1. ¿Tuku lichuwinama chatum ángel, chu la kilimakgamakglhtinatkan xtamakatsinin?

 KOMO chatum ángel xtachuwinan, ¿kaks xkgaxpatni? La uku, chatum ángel katachuwinama «xliputum laklanka kachikinin, laklanka familias, tiku chuwinankgo tipalhuwa tachuwin chu kachikinin». ¿Chu tuku kawanima? «Kapekuanitit Dios chu kamaxkitit kakni, […] kakakninanitit tiku tlawalh akgapun, katiyatni, pupunu chu taxtunu» (Apoc. 14:​6, 7). Kimputumkan kilikakninanitkan Jehová; kajwatiya xla xaxlikana Dios. Lu paxtikatsiniyaw Jehová pi tlan kakninaniyaw kxtemplo xaʼespiritual. ¡Akgtum lanka talakgalhaman!

2. ¿Tuku kilhchanima xtemplo Jehová xaʼespiritual? (Na kaʼakxilhti recuadro « Tuku ni kilhchanima»).

² ¿Tuku kilhchanima templo xaʼespiritual, chu niku lichuwinankan? Templo xaʼespiritual ni akgtum chiki. Wa tuku Jehová lakkaxwilinit xlakata nakakninaniyaw chuna la xla lakaskin, chu Jehová limaklakaskinit xtamakamastan Jesús xlakata nalakkaxwili uma. Kxapulana siglo, apóstol Pablo tipalhuwa tuku lichuwinalh xlakata la lakkaxwilinit Jehová nakakninanikan. Anta talichuwinan ktatsokgni nema kamalakgachanilh hebreos tiku xlamakgo kJudea. b

3, 4. ¿Tuku xlakata Pablo xkalilakgaputsama kstalaninanin Cristo tiku hebreos xwankgonit, chu la kamakgtayalh?

³ ¿Tuku xlakata Pablo katsokgnanilh hebreos tiku xlamakgo kJudea? Max pulaktiy tuku xlakata. Pulana, xlakata nakamakgpuwantini. Lhuwa kstalaninanin Cristo xkalimakgastakkanit xtakanajlakan judíos, chu max xpulalinanin uma takanajla xkalikgalhkgamanankgo xlakata kstalaninanin Cristo xlitaxtukgonit.  ¿Tuku xlakata? Xlakata kstalaninanin Cristo ni xkgalhikgo akgtum lanka templo niku xkakninanikgolh Dios chuna la judíos, na ni xkgalhikgo akgtum pumakamastan niku xtlawakgolh xtamakamastankan, chu ni xʼanankgo sacerdotes. Uma max tlan xtimaxlajwanilh xtakanajlakan kstalaninanin Cristo (Heb. 2:1; 3:​12, 14). Max asta makgapitsi xlilakpuwamakgo nalilatamaparakgo xtakanajlakan judíos.

⁴ Xlipulaktiy, Pablo kamakgtayalh kstalaninanin Cristo naʼakxilhkgo pi ni xliskujmakgo naʼakgatekgskgo xasasti tamasiy o tuku tlakg tuwa, nema xtachuna la «xapalha liwat» nema min kxTachuwin Dios (Heb. 5:​11-14). Max makgapitsi chuntiya xmakgantaxtiputunkgo Limapakgsin nema xmaxkikanit Moisés. Pero Pablo kalitachuwinalh pi tamakamastan nema kskin Limapakgsin nila makgtuminika kxapa talakgalhin. Wa xlakata nialh xtalakaskin kstalanika uma Limapakgsin. Alistalh, apóstol Pablo kamasiyanilh makgapitsi tuku xaxlikana nema tlakg tuwa. Kamalakapastakalh pi xlakata xtamakamastan Jesús, xkgalhikgo «tlakg xatlan takgalhkgalhin» nema xlikana xʼama kamakgtaya natalakatsuwinikgo Dios (Heb. 7:​18, 19).

5. ¿Tuku talakaskin naʼakgatekgsaw, chu tuku xlakata?

