faamatalaina i le tusi o Eperu. O le faia faapea, o le a tatou malamalama lelei ai i le malumalu faaleagaga ma lona aafiaga iā i tatou.

6. O le ā le auala na faaaogā ai le faleʻie paia?

⁶ Le auala na tapuaʻi ai tagata Iutaia. Na faavae le faamatalaga a Paulo i le faleʻie paia lea na faatūina e Mose i le 1512 T.L.M. (Tagaʻi  i le siata “Le Auala na Tapuaʻi ai Tagata Iutaia—Le Auala e Tapuaʻi ai Kerisiano.”) O le faleʻie paia, e mafai ona feaveaʻi e tagata Isaraelu a o latou siitia mai i lea nofoaga i lea nofoaga. E toetoe 500 tausaga o latou faaaogāina lenā faleʻie paia, seʻia oo i le taimi na fausia ai le malumalu i Ierusalema. (Eso. 25:​8, 9; Nu. 9:22) O lenā “faleʻie o le feiloaʻiga,” na avea ma nofoaga autū e tapuaʻi atu ai tagata Isaraelu i le Atua ma ofoina atu ai a latou taulaga. (Eso. 29:​43-46) Na faaata mai foʻi e lenā faleʻie paia se mea e sili atu mo Kerisiano.

7. O anafea na amata ai ona iai le malumalu faaleagaga?

⁷ Le auala e tapuaʻi ai Kerisiano. Na avea le faleʻie paia o se “ata o mea o i le lagi,” ma na faaata mai ai le malumalu sili faaleagaga o Ieova. Na taʻua e Paulo “o lenei faleʻie [po o le faleʻie paia] o le faatusa lea mo le taimi nei.” (Epe. 8:5; 9:9) O lea, e oo ane i le taimi na tusi atu ai Paulo i Kerisiano Eperu, ua iai le malumalu faaleagaga. Na faatoʻā iai lenā malumalu faaleagaga i le 29 T.A. O le tausaga foʻi lenā na papatiso ai Iesu ma faauuina i le agaga paia, ma amata ona auauna o le “ositaulaga sili” a Ieova i le malumalu faaleagaga. c—Epe. 4:14; Galu. 10:​37, 38.

8-9. E tusa ai ma le Eperu 7:​23-27, o le ā le eseesega ua matilatila mai e faatatau i ositaulaga sili i Isaraelu ma le Ositaulaga Sili o Iesu Keriso?

⁸ Le auala na tapuaʻi ai tagata Iutaia. E na o le ositaulaga sili lava e fai ma sui o tagata i luma o le Atua. O Arona le ositaulaga sili muamua i Isaraelu na tofia e Ieova ina ua tuuina atu le faleʻie paia. Peitaʻi, e pei ona faamatalaina e Paulo, ʻe toʻatele ē na faasolosolo ane e avea o ni ositaulaga, ae na lē mafai ona faaauauina ona o le oti.’ d (Faitau le Eperu 7:​23-27.) Talu ai e lē lelei atoatoa na ositaulaga sili, na tatau ona latou ofoina atu taulaga mo a latou lava agasala. Ua matilatila mai i inei le eseesega o ositaulaga sili i Isaraelu ma le Ositaulaga Sili o Iesu Keriso.

⁹ Le auala e tapuaʻi ai Kerisiano. O lo tatou Ositaulaga Sili o Iesu Keriso “o se auauna o le . . . faleʻie moni, lea na faatūina e Ieova ae e lē o tagata.” (Epe. 8:​1, 2) Na taʻua e Paulo “ona e soifua pea [Iesu] e faavavau, e leai la nisi e sosoo ane iā te ia i lana faiva o le ositaulaga.” Na ia toe faapea mai “e lē taʻuleagaina [Iesu], e vavaeese mai i ē e agasala,” ma “e lē manaʻomia ona ia faia ni taulaga i aso taʻitasi” mo ana lava agasala, e pei ona sa faia e ositaulaga sili o Isaraelu. O lea, seʻi o tatou iloilo le eseesega o fata faitaulaga ma taulaga na faaaogā mo tapuaʻiga a tagata Iutaia, ma le auala e tapuaʻi ai Kerisiano.

10. O le ā e faaata mai e taulaga na faia i le fata faitaulaga ʻapamemea?

¹⁰ Le auala na tapuaʻi ai tagata Iutaia. Sa iai i fafo o le faitotoʻa o le faleʻie paia le fata faitaulaga e faia i le ʻapamemea, lea na ofoina atu ai taulaga iā Ieova e faaaogā ai manu. (Eso. 27:​1, 2; 40:29) Peitaʻi, e leʻi mafai e na taulaga ona faamagaloina atoatoa ai agasala a tagata. (Epe. 10:​1-4) O le faaauau ona faaaogā o manu e faia ai taulaga i le faleʻie paia, na faaata mai ai le taulaga e faatasi ona faia e faamagalo atoatoa ai agasala a tagata.

