1. Kɛkɔnge kɛ ondjelo otepelande, ko nkambo djɛsɔ ɔkɔpawɔ nsakisola nge le wɛ?

 NTSHA ondjelo alekɔ la nkambo djɛ nkoshimela, ape ongekameyɛ wɔlɔwɔlɔ djɛ ndjoka nkambo djɛkɔ? Ee, lɔɔko kɛnɛ, ondjelo ashimela ‘ewila enkfumɔ, tɔkɔlɛ tonkfumɔ, etepela enkfumɔ, la wepo w’anto ankfumɔ.’ Ashimelande nge? ‘Nyoke Ndjambe wɔma la nyolumɛ . . . Nyɔtɛmɔlɛ Kanga lotongisá olongo la looko.’ (Ndj. 14:6, 7) Yehova alekɔ ɛtɔyi kɛ Ndjambe kɛ nsɔsɔlɔ k’anto ankfumɔ oyɛwɔ ladjɛ ntɛmɔla. Ɔsɔngo oyɛso la djedjɛ dj’efula tá mpeyi k’ekekete kɛ ndatɔpɛyɛ djɛ ndɔtɛmɔla lá tɛmpɛlɔ kɛnde k’ekekete kɛ nyuma!

2. Tɛmpɛlɔ kɛ nyuma kɛ Yehova osakisolawɔ nge? (Lenda edjinge ipapango “ Kɛnɛ kɛ tɛmpɛlɔ kɛ nyuma ndopalekɔ́.”)

² Tɛmpɛlɔ kɛ nyuma oyɛwɔ nsɔsɔlɔ nge, edjinge lampe okokaso ntana akambo wasakisola tɛmpɛlɔ kɛkɔ? Tɛmpɛlɔ kɛ nyuma kepalekɔ mvulu kɛ nsɔsɔlɔ. Oyɛwɔ nde nonghanyi kembopikamá l’olambo w’oshinga wɔ mbendo wɔ Yeso, kɛ Yehova ndɔshi djɛ ndɔtɛmɔla lá wopo wɔkɔpande. Ɔpɔstɔlɔ Poolo apakisolaka nonghanyi kɛsɔ lá onkanda wɔ ntondo wɔ ndafunela Akristo wa Hebero wal’ɛtɛndɔ kɛ ntondo wawikaki lá Judeya. b

3-4. Lá nkambo djɛkɔnge Poolo ndakiyanaka l’ɔtɛ w’Akristo wa Hebero wayalaki lá Judeya, ko wopo wɔkɔnge ndakotshɛ́?

³ Ladjikɛnge Poolo ndafunela Akristo wa Hebero wawikaki lá Judeya onkanda? Akoka ndjala m’ɔtɛ wɔ donga mpe djɛ djonyi. Kɛ ntondo, djɛ ndakembɛ. Efula l’anteyi kɛwɔ wafulaka l’etolo k’ase Juda. Ewandji wɛ ntolo djɛwɔ djɛ yatɛmɔlaka ntondo  wakokaka ndawɔnyɔla l’ɔtɛ wɔ yakome Akristo. Ladjikɛnge? Ladjikɛnde Akristo watayalakí la tɛmpɛlɔ kekamoyɛ kɛ ntɛmɔla l’eteyi, watayalakí kaanga l’etshumbelo kɛ yakokaka ndambola Ndjambe elambo, edjinge watayalakí kaanga la nkfundji kekokaki ndalɔmbɛla. Nkambo djɛsɔ djekokaka ndɛmbɛ ambeki wa Kristo ole nkitshakitshɛ djawo djɛwɔ. (Heb. 2:1; 3:12, 14) Amɔtshi l’anteyi kɛwɔ wakɔpaka ole nkalɔ tá ntolo djɛwɔ djɛ ntondo dj’ase Juda.

