1. Kakɔna kawelɛ ondjelo ndo kakɔna kalembetshiya dui sɔ le so?

 NAKA ondjelo ɔmɔtshi ekɔ lo nanga ntɛkɛta layɛ, onde wɛ ayohokamɛ kɛnɛ kalangande kotɛ? Ɛlɔ kɛnɛ, ondjelo ɔmɔtshi ekɔ lo mbewoya “wedja tshɛ ndo waoho tshɛ ndo ɛtɛkɛta tshɛ ndo weho w’anto tshɛ” losango lɔmɔtshi. Kakɔna katandewoya? “Nyoke Nzambi wɔma ndo nyootombole . . . Nyɔtɛmɔlɛ Ɔnɛ lakatonge olongo la nkɛtɛ.” (Ɛny. 14:​6, 7) Paka Jehowa oto mbele Nzambi ka mɛtɛ kahomba anto tshɛ ntɛmɔla. Ande lowando lakokaso monga lalɔ lo woho wakandatosha diɛsɛ dia nɛmɔ efula dia mbɔtɛmɔla lo tɛmpɛlɔ kande ka woke ka lo nyuma lee!

2. Kakɔna kalembetshiya tɛmpɛlɔ ka Jehowa ka lo nyuma? (Enda nto kiombo yele l’ɔtɛ a dui ɔnɛ: “ Kɛnɛ kahatalembetshiya.”)

² Kakɔna mɛtɛ kalembetshiya tɛmpɛlɔ ka lo nyuma ndo lende akokaso ntana elembetshiyelo wa kɛnɛ tshɛ kele lɔkɔ? Tɛmpɛlɔ ka lo nyuma bu luudu la mɛtɛ mɛtɛ. Tɔ kekɔ yɛdikɔ ya Jehowa lo dikambo dia yoho y’ɔtɛmwɛlɔ yetawɔma yohikami l’oshinga w’etshungwelo wa Yeso. Ɔpɔstɔlɔ Pɔɔlɔ akalembetshiya yɛdikɔ shɔ lo mukanda wakandafundɛ Akristo w’ase Hɛbɛru wa lo ntambe ka ntondo wakasɛnaka la Judeya. b

3-4. Kakɔna kakakiyanyaka Pɔɔlɔ lo dikambo di’Akristo w’ase Hɛbɛru waki la Judeya ndo kakɔna kakandasale dia mbakimanyiya?

³ Lande na kakafundɛ Pɔɔlɔ Akristo w’ase Hɛbɛru wakadjasɛka la Judeya mukanda? Ondo l’ɔtɛ w’ɛkɔkɔ ehende wa weke. Ɔkɔkɔ wa ntondo, ele dia mbakeketsha. Efula ka l’atei awɔ wakodiama l’ɔtɛmwɛlɔ w’ase Juda. Ondo ewandji wa l’ɔtɛmwɛlɔ  wakiwɔ ntondo wakawasɔkaka l’ɔtɛ wayawɔ Akristo. Lande na? Nɛ dia Akristo komonga la tɛmpɛlɔ kakawahombaka ntshɔ dia tɔtɛmɔla, vɔ komonga la elambwelo kakawahombaka nambola Nzambi elambo ndo vɔ komonga l’ɛlɔmbɛdi dia mbakambɛ. Dui sɔ diakakoke nkɔmɔla ambeki wa Kristo ndo nkitshakitsha mbetawɔ kawɔ. (Hɛb. 2:1; 3:​12, 14) Ondo amɔtshi l’atei awɔ wakahembama dia nkalola l’ɔtɛmwɛlɔ w’ase Juda.