11. O le ā le fata faitaulaga na ofoina atu ai e Iesu o ia lava? (Eperu 10:​5-7, 10)

¹¹ Le auala e tapuaʻi ai Kerisiano. Na silafia e Iesu na auina mai o ia e Ieova i le lalolagi,  ina ia ofoina lona ola o se taulaga togiola mo tagata. (Mata. 20:28) O lea i lona papatisoga, na ia ofoina atu ai o ia lava e faia le finagalo o Ieova. (Ioa. 6:38; Kala. 1:4) Na ofoina atu e Iesu o ia lava i luga o se fata faitaulaga faafaatusa, lea e faaata mai ai le “finagalo” o le Atua mo lona Alo e faataulaga lona ola lelei atoatoa. “E na o le faatasi lava ona” ofoina atu e Iesu lona ola, e togiolaina pe ufiufi ai agasala a tagata uma e faaalia le faatuatua iā te ia. (Faitau le Eperu 10:​5-7, 10.) Seʻi o tatou iloiloina le tāua o vaega eseese o le faleʻie paia.

12. O ai e mafai ona ulu atu i totonu o potu o le faleʻie paia?

¹² Le auala na tapuaʻi ai tagata Iutaia. E talitutusa lava totonu o le faleʻie paia ma malumalu na mulimuli ane fausia i Ierusalema. E iai i totonu ni potu se lua: o “le Mea Paia” ma “le Mea e Sili Ona Paia” ma e vavae i le ʻie puipui e iai teuteu o ata o kerupi. (Epe. 9:​2-5; Eso. 26:​31-33) E iai i le Mea Paia se tuugāmolī e faia i le auro, se fata faitaulaga e faamū ai mea manogi, ma le laulau e laulauina ai le falaoa. E na o “ositaulaga faauuina” e faatagaina i totonu o le Mea Paia e faatino o latou tiute paia. (Nu. 3:​3, 7, 10) E iai i le Mea e Sili Ona Paia le atolaau o le feagaiga e faia i le auro, lea e faaata ai le faatasi mai o Ieova. (Eso. 25:​21, 22) E na o le ositaulaga sili e faataga ona alu atu i le isi itu o le ʻie puipui i le Mea e Sili Ona Paia i le Aso o le Togisala, lea e faia i tausaga taʻitasi. (Levi. 16:​2, 17) I tausaga taʻitasi, e ulu atu ai o ia ma le toto o manu e faia ai le togisala mo ana lava agasala  ma agasala a le nuu atoa. O lea e ala i lona agaga paia, na faamanino mai ai e Ieova le tāua o mea na iai i totonu o le faleʻie paia.—Epe. 9:​6-8. e

13. I le auala e tapuaʻi ai Kerisiano, o le ā ua faaata mai e le Mea Paia ma le Mea e Sili Ona Paia?

¹³ Le auala e tapuaʻi ai Kerisiano. E faatapulaa le aofaʻi o soo o Keriso ua faauuina i le agaga paia, ma e iai sa latou faiā faapitoa ma Ieova. E 144,000 lo latou aofaʻi ma o le a auauna o ni ositaulaga faatasi ma Iesu i le lagi. (Faaa. 1:6; 14:1) Ua faaata mai e le Mea Paia le vaetamaina o i latou e avea o ni atalii faaleagaga o le Atua a o iai i le lalolagi. (Roma 8:​15-17) Ua faaata mai e le Mea e Sili Ona Paia le lagi lea o loo afio ai Ieova. Ua faaata mai e “le ʻie puipui” lea e vavae ai le Mea Paia ma le Mea e Sili Ona Paia, le tino faaletino o Iesu lea e leʻi mafai ai ona ia ulu atu i le lagi o le Ositaulaga Sili o le malumalu faaleagaga. O le ofoina atu o lona tino faaletino e fai ma taulaga mo tagata, ua ia tatalaina ai le avanoa mo Kerisiano faauuina uma e ola ai i le lagi. O lea, e lē mafai ona maua e Kerisiano faauuina lo latou taui faalelagi a o iai pea i o latou tino faaletino. (Epe. 10:​19, 20; 1 Kori. 15:50) Ina ua faatūina Iesu, na ia ulu atu ai i le Mea e Sili Ona Paia o le malumalu faaleagaga, lea e mulimuli ane aufaatasi atu ai ma le ʻaufaauuina uma.

14. E tusa ai ma le Eperu 9:​12, 24-26, aiseā e sili atu ai le faatulagaga a Ieova mo le tapuaʻiga i lona malumalu faaleagaga?