⁴ Elonga k’ape, Poolo ashimelaka Akristo wa Hebero ante iwɔ ladjɛ nangha la wolo djɛ nsipisoyɛ elakanyelo wɛ bango kana wɛ lotshimola wɛ nyuma, ntepela ente ‘mma djɛ wolo’ dj’otanaso l’Otepela wɔ Ndjambe. (Heb. 5:11-14) Ndjokamaka papoo ente, amɔtshi l’anteyi kɛwɔ wakindjɛki nkilika Ɛlɛmbɛ wɛ Mɔsɛ. Koko, Poolo apakisolaka ante elambo wɛ Ɛlɛmbɛ yalɔmbaka wepakoke ndjipisanyɛ mpekanto. Djɛkondeke, Ɛlɛmbɛ ‘wemboheta lohowe.’ Masɔ, Poolo awangaka ndalakanyɛ akambo wa nsɔsɔlɔ wa lotshimola. Nde avungolaka winande Akristo ‘nkongi djeleka wɔlɔ’ djembopikama l’olambo wɔ Yeso djekoka nsɔsɔlɔ ‘ndasukanyɛ la Ndjambe.’—Heb. 7:18, 19.

5. Kɛkɔnge k’oyɛso la djonyi djɛ nsipisoyɛ má onkanda wɔ Hebero, ko ladjikɛnge?

⁵ Poolo apakisolaka wananyɔ wande wa Hebero ladjikɛnge yopo y’Akristo yatɛmɔlaka olekawɔ otale yopo yɛ yatɛmɔlaka ntondo. Yopo yɛ ase Juda yatɛmɔlaka lá nkilika Ɛlɛmbɛ yayalaka ngo ‘djingingi djɛ akambo wayaye, ntepela ente akambo wa nsɔsɔlɔ wa Kristo.’ (Kɔl. 2:17) Djingingi dj’ekete kɛmɔtshi oyɛwɔ ngo ɛnamelo kɛ ekete kɛ nsɔsɔlɔ kɛ djingingi djɛkɔ. Wopo wɔk’ɔmɔ ndeke, wopo wɔ ase Juda yatɛmɔlaka ntondo yayalaka nde djingingi djɛ akambo wa nsɔsɔlɔ wayalisá ladjɛ ndjɛ. Iso ladjɛ ndembetela nonghanyi kɛ Yehova ndombotilelá djɛ mba imeyelo k’evunga wɛso dj’iso ndjala l’akoka wa ndɔtɛmɔla lá wopo w’awolande. Nyontshɔ tɔkɛdjɛ djingingi (wopo w’ase Juda yatɛmɔlaka) l’akambo wa nsɔsɔlɔ (wopo wɔ Akristo ɔtɛmɔlawɔ), etengo opakisolawɔ l’onkanda wɔ Hebero. Má nangha nghɔsɔ, tongolembetela tɛmpɛlɔ kɛ nyuma wɔlɔwɔlɔ la wopo wolendanaso la tɛmpɛlɔ kɛkɔ.

6. Wopo wɔkɔnge yakambaka la tabɛrnaklɛ?

⁶ Wopo wɔ ase Juda yatɛmɔlaka. Poolo ɔsaka djamba djɛnde má tabɛrnaklɛ kɛ Mɔsɛ ndapike lá 1512 N.D.D. (Lenda kartɛ kelekɔ́ l’ɔtɛ  wɔ djoyi ante: “Wopo wɔ ase Juda yatɛmɔlaka ntondo—Wopo wɔ Akristo ɔtɛmɔlawɔ.”) Tabɛrnaklɛ yayalaka nde mvulu kɛ mpɛma k’ase Isariyɛlɛ yawɛmbaka má bango winá wɔ yotasɛkɔka. Wakambaka la mvulu kɛkɔ ɛnɔnyi 500 tii lá winá wɔ yopika tɛmpɛlɔ lá Jerusalɛmɛ. (Epo. 25:8, 9; Ew. 9:22) ‘Mvulu kɛ mpɛma k’osanghanelo’ kɛsɔ yayalaka nde edjena k’ase Isariyɛlɛ yatshɔka ntoyasukanyɛ la Ndjambe, ntolambola elambo la ntɔtɛmɔla. (Epo. 29:43-46) Koko, tabɛrnaklɛ ayalaki lonkina djingingi dj’ekete kɛmɔtshi keleka wɔlɔ efula keyalisá ladjɛ ndjɛ le Akristo.