⁴ Ɔkɔkɔ wa hende, ele nɛ dia Pɔɔlɔ akate dia Akristo w’ase Hɛbɛru asɔ kombidjaka welo dia nshihodia wetshelo w’eyoyo kana awui wa lotshimula wa lo nyuma, mbuta ate “mbo ya ndɛ ya wolo” y’oma l’Ɔtɛkɛta wa Nzambi. (Hɛb. 5:​11-14) Mɛnamaka dia amɔtshi l’atei awɔ wakatetemala ndjela Ɛlɛmbɛ wa Mɔsɛ. Koko Pɔɔlɔ akalembetshiya dia elambo wakalambɔmaka lo ndjela Ɛlɛmbɛ wa Mɔsɛ kokokaka minya pɛkato tshɛ lo tshɛ. L’ɔtɛ w’ɔkɔkɔ ɔsɔ, mbele Ɛlɛmbɛ ‘wakatɔ.’ Ɔnkɔnɛ, Pɔɔlɔ akatetemala mbowaetsha akambo wa mɛtɛ wa lotshimola. Nde akohola asekande Akristo dia “elongamelo koleki dimɛna” kohikami l’olambo wa Yeso kakakoke mɛtɛ mbakimanyiya dia ‘ndjasukanya la Nzambi.’—Hɛb. 7:​18, 19.

5. Kakɔna kahombaso nshihodia lo dibuku dia lo Bible dia Hɛbɛru ndo lande na?

⁵ Pɔɔlɔ akalembetshiya anango w’ase Hɛbɛru lande na kele ɔtɛmwɛlɔ awɔ w’Akristo wakaleke la fwa ɔtɛmwɛlɔ wakawatɛmɔlaka ntondo. Yoho yakatɛmɔlaka ase Juda lo ndjela Ɛlɛmbɛ aki tsho “didjidji di’akambo wokoya, koko etondo w’akambo wekɔ le Kristo.” (Kɔl. 2:17) Didjidji ekɔ dɛdi dia woho wele ɛngɔ kɛmɔtshi, koko aha tshondo y’ɛngɔ kakɔ. Woho akɔ waamɛ mbele, yoho yakatɛmɔlaka ase Juda wa lo nshi y’edjedja Nzambi aki didjidji nɛ dia yoho yoleki dimɛna ya ntɛmɔla yakahombe ndja. Tekɔ l’ohomba wa nshihodia yɛdikɔ yakɔshi Jehowa lo dikambo diaso, dia pɛkato yaso dimanyiyama l’oyango wa sho mbɔtɛmɔla lo yoho yetawɔnde. Nyɛsɔ tɛdike “didjidji” (yoho y’edjedja yakatɛmɔlaka ase Juda) la “etondo w’akambo” (yoho yatɛmɔla Akristo), oko wolembetshiyamidiɔ lo Hɛbɛru. Lo nsala ngasɔ, sho koka nshihodia dimɛna ele tɛmpɛlɔ ka lo nyuma ndo woho wendanaso la dui sɔ.

6. Ngande wakakambemaka tabɛrnaklɛ?

⁶ Lo nshi y’edjedja. Ɔkɛtshanyelo wa Pɔɔlɔ wakahikama lo tabɛrnaklɛ kakataki Mɔsɛ lo  1512 N.T.D. (Enda kiombo yele l’ɔtɛ a dui ɔnɛ: “Yoho ya ntondo yakatɛmɔlaka ase Juda—Yoho yɔtɛmɔla Akristo ɛlɔ kɛnɛ.”) Tabɛrnaklɛ aki oko luudu la dipɛma lakatɛmbaka ase Isariyɛlɛ dihole tshɛ diakawatatshɔka. Vɔ wakakambe la tɔ suke la ɛnɔnyi oko 500 polo lam’akayokamaka tɛmpɛlɔ la Jɛrusalɛma. (Eto. 25:​8, 9; Wal. 9:22) “Luudu la dipɛma l’esanganelo” lɔsɔ laki dihole diakayasukanyaka ase Isariyɛlɛ la Nzambi ndo wakolambolaka elambo ndo wakɔtɛmɔlaka. (Eto. 29:​43-46) Koko, tabɛrnaklɛ kɛsɔ kaki didjidji dia dui dia dimɛna efula diakahombe komɛ Akristo.