⁵ Pablo kalitachuwinalh kstalaninanin Cristo tiku hebreos xwankgonit pi takaknin nema xmaxkimakgo Jehová tlakg tlan xwanit nixawa la xkakninanikgonit makgasa. Wa pi takaknin nema xmastakgo judíos «kaj xmastilenkg tuku aku xʼama min». Chu wampa: «Pero xaxlikana [...] wa Cristo» (Col.2:17). Xmastilenkg chatum latamat kaj tsinu limasiya la xlikana tasiya uma lataman. Xtachuna la uma, takaknin nema judíos xmaxkikgo Dios makgasa kaj xmastilenkg xwanit tuku aku xʼama min. Lu xlakaskinka naʼakgatekgsaw tuku Jehová lakkaxwilinit xlakata nakakninaniyaw, templo xaʼespiritual. ¿Tuku xlakata? Xlakata uma templo xaʼespiritual tlawa pi nakinkatapatikanan kintalakgalhinkan chu kinkamaxkiyan talakaskin nakakninaniyaw Dios chuna la xla lakaskin. La uku nalichuwinanaw tuku litalakgpali «mastilenkg» (chuna la judíos xkakninanikgo Dios) chu tuku «xaxlikana» (chuna la kstalaninanin Cristo kakninanikgo Dios). Wa xlakata nalakputsananiyaw tuku katsokgnanika hebreos. Chuna tlakg liwana naʼakgatekgsaw tuku templo xaʼespiritual chu la makgtanu kkilatamatkan.

6. ¿La xmaklakaskinkan tabernáculo?

⁶ Xmastilenkg. Pablo maklakaskilh tabernáculo  nema tlawalh Moisés kkata 1512 akxni nina xmin Jesús xlakata nalichuwinan templo xaʼespiritual (kaʼakxilhti dibujo «Xmastilenkg chu tuku xaxlikana»). Israelitas xtamakxtumikgo ktabernáculo xlakata xkakninanikgolh Dios chu xtlawanikgolh tamakamastan (Éx. 29:​43-46). Xlinkgo kaxanikawa niku xʼankgo akxni xlamakgo kdesierto (Éx. 25:​8, 9; Núm. 9:22). Maklakaskinkgolh max 500 kata asta akxni tlawaka templo xalak Jerusalén. Pero tabernáculo na xkilhchanima tuku tlakg tlan xʼamakgo makgamakglhtinankgo kstalaninanin Cristo.

7. ¿Tuku kilhtamaku tsukulh templo xaʼespiritual?

⁷ Tuku xaxlikana. Tabernáculo kaj xmastilenkg xwanit «tuku xalak akgapun» chu xkilhchanima lanka xtemplo Jehová xaʼespiritual. Pablo wa: «Uma tabernáculo kilhchanima tuku anan uku» (Heb. 8:5; 9:9). Wa xlakata, akxni Pablo katsokgnanilh hebreos, templo xaʼespiritual xwija. Tsukulh kkata 29 kkinkilhtamakujkan. Uma kata tamunulh Jesús, lilaksakka espíritu santo chu tsukulh skuja chuna la «sacerdote tiku tlakg kgalhi limapakgsin» anta ktemplo xaʼespiritual (Heb. 4:14; Hech. 10:​37, 38). c

8, 9. Chuna la wan Hebreos 7:​23-27, ¿tuku xlakata Jesucristo, Sacerdote tiku tlakg kgalhi limapakgsin, ni xtachuna sacerdotes xalak Israel?

⁸ Xmastilenkg. Sacerdote tiku tlakg xkgalhi limapakgsin xpalakachuwinan kachikin kxlakatin Dios. Xapulana sacerdote tiku tlakg xkgalhi limapakgsin xalak Israel, wa Aarón. Jehová laksakli akxni tlawakgoka tabernáculo. Pero Pablo wa: «Xlakata sacerdotes nikgolh nila chuntiya tlawakgolh xtaskujutkan, wa xlakata amakgapitsin xlakgxokgokan tawilakgolh chu chuntiya tlawakgolh taskujut» (kalikgalhtawakga Hebreos 7:​23-27). d Nachuna, xlakata umakgolh sacerdotes xkgalhikgo talakgalhin, xtalakaskin pi xtlawakgolh tamakamastan xlakata na xkatapatika xtalakgalhinkan. Pero Jesucristo, Sacerdote tiku tlakg kgalhi limapakgsin, ni xtachuna la umakgolh sacerdotes xalak Israel.