7. Winá wɔkɔnge tɛmpɛlɔ kɛ nyuma yawange?

⁷ Wopo wɔ Akristo ɔtɛmɔlawɔ. Tabɛrnaklɛ kɛ ntondo yayalaka nde ‘djingingi djɛ nkete djel’olongo,’ la djingingi djɛ tɛmpɛlɔ k’ekekete kɛ nyuma kɛ Yehova. Poolo atepelaka ante ‘mvulu kɛ mpɛma kɛsɔ [kana tabɛrnaklɛ] kelekɔ ɛnamelo k’etsho wɛso wɛnɛ.’ (Heb. 8:5; 9:9) Djɛkondeke, winá wɔ ndafunaka onkanda wɔ Hebero, ko tɛmpɛlɔ kɛ nyuma kemboshiyɛka ndjala nkambo djɛ nsɔsɔlɔ le Akristo. Kewangaka l’ɔnɔnyi wɔ 29 D.D. L’ɔnɔnyi wɔsɔ, Yeso alongolaka batisimo, akfutamaka avuta má nyuma edjinge awangaka nkamba etengo ‘nkfundji k’ekekete’ kɛ Yehova lá tɛmpɛlɔ kɛ nyuma. c—Heb. 4:14; Ele. 10:37, 38.

8-9. Lá nkilika Hebero 7:23-27, otshikitano w’ekekete wɔkɔnge wolekɔ́ l’antenyɛ nkfundji yɛ nkekete yɛ Isariyɛlɛ la Nkfundji k’Ekekete, Yeso Kristo?

⁸ Wopo w’ase Juda yatɛmɔlaka. Nkfundji k’ekekete ayalaki l’odjito wɔ ntepetela anto lá ntondo kɛ Ndjambe. Arɔna, nkfundji k’ekekete kɛ ntondo kɛ Isariyɛlɛ, asɔnamaka me Yehova winá wɔ yananghe inɔgirasiɔ yɛ tabɛrnaklɛ. Koko, etengo Poolo ndapakisola, ‘efula wayalaka ladjɛ nkoma ankfundji má nkitana ladjikɛnde nyɔyi apekalaki djɛ ntshikala nkfundji lotshinda.’ d (Wala Hebero 7:23-27.) Lonkina, etengo yayalaka ampame yɛ ntshamba djɛ djɔ, ankfundji yɛ nkekete yɛsɔ wayalaki ladjɛ ndambola elambo lá nkambo djɛ mpekanto yɛwɔ. Ɔsɔ ndeke otshikitano w’ekekete wolekɔ́ l’antenyɛ ankfundji yɛ nkekete y’Isariyɛlɛ la Nkfundji k’Ekekete, Yeso Kristo.

⁹ Wopo wɔ Akristo ɔtɛmɔlawɔ. Etengo oyɛnde Nkfundji kɛso k’Ekekete, Yeso Kristo alekɔ ‘onkambi . . . welá mvulu kɛ mpɛma kɛ nsɔsɔlɔ kɛ Yehova nyɔmɛlɛ ndapike, koko ape onto.’ (Heb. 8:1, 2) Poolo apakisolaka ante: ‘Ladjikɛnde [Yeso] angokindjɛ ndjala la lowiko lotshinda lotshinda, lako onto wongokita l’olemo wɔnde wɔ nkfundji.’ Poolo akotshɛ ante: Yeso ‘apalekɔ la mbindo, ambowangɔ ananghi yɛ mpekanto’ la koko lá lɛdji lotshikitanyi la nkfundji y’Isariyɛlɛ, ‘nde apalekɔ la djonyi djɛ ndambola elambo lofu la lofu’ lá nkambo djɛ mpekanto yɛnde. Winá wɔsɔ nyontshɔ tokolenda otshikitano wolekɔ́ l’antenyɛ wopo wɔ ase Juda wa ntondo yakambaka la ntshumbelo edjinge elambo la wopo wɔ Akristo okambawɔ lɔɔkɔ kɛnɛ.

10. Elambo w’iyambolaka l’etshumbelo kɛ konga yɛnyɛká nge?

¹⁰ Wopo wɔ ase Juda yatɛmɔlaka. Lá bandja djɛ tabɛrnaklɛ wapikaka etshumbelo kɛ yalambolaka Yehova elambo w’anyama. (Epo. 27:1, 2; 40:29) Koko, elambo wɛsɔ wetakokaki ndjipisanyɛ mpekanto y’anto lotshinda lotshinda. (Heb. 10:1-4) Olambwelo w’anyama lofu la lofu lá tabɛrnaklɛ yayalaka nde djingingi djɛ olambo wongotshungola anto lotshinda lotshinda má mpekanto.

11. Yeso ndoyalambola etengo olambo l’etshumbelo kɛkɔnge? (Hebero 10:5-7, 10)

 ¹¹ Wopo wɔ Akristo ɔtɛmɔlawɔ. Yeso ewaki ante Yehova otomaka lá looko djɛ ndɔpɛyɛ lowiko lɔnde lɔ wɔn’onto etengo olambo wɔ oshinga wɔ mbendo lá nkambo djɛ anto. (Mat. 20:28) Djɛkondeke, lá batisimo djɛnde, Yeso ayalambolaka djɛ nangha ɛkɔpa kɛ Yehova. (Dj. 6:38; Nga. 1:4) Yeso ayalambolaka lá etshumbelo kɛ djingingi kesakisolaki ‘ɛkɔpa’ kɛ Ndjambe te Wɔnande kɛ ndambola lowiko lɔnde lɔ djɔ. Lowiko lɔ Yeso lolambolamaka ‘mbala kɛmɔ lotshinda lotshinda,’ djɛ nyimeyɛ kana djɛ ndjipisanyɛ lotshinda lotshinda, mpekanto y’onto onkfumɔ wongoyala la djawo te Kristo. (Wala Hebero 10:5-7, 10.) Winá wɔsɔ, tokoshishima nsakiso kɛ nkete djeyalaki l’eteyi kɛ tabɛrnaklɛ.

12. Onto wɔkɔna w’okokaki ndjingela l’etenyi kenkfumɔ kɛ tabɛrnaklɛ?

¹² Wopo wɔ ase Juda yatɛmɔlaka. Tabɛrnaklɛ la tɛmpɛlɔ kɛ yopikaka m’ɔkɔngɔ lá Jerusalɛmɛ kayalaki ngo wopo ɔmɔ l’eteyi. Ntenyi mpe djayalaki l’eteyi: ‘Etenyi k’Ekina la Etenyi Keleka Ekina’ kɛ yatolaka la irido. (Heb. 9:2-5; Epo. 26:31-33) L’Etenyi k’Ekina, nkondji djɛ ntala djɛ mpaonyi, etshumbelo kɛ yatshumbaka itshɔ yɛ nsolo mpimbo la mɛsa kɛ yatshikaka mampa w’ekina ndeke loyalaki l’eteyi. Ngo ‘ankfundji yembokfutama avuta’ ndeke loyalaki la lotshungo lɔ ndjingela l’Etenyi k’Ekina djɛ ntonangha olemo wɔwɔ w’ekina. (Ew. 3:3, 7, 10) L’etenyi Keleka Ekina, onsete wɔ mpaonyi, woyalaki djingingi djɛ ɛnamelo kɛ Yehova, ndeke loyalaki l’eteyi.  (Epo. 25:21, 22) Ngo nkfundji k’ekekete toko ndeke lolekanaki irido djɛ ndjingela l’etenyi Keleka Ekina mbala kɛmɔ l’ɔnɔnyi lá lofu lɔ ndjipisanyɛ mpekanto. (Lew. 16:2, 17) Ɔnɔnyi l’ɔnɔnyi, nde ingelaki l’ekila w’anyama djɛ ntodjipisanyɛ mpekanto yɛnde nyɔmɛlɛ la yɛ owila w’otondo. Ekomo ekomo, Yehova ɛnyɛka papoo nsakiso kɛ nkete djeyalaki lá tabɛrnaklɛ djɛsɔ má lotshimbo lɔ nyuma kɛnde k’ekina.—Heb. 9:6-8. e

13. Etenyi kɛ Ekina la etenyi Keleka Ekina yayalaka djingingi djɛ nge?

¹³ Wopo w’Akristo ɔtɛmɔlawɔ. Lofulo lɔ daambi lɔ ambeki wa Kristo wakfutamaka avuta má nyuma k’ekina, edjinge walekɔ la djokanelo djetshikitanyi la Yehova. Anto 144 000 wasɔ, wangotokamba etengo ankfundji l’olongo esanga la Yeso. (Ndj. 1:6; 14:1) Etenyi k’Ekina kɛ tabɛrnaklɛ nsakisolaka wopo wɔ yombawolamá etengo wana wa nyuma wa Ndjambe winá w’oyɛwɔ lá looko. (Ɔrɔ. 8:15-17) Etenyi Keleka Ekina kɛ tabɛrnaklɛ nsakisolaka olongo, edjena kɛ Yehova intasɛnde. ‘Irido’ yatolaki Etenyi k’Ekina l’Etenyi Keleka Ekina oyɛwɔ nde djingingi djɛ demba dj’ankfunda djɛ Yeso dj’oshimbaki djɛ mpanda t’olongo etengo Nkfundji k’Ekekete kɛ tɛmpɛlɔ kɛ nyuma. Má ndambola demba djɛnde etengo olambo lá nkambo dj’anto, Yeso adjipolaka Akristo w’ankfutami w’avuta ankfumɔ mboka kɛ lowiko lɔ l’olongo. Iwɔ ladjɛ ntshika demba djɛwɔ dj’ankfunda djɛ mba lofuto lɔwɔ lɔ t’olongo. (Heb. 10:19, 20; 1 Kɔ. 15:50) M’ɔkɔngɔ wɔ Yeso nkfundɔ, nde ingelaka l’etenyi Keleka Ekina kɛ tɛmpɛlɔ kɛ nyuma, edjena kɛ ankfutami w’avuta ankfumɔ yongookilika.

14. Lá nkilika Hebero 9:12, 24-26, ladjikɛnge ntɛmɔla Yehova lá ntɛmpɛlɔ kɛ nyuma olekawɔ wopo wɔ yɔtɛmɔlaka ntondo?

¹⁴ Lanɛ tɔmbɛna papoo wopo wɔ nonghanyi kɛ Yehova kelendana l’ɔtɛmwɛlɔ wɔ piyɔɔ wombopikama lá olambo wɔ Yeso w’oshinga wɔ mbendo edjinge olemo wɔ Yeso Kristo wɔ nkfundji k’ekekete oyɛwɔ ekekete. Nkfundji k’ekekete kɛ Isariyɛlɛ ingelaki l’etenyi Keleka Ekina kenanghemisá má ɛwɔ w’anto la ekila w’anyama wɛ yalambolaka, koko Yeso ndingela nde ‘l’olongo,’ edjena keleka djena nkfumɔ ekina djɛ ntɛnama lá ntondo kɛ Yehova. L’eteyi nde ɛnyɛka ntsho djɛ lowiko lɔnde lɔ djɔ lá wapɔ wɔso djɛ ‘nyimɛ mpekanto mpeyi má olambo wɔnde.’ (Wala Hebero 9:12, 24-26.) Olambo wɔ Yeso wolekɔ olambo woleka ntshina wodjipisanyɛ mpekanto lotshinda lotshinda. Etengo ɔkɔpaso nyɛna, ayale oyɛso nde la nkongi djɛ ntowika l’olongo kana lá looko, isankfumɔ nkoka ntɛmɔla Yehova lá ntɛmpɛlɔ kɛnde kɛ nyuma.

15. Okambaki lá bandja djɛ tabɛrnaklɛ na?

¹⁵ Wopo wɔ ase Juda yatɛmɔlaka. Tabɛrnaklɛ kayalaki ngo l’ɛtɔyi kɛ bandja, ntepela ente edjena k’ekekete kedjingamisá la lopango, kɛ ankfundji yananghaka elemo wɛwɔ. Etshumbelo k’ekekete kɛ konga kɛ yalambolaka elambo wɛ lotshumba kayalaki lá bandja djɛkɔ, esanga la dɔnga djɛ konga dj’ekekete djɛ washi djɛ ankfundji yasolaka ɛwɔ l’ekolo lá ntondo kɛ nangha olemo wɔwɔ w’ekina. (Epo. 30:17-20; 40:6-8) Koko, atɛmpɛlɔ yɛ yopikaka m’ɔkɔngɔ yayalaki ole la awandja ankina w’anto watayalaki ankfundji yakokaka nyemala la ntɛmɔla Ndjambe.

16. Okamba lá bandja la bandja djɛ tɛmpɛlɔ kɛ nyuma na?

¹⁶ Wopo wɔ Akristo ɔtɛmɔlawɔ. Lá ntondo kɛ mpanda djɛ ntokamba esanga la Yeso etengo ankfundji l’olongo, wananyɔ wande w’ankfutami  w’avuta wakamba la nkɔmano nkfumɔ lá bandja djɛl’eteyi djɛ tɛmpɛlɔ kɛ nyuma lanɛ lá looko. Dɔnga dj’ekekete djɛ washi djeyalaki lá tabɛrnaklɛ ole lá tɛmpɛlɔ ndavungolaka iwɔ edjinge Akristo ankfumɔ nkambo mɔtshi djɛ djonyi, nkambo djɛkɔ nde ntshikala piyɔɔ lá demba la lá nyuma. Iya koko oloyi w’ekekete w’anto wosuka wananyɔ w’ankfutami w’avuta la nkɔmano nkfumɔ ɔtɛmɔlawɔ Yehova lampe? Ɔpɔstɔlɔ Djɔanɛ awɛnaka ‘wambemala lá ntondo kɛ yɛɛkɔ yɛ lowandji,’ ilekɔ́ nsakiso kɛ bandja djel’andja lanɛ lá looko, edjena ‘k’okambelawɔ [Ndjambe] olemo w’ekina otsho mbile lá tɛmpɛlɔ kɛnde.’ (Ndj. 7:9, 13-15) Ɔsɔngo oyɛso l’osasa lá wopo wɔ Ndjambe ndatɔpɛyɛ edjena kɛ ntshina efula lá nonghanyi kɛnde kɛ ɔtɛmwɛlɔ wɔ piyɔɔ!

17. Elambo wɛkɔnge w’oyɛso la mpeyi kɛ ndambola Yehova?

¹⁷ Lɔɔko kɛnɛ Akristo ankfumɔ walekɔ la mpeyi kɛ ndambola Yehova elambo má nkamba la winá, wolo, la nkete djɛwɔ djɛ nsuka wapɔ w’Onkfumi wɔ Ndjambe. Etengo Poolo ndashimela Akristo w’ase Hebero, iso nkoka ‘mfu inkfumɔ ndambola Ndjambe elambo wɛ lomo, lowambo lɔ ntɔmbɔ djɛso lotepela lá ntshandjawala nkambo djɛ djiina djɛnde.’ (Heb. 13:15) Iso nkoka nyɛnyɛ ente tosasanga la mpeyi kɛso kɛ ntɛmɔla Yehova má ndolambolaka elambo wɛso weleka wɔlɔ.

18. Lá nkilika Hebero 10:22-25, kɛkɔnge kɛ sopakoke nyimɛ yimba la kɛ sopakoke mvungɛ lotshinda?

¹⁸ Wala Hebero 10:22-25. T’ekomo k’onkanda wɔnde wɔ ndafunela ase Hebero, Poolo apikaka nghɔmɔ ɛnsɔsɔ lá topo totshikitanyi tɔtɛmɔlaso Yehova tɔ sopakoke lotshinda nyimɛ yimba. Ndjɔmbɔmba, ndɔmba Yehova mbala la mbala, mpoposanyɛka nkongi djɛso le anto ankina, nsanghanaka lá nsanghanyɛ y’otshumano, la nkembanɛka l’anteyi kɛso edjinge ndeka nangha nghɔsɔ ‘etengo ɛnaso ente lofu lɔ Yehova lomboleka ndjala entshupa.’ Tá ekomo kɛ akambo welá onkanda wɔ Ndjiso, ondjelo wɔ Yehova atepelaka nkambo djɛnɛ mbala ipe y’etondo ante: ‘Tɛmɔla Ndjambe!’ (Ndj. 19:10; 22:9) Nyontshɔ isankfumɔ tovungɔke akambo wa nsɔsɔlɔ wa lotshimola wa nyuma walendana la tɛmpɛlɔ k’ekekete kɛ nyuma kɛ Yehova, ole mpeyi kɛ wɔlɔ efula k’okotshɛso kɛ ntɛmɔla Ndjambe kɛso k’ekekete!