7. Etena kakɔna kakatatɛ tɛmpɛlɔ ka lo nyuma monga dui dia mɛtɛ?

⁷ Lo nshi y’Akristo. Tabɛrnaklɛ k’edjedja kɛsɔ aki “didjidji dia akambo wa l’olongo,” ndo tɔ kaki didjidji dia tɛmpɛlɔ ka woke ka Jehowa ka lo nyuma. Pɔɔlɔ akate dia “luudu la dipɛma lɔsɔ [kana, tabɛrnaklɛ] lekɔ djembetelo dikambo di’etena kɛnɛ.” (Hɛb. 8:5; 9:9) Ɔnkɔnɛ, l’etena kakandafundɛka ase Hɛbɛru mukanda, ko tɛmpɛlɔ ka lo nyuma kambotongaka dui dia mɛtɛ le Akristo. Tɔ kakayala l’ɔnɔnyi 29 T.D. Ɔnɔnyi akɔ mbakabatizama Yeso, akakitama nyuma k’ekila ndo nde akatatɛ nkamba oko “ɔlɔmbɛdi a laadiko wa woke” lo tɛmpɛlɔ ka lo nyuma ka Jehowa. c—Hɛb. 4:14; Ets. 10:​37, 38.

8-9. Lo ndjela Hɛbɛru 7:​23-27, otshikitanu akɔna wa woke wele lam’asa ɛlɔmbɛdi a laadiko wa l’Isariyɛlɛ la Ɔlɔmbɛdi a woke, Yeso Kristo?

⁸ Lo nshi y’edjedja. Ɔlɔmbɛdi a laadiko aki la lotshungɔ la monga onyimpala w’anto la ntondo ka Nzambi. Ɔlɔmbɛdi a laadiko wa ntondo lo nshi y’Isariyɛlɛ, Arɔna akasɔnama oma le Jehowa, etena k’osapwelo wa tabɛrnaklɛ. Koko, oko wakadilembetshiya Pɔɔlɔ, “anto efula wakahombe nkoma ɛlɔmbɛdi lo taahɔnaka, nɛ dia nyɔi akaashimbaka dia vɔ ntshikala ɛlɔmbɛdi pondjo.” d (Adia Hɛbɛru 7:​23-27.) Ondo oko waki apami asɔ komonga kokele, ɛlɔmbɛdi a laadiko ɛsɔ wakahombaka nambola elambo dikambo dia pɛkato yawɔ hita. Laasɔ mbele otshikitanu wele lam’asa ɛlɔmbɛdi a laadiko wa lo nshi y’Isariyɛlɛ la Ɔlɔmbɛdi a laadiko a woke, Yeso Kristo.

⁹ Lo nshi y’Akristo. Oko Ɔlɔmbɛdi aso a laadiko, Yeso Kristo ekɔ “okambi . . . wa luudu la dipɛma la mɛtɛ mɛtɛ lakake Jehowa, koko aha onto.” (Hɛb. 8:​1, 2) Pɔɔlɔ akalembetshiya dia “lam’ele [Yeso] ekɔ la lɔsɛnɔ pondjo pondjo, ndooko onto layowɔhɛna l’olimu w’ɔlɔmbɛdi.” Pɔɔlɔ akakotsha dia Yeso ekɔ ɔlɔmbɛdi “waha la mindo, wokakitɔnyi la atshi wa pɛkato” ndo otshikitanyi l’ɛlɔmbɛdi a laadiko wa l’Isariyɛlɛ, “nde bu la ohomba wa nambolaka elambo lushi la lushi” lo dikambo dia pɛkato yande hita. Kakianɛ tɔsɛdingole otshikitanu wele lam’asa dilambwelo la elambo wakawalambolaka lo nshi y’edjedja ndo wɛnɛ walambola Akristo ɛlɔ kɛnɛ.

10. Elambo wa lo elambwelo ka nkonga waki didjidji dia na?

¹⁰ Lo nshi y’edjedja. L’andja wa soko dia tabɛrnaklɛ aki elambwelo kakasalema la nkonga dia nambolaka Jehowa elambo wa nyama. (Eto. 27:​1, 2; 40:29) Koko, elambo ɛsɔ kokokaka dimanyiya pɛkato y’anto tshɛ lo tshɛ. (Hɛb. 10:​1-4) Elambo wa nyama yakawalambolaka  mbala la mbala lo tabɛrnaklɛ aki didjidji di’olambo wakahombe ndjotshungola anto oma lo pɛkato tshɛ lo tshɛ.