⁹ Tuku xaxlikana. Jesucristo, Sacerdote tiku tlakg kgalhi limapakgsin, «tlawa taskujut […] ktabernáculo nema Jehová lakkaxtlawalh chu ni wa chixku» (Heb. 8:​1, 2). Pablo lichuwinalh pi xlakata Jesús «putum kilhtamaku lama, ni talakaskin pi wi tiku natawila xlakgxokgo». Nachuna, wa pi Jesús «nitu litaxkajwaninit, ni maxkajwaninit talakgalhin» chu «ni talakaskin pi chali chali natlawa tamakamastan» xlakata natapatikan xtalakgalhin chuna la xtlawakgo sacerdotes xalak Israel. ¿Chu tuku tlan nawanaw xlakata pumakamastan chu tamakamastan nema xtlawakan? Kalichuwinaw xamastilenkg chu tuku xaxlikana.

10. ¿Tuku xkilhchanima tamakamastan nema xtlawakan kpumakamastan xacobre?

¹⁰ Xmastilenkg. Kkilhtin niku xlaktanukan ktabernáculo xwi akgtum pumakamastan xacobre niku xmakamaxkikan Jehová animales (Éx. 27:​1, 2; 40:29). Pero umakgolh tamakamastan nila putuminika kxapa xtalakgalhin kachikin (Heb. 10:​1-4). Animales nema xmakamastakan ktabernáculo xkilhchanima tamakamastan nema putuminika xʼama xapa xtalakgalhinkan latamanin.

11. ¿Tuku kilhchanima pumakamastan niku Jesús tamakamastalh? (Hebreos 10:​5-7, 10).

¹¹ Tuku xaxlikana. Jesús xkatsi pi Jehová xmalakgachanit kKatiyatni xlakata xmakamastalh xlatamat chu xkalilakgmaxtulh latamanin (Mat. 20:28). Wa xlakata, akxni tamunulh, Jesús litayalh  pi xʼama tlawa tuku Jehová lakaskin (Juan 6:38; Gál. 1:4). Xtachuna la komo xtamakamastalh kʼakgtum pumakamastan. Uma pumakamastan xkilhchanima «xtalakaskin» Jehová, chu tuku Jehová xlakaskin wa pi xKgawasa xmakamastalh xlatamat nema ni xkgalhi talakgalhin. Jesús «kaj xman makgtum makamastalh [xlatamat] xliputum kilhtamaku» xlakata makgtuminika kxapalh xtalakgalhinkan putum tiku xkanajlanikgolh (kalikgalhtawakga Hebreos 10:​5-7, 10). La uku nalichuwinanaw xpulakni tabernáculo chu tuku xkilhchanima makgapitsi tuku xwilakgo anta.

12. ¿Tiku tlan xtanu kxaSanto chu niku Tlakg xaSanto?

¹² Xmastilenkg. Xpulakni tabernáculo chu templos nema katlawaka alistalh kJerusalén lakxtum xtasiyakgo. Pulaktiy xtapitsikgonit: «XaSanto» chu «Tlakg xaSanto», nema xlitapapitsikgonit akgtum cortina (Heb. 9:​2-5; Éx. 26:​31-33). Anta kxaSanto xwi akgtum limakgskgon xaʼoro, akgtum pumakamastan niku klhkuyukan incienso chu akgtum mesa niku xwilikan kaxtalanchu xla tamakamastan. Kajwatiya «xatalaksakni sacerdotes» tlan xtanukgo kxaSanto xlakata natlawakgo xtaskujutkan (Núm. 3:​3, 7, 10). Anta niku Tlakg xaSanto xwi arca xla talakkaxlan, nema xlitatlawanit oro chu xkilhchanima pi Jehová xkatawi xkachikin (Éx. 25:​21, 22). Kajwatiya sacerdote tiku tlakg xkgalhi limapakgsin tlan xtanu niku Tlakg xaSanto. Kilhtamaku akxni kXapakan Talakgalhin, nema xtlawakan makgtum akgatunu kata, sacerdote tiku tlakg xkgalhi limapakgsin xlin xkgalhni animales niku Tlakg xaSanto xlakata xtapatika xtalakgalhin chu xtalakgalhin kachikin (Lev. 16:​2, 17). Titaxtulh kilhtamaku, Jehová  limaklakaskilh xʼespíritu santo xlakata namasiya tuku xkilhchanima tuku xwi chu tuku xtlawakan ktabernáculo (Heb. 9:​6-8). e

13. ¿Tuku kilhchanima niku xaSanto chu niku Tlakg xaSanto?