¹⁴ Ua tatou manino mai i inei, e sili atu le faatulagaga a Ieova mo le tapuaʻiga mamā e faavae i le taulaga togiola ma le faiva faaositaulaga a Iesu Keriso. Na ulu atu le ositaulaga sili o Isaraelu i le Mea e Sili Ona Paia na faia i lima o tagata ma le toto o manu na faaaogā i taulaga, ae na ulu atu Iesu i “le lagi lava” o le nofoaga e sili ona paia, ina ia tulaʻi ai i luma o Ieova. O i inā na ia ofoina atu ai le tāua o lona ola lelei atoatoa o se tagata mo lo tatou lelei, “ina ia aveesea agasala e ala i le faataulagaina o ia lava.” (Faitau le Eperu 9:​12, 24-26.) O le taulaga na faia e Iesu, o le taulaga sili lea e aveesea atoatoa ai a tatou agasala. O le a talanoaina i palakalafa e sosoo mai, e mafai e i tatou uma ona tapuaʻi iā Ieova i lona malumalu faaleagaga, e tusa pe e tatou te faamoemoe e ola i le lagi po o le lalolagi.

15. O ai na auauna i le lotoā o le faleʻie paia?

¹⁵ Le auala na tapuaʻi ai tagata Iutaia. E faatino e ositaulaga o latou tiute i le lotoā o le faleʻie paia lea e siʻo e se pā. Na iai foʻi i totonu o lenā lotoā le fata faitaulaga telē ʻapamemea e fai ai taulaga mū, faatasi ai ma se faatanoa vai e faia i le ʻapamemea e fufulu ai lima ma vae o ositaulaga, a o leʻi faia la latou auaunaga paia. (Eso. 30:​17-20; 40:​6-8) Peitaʻi na iai i malumalu na fausia mulimuli ane, lotoā pito i fafo lea na mafai ona tutū ma tapuaʻi ai i le Atua i latou e lē o ni ositaulaga.

16. O ai e auauna i lotoā o le malumalu faaleagaga?

¹⁶ Le auala e tapuaʻi ai Kerisiano. A o leʻi maua e le vaega totoe o le ʻaufaauuina lo latou taui faalelagi e auauna o ni ositaulaga faatasi ma Iesu, e latou te auauna ma le faamaoni i le vaega faalelalolagi o le lotoā pito i totonu o le malumalu faaleagaga. O le iai o le faatanoa vai telē, o se faamanatu tāua mo i latou ma Kerisiano uma, ina ia faatumauina lo latou mamā tauamio ma le faaleagaga. O fea la e tapuaʻi ai le “motu o tagata e toʻatele,” o ē e lagolagoina ma le faamaoni uso faauuina o Keriso? Na vaaia e le aposetolo o  Ioane i latou o loo “tutū i luma o le nofoālii,” ma “tuuina atu [ai i le Atua] le auaunaga paia . . . i le ao ma le pō.” O loo auauna le motu o tagata e toʻatele i le lalolagi i le lotoā pito i fafo o le malumalu faaleagaga. (Faaa. 7:​9, 13-15) Maʻeu lo tatou lotofaafetai ona ua tuuina mai e Ieova iā i tatou se avanoa matagofie, e tapuaʻi atu ai iā te ia i lona malumalu sili faaleagaga!

17. O ā taulaga o loo ofoina atu e Kerisiano iā Ieova?

¹⁷ I aso nei, ua maua e Kerisiano uma le faaeaga e ofoina atu ai taulaga iā Ieova, e ala i le faaaogā o lo latou taimi, malosi, ma meafaitino e faaauiluma ai manaʻoga o le Malo o le Atua. E pei ona taʻu atu e le aposetolo o Paulo i Kerisiano Eperu, e mafai ona tatou “ofo atu e lē aunoa i le Atua taulaga o viiga, o le fua lea o o tatou laugutu, e faailoa atu ai i tagata lona suafa.” (Epe. 13:15) E faaalia lo tatou matuā talisapaia o lo tatou faaeaga e tapuaʻi ai iā Ieova, e ala i le faia o le mea sili e auauna atu ai iā te ia.

18. E tusa ai ma le Eperu 10:​22-25, o le ā e lē tatau ona tatou faatalalē i ai, ma o le ā e lē tatau ona galo iā i tatou?

¹⁸ Faitau le Eperu 10:​22-25. A o lata ina faaiʻuina le tusi a Paulo i Kerisiano Eperu, na ia otooto mai ai vala eseese o la tatou tapuaʻiga e lē tatau ona tatou faatalalē i ai. E aofia ai le faalatalata atu iā Ieova i le tatalo, taʻutaʻu atu i le lautele lo tatou faamoemoe, faapotopoto faatasi o se faapotopotoga, ma fefaalaeiauaʻi, ma “ia sili foʻi ona faia faapea auā ua [tatou] iloa ua matuā latalata mai lava le aso [o Ieova].” I mataupu faaiʻu o le tusi o Faaaliga, na faapea atu ai le agelu a Ieova: “Ia tapuaʻi i le Atua!” E lua taimi na ia faia ai lenā faamatalaga, e faamatilatila ai le tāua o lo tatou faia o lenā gaoioiga. (Faaa. 19:10; 22:9) Ia aua lava neʻi galo iā i tatou lenei upu moni loloto faaleagaga e faatatau i le malumalu sili faaleagaga o Ieova, ma le faaeaga tautele ua tatou maua e tapuaʻi ai i lo tatou Atua sili!