11. Lo elambwelo kakɔna kakayalambola Yeso oko olambo? (Hɛbɛru 10:​5-7, 10)

¹¹ Lo nshi y’Akristo. Yeso akeyaka dia Jehowa akotome la nkɛtɛ dia ndjokimɔ lɔsɛnɔ lande oko oshinga w’etshungwelo dikambo di’anto. (Mat. 20:28) Diakɔ diele, lo batisimu kande, Yeso akayakimɔ dia nsala kɛnɛ kakalangaka Jehowa. (Jni. 6:38; Ngal. 1:4) Elambwelo kakayalambola Yeso ndamɛ lɔkɔ komonga elambwelo kakasale anto, koko kaki didjidji dia “lolango” la Nzambi. Yeso akakimɔ lɔsɛnɔ lande oko olambo “mbala ɔtɔi 1 lo pondjo” dia dimanyiya kana nkomba lo pondjo pɛkato k’onto tshɛ longa la mbetawɔ le Kristo. (Adia Hɛbɛru 10:​5-7, 10.) Tayanga nkɛtshanya kɛnɛ kalembetshiya diangɔ tshɛ dia l’etei ka tabɛrnaklɛ.

12. Akɔna akakokaka mbɔtɔ lo tenyi tshɛ dia tabɛrnaklɛ?

¹² Lo nshi y’edjedja. Tabɛrnaklɛ ndo tɛmpɛlɔ yakayokamaka l’ɔkɔngɔ la Jɛrusalɛma yaki woho ɔtɔi l’etei. L’etei aki tenyi pende, mbuta ate “Dihole di’Ekila” ndo “Dihole Dioleki Ekila,” dihɔndɔ di’okombɔ mbakakikotolaka ahole ahende asɔ. (Hɛb. 9:​2-5; Eto. 26:​31-33) L’etei ka Dihole di’Ekila wakakitshaka ekundji ka tala ka paonyi, elambwelo ka tshɔ ndo mɛsa wakawakitshaka mapa wa lɛɛnya. Paka “ɛlɔmbɛdi wele akitami w’esɔ” mbaketawɔmaka dia mbɔtɔ lo Dihole di’Ekila dia tokamba elimu awɔ w’ekila. (Wal. 3:​3, 7, 10)  Dihole Dioleki Ekila diakikɔ l’ɔshɛtɛ wa sheke wa paonyi, waki didjidji dia eongelo ka Jehowa. (Eto. 25:​21, 22) Paka ɔlɔmbɛdi a laadiko mbaketawɔmaka dia ntenyanya dihɔndɔ di’okombɔ ko mbɔtɔ lo Dihole Dioleki Ekila mbala ɔtɔi l’ɔnɔnyi lo Lushi l’ekombelo ka pɛkato. (Lɛw. 16:​2, 17) Ɔnɔnyi l’ɔnɔnyi, nde akɔtɔka la dikila dia nyama dikambo dia ekombelo ka pɛkato yande hita ndo ya wodja w’otondo. L’edjedja ka wonya, lo tshimbo ya nyuma kande k’ekila, Jehowa akayosha kitshimudi ya diangɔ tshɛ diaki lo tabɛrnaklɛ.—Hɛb. 9:​6-8.