¹³ Tuku xaxlikana. Anankgo 144,000 kstalaninanin Cristo tiku kalilaksakkanit espíritu santo chu lu tlan talalinkgo Jehová. Xlakan akxtum nataskujkgo Jesús kʼakgapun chu sacerdotes nalitaxtukgo (Apoc. 1:6; 14:1). Akxni lamakgolhku kKatiyatni, Dios kalilaksaka xʼespíritu chu kamakgamakglhtinan chuna la xkamanan. XaSanto nema xwi ktabernáculo kilhchanima chuna la umakgolh tiku xatalaksakni talalinkgo Dios (Rom. 8:​15-17). Chu Tlakg xaSanto nema xwi ktabernáculo kilhchanima akgapun, niku wi Jehová. «Cortina» nema xlitapapitsi niku xaSanto chu niku Tlakg xaSanto kilhchanima xmakni Jesús. Xtiyatliwa ni xmaxki talakaskin natanu kʼakgapun chu Sacerdote tiku tlakg kgalhi limapakgsin nalitaxtu ktemplo xaʼespiritual. Akxni makamastalh xlatamat xlakata xkalilakgmaxtulh latamanin, xtachuna la komo Jesús xmalakkilh tiji xlakata tiku kalaksakkanit tlan xlatamakgolh kʼakgapun. Xlakata tiku xatalaksakni tlan nalatamakgo kʼakgapun, talakaskin nakalakgpalinikan xmaknikan (Heb. 10:​19, 20; 1 Cor. 15:50). Akxni Jesús xlakastakwananita, tanulh niku Tlakg xaSanto nema wi ktemplo xaʼespiritual, niku xatalaksakni kstalaninanin natatamakxtumikgo alistalh.

14. Chuna la wan Hebreos 9:​12, 24-26, ¿tuku xlakata xtemplo Jehová xaʼespiritual tlakg tlan nixawa tuku xlakkaxwilinit xapulana?

¹⁴ Jehová limaklakaskilh talakgmaxtut xlakata nalakkaxwili la nakakninanikan la uku chu Sacerdote limaxtulh Jesucristo. Xlikana pi uma tlakg tlan nixawa la xkakninanikan xapulana. Niku Tlakg xaSanto niku xtanu sacerdote tiku tlakg xkgalhi limapakgsin xalak Israel latamanin xtlawakgonit, chu xla xtanu anta chu xlin xkgalhni animales. Pero Jesús tanucha niku tlakg xasanto: «kʼakgapun», niku wi Jehová. Anta makamaxkilh Jehová xtapalh xlatamat nema mastalh kimpalakatakan «xlakata xtamakamastan nalimalakgsputu talakgalhin» (kalikgalhtawakga Hebreos 9:​12, 24-26). Xtamakamastan Jesús tlakg lhuwa xtapalh nixawa kaxatukawa tamakamastan chu xapa putuminika kintalakgalhinkan. La uku nalichuwinanaw pi putum akinin, tiku nalatamayaw kʼakgapun o tiku nalatamayaw kKatiyatni, tlan nakakninaniyaw Jehová kxtemplo xaʼespiritual.

15. ¿Tiku kskujkgo kxkilhtin tabernáculo?

¹⁵ Xmastilenkg. Tabernáculo xkgalhi xkilhtin: anta kalakgwan xwanit chu wi tuku xlistiliwilikanit, chu anta kskujkgo sacerdotes. Kkilhtin xwi akgtum lanka pumakamastan xacobre niku xkalhkuyukan tamakamastan. Na anta xwi niku xmujukan chuchut chu xlitatlawanit cobre, anta xmakgachakgankgo sacerdotes akxni nina xmatsukikgo xtaskujutkan (Éx. 30:​17-20; 40:​6-8). Pero templos nema katlawaka alistalh xkgalhi akgtiy kilhtin, xapulana kilhtin wa niku sacerdotes xtlawakgo xtaskujutkan. Chu xliʼakgtiy wa niku xkakninanikgo Dios tiku ni sacerdotes xlitaxtukgo.

16. ¿Tiku skujnanimakgo Jehová kxapulana chu kxliʼakgtiy kxkilhtin templo xaʼespiritual?

¹⁶ Tuku xaxlikana. Xatalaksakni kstalaninanin Cristo tiku lamakgolhku kKatiyatni chu nina sacerdotes litaxtukgo kʼakgapun, skujnimakgo Jehová kxapulana kxkilhtin xtemplo xaʼespiritual. Lanka xputawilh chuchut nema xwi ktabernáculo chu kxkilhtin templo kamalakapastaka umakgolh xatalaksakni, chu putum kstalaninanin Cristo, pi lu xlakaskinka nitu nalixkajwanankgo. ¿