13. Kakɔna kalembetshiya Dihole di’Ekila ndo Dihole Dioleki ekila dia lo tabɛrnaklɛ lo nshi y’Akristo?

¹³ Lo nshi y’Akristo. Lofulo la tshitshɛ l’ambeki wa Kristo lakasɔnama lo tshimbo ya nyuma k’ekila ndo waya la diɔtɔnganelo dia laande la Jehowa. Anto 144000 asɔ wayotokamba oko ɛlɔmbɛdi l’olongo kaamɛ la Yeso. (Ɛny. 1:6; 14:1) Dihole di’Ekila dia lo tabɛrnaklɛ mɛnyaka dia vɔ wambotama oko ana wa yanyi wa lo nyuma waki Nzambi, etena kekewɔ lanɛ la nkɛtɛ. (Rɔmɔ 8:​15-17) Dihole Dioleki Ekila dia lo tabɛrnaklɛ nembetshiyaka olongo, lɛnɛ odjashi Jehowa. “Dihɔndɔ di’okombɔ” diakakakitolaka Dihole di’Ekila la Dihole Dioleki Ekila, nembetshiyaka demba dia Yeso dia l’emunyi diakawoshimbaka diaha nde mbɔtɔ l’olongo oko Ɔlɔmbɛdi a Woke a laadiko lo tɛmpɛlɔ ka lo nyuma. Lo nkimɔ demba diande oko olambo lo dikambo di’anto, Yeso akadihola mboka k’otsha lo lɔsɛnɔ la l’olongo dikambo di’akitami tshɛ. Vɔ lawɔ pombaka ntshika alemba awɔ wa l’emunyi dia nongola difuto diawɔ dia l’olongo. (Hɛb. 10:​19, 20; 1 Kɔr. 15:50) L’ɔkɔngɔ wa Yeso mbolɔ, nde akɔtɔ lo Dihole Dioleki Ekila dia lo tɛmpɛlɔ ka lo nyuma, lɛnɛ ayowoyela akitami tshɛ.

14. Lo ndjela Hɛbɛru 9:​12, 24-26, kakɔna ketɛ dia yoho ya ntɛmɔla lo tɛmpɛlɔ ka lo nyuma ka Jehowa ndeka la fwa yoho yakatɛmɔlaka ase Isariyɛlɛ Jehowa lo nshi y’edjedja?

¹⁴ Lanɛ tambokoka mɛna hwe nɛmɔ dioleki diele la yɛdikɔ ya Jehowa lo dikambo dia yoho y’ɔtɛmwɛlɔ y’etawɔma yohikami l’oshinga w’etshungwelo wa Yeso ndo olimu w’ɔlɔmbɛdi wa Yeso Kristo. Ɔlɔmbɛdi a laadiko wa l’Isariyɛlɛ akɔtɔka lo Dihole Dioleki ekila diakasalema oma le anto l’olambo wa dikila dia nyama, koko Yeso akɔtɔ “l’olongo,” dihole di’oleki tshɛ ekila tshɛ dia tɛnama la ntondo ka Jehowa. Lɛkɔ nde akatokimɔ nɛmɔ dia olambo ande wa lɔsɛnɔ lande l’onto la kokele lo wahɔ aso “dia minya pɛkato l’ekimanyielo k’olambo ande.” (Adia Hɛbɛru 9:​12, 24-26.) Olambo wa Yeso mbelaka edimanyielo ka pɛkato lo pondjo. Oko wayangaso mɛna, oyadi tekɔ l’elongamelo ka tɔsɛna l’olongo kana lanɛ la nkɛtɛ, sho tshɛ koka ntɛmɔla Jehowa lo tɛmpɛlɔ kande ka lo nyuma.

15. Waa na wakakambaka lo sɛkɛ dia tabɛrnaklɛ?

¹⁵ Lo nshi y’edjedja. Tabɛrnaklɛ kaki la sɛkɛ, mbuta ate dihole diaki hwe l’etei ka lokombo, lɛnɛ akahombaka ɛlɔmbɛdi nsala elimu awɔ. Elambwelo ka woke ka nkonga katshumbaka elambo kaki lo sɛkɛ sɔ kaamɛ la dɔnga dia woke dia nkonga diaki l’ashi wakakambaka l’ɛlɔmbɛdi dia ndjaɛdia la ntondo ka vɔ nkamba elimu awɔ w’ekila. (Eto. 30:​17-20; 40:​6-8) Koko tɛmpɛlɔ yakayokamaka l’ɔkɔngɔ, yaki l’asɛkɛ l’andja wakemalaka wanɛ waki komonga ɛlɔmbɛdi ndo ntɛmɔla Nzambi.

16. Waa na wakamba l’asɛkɛ tshɛ wa tɛmpɛlɔ ka lo nyuma?

¹⁶ Lo nshi y’Akristo. La ntondo ka vɔ ntshɔ l’olongo dia tokamba oko ɛlɔmbɛdi kaamɛ la Yeso, atshikadi w’akitami weke lanɛ la nkɛtɛ  wekɔ lo nkamba la kɔlamelo tshɛ lo sɛkɛ dia l’etei dia tɛmpɛlɔ ka lo nyuma. Dɔnga dia woke diaki l’ashi lo mbɔtwɛlɔ ka tabɛrnaklɛ ndo ka waa tɛmpɛlɔ mbaoholaka ndo mboholaka Akristo tshɛ ohomba wa ntshikala pudipudi lo lɔkɛwɔ ndo lo nyuma. Ko lende akambɛ “olui a woke” Jehowa olimu kana mbɔtɛmɔla, mbuta ate wanɛ wasukɛ anango Kristo w’akitami? Ɔpɔstɔlɔ Joani akawaɛnyi “wemadi la ntondo ka kiti ka lowandji,” kalembetshiya lanɛ la nkɛtɛ sɛkɛ dia l’andja, lɛnɛ “[akambɛwɔ Nzambi olimu w’ekila la yanyi ndo l’otsho lo tɛmpɛlɔ kande.” (Ɛny. 7:​9, 13-15) Tekɔ mɛtɛ la lowando efula le Jehowa lo woho wakandatosha diaaso dia mbɔtɛmɔla lo tɛmpɛlɔ kande ka woke ka lo nyuma!

17. Naa elambo weso la diɛsɛ dia nambola Jehowa?

¹⁷ Ɛlɔ kɛnɛ Akristo tshɛ wekɔ la diɛsɛ dia nambola Jehowa elambo awɔ lo nkamba la wenya awɔ, wolo awɔ ndo diangɔ diawɔ dia mbetsha wahɔ wa Diolelo dia Nzambi lo dihole dia ntondo. Oko wakatɛ ɔpɔstɔlɔ Pɔɔlɔ Akristo wa la Hɛbɛru, sho lawɔ “nyɛsɔ tolambolake Nzambi nshi tshɛ olambo wa lotombo, mbuta ate elowa w’oma l’ɛlɔmɔ aso wasala wotelo wa lo sɛkɛ dikambo dia lokombo lande.” (Hɛb. 13:15) Sho koka mɛnya dia sho mbɔsaka la nɛmɔ diɛsɛ diaso dia ntɛmɔla Jehowa lo mbolambolaka elambo aso woleki tshɛ amɛna.

18. Lo ndjela Hɛbɛru 10:​22-25, kakɔna kahatahombe pondjo minya yimba ndo kakɔna kahatahombe pondjo mbohɛ?

¹⁸ Adia Hɛbɛru 10:​22-25. Otsha l’ekomelo ka mukanda wakandafundɛ ase Hɛbɛru, Pɔɔlɔ akashile toho totshikitanyi tendana l’ɔtɛmwɛlɔ aso tahatahombe pondjo minya yimba. Toho takɔ mendanaka la ndjasukanya la Jehowa lo dɔmbɛlɔ, nsambisha anto akina dikambo dia elongamelo kaso, sanganaka kaamɛ l’etshumanelo ndo keketshanyaka kaamɛ lam’asaso ndo “toleke nsala dikambo sɔ oko wɛna[so] dia lushi [la Jehowa] lakɔ laya suke.” Otsha l’ekomelo k’ɔkɔndɔ wa l’Ɛnyɛlɔ, ondjelo wa Jehowa mbutaka mbala hiende dia tɔtɔmiya ɔnɛ: “Tɛmɔla Nzambi!” (Ɛny. 19:10; 22:9) Tatohɛke pondjo awui wa lotshimula wambotɛna wendana la tɛmpɛlɔ ka Jehowa ka woke ka lo nyuma ndo tatohɛke diɛsɛ diele laso dia ntɛmɔla Nzambi kaso ka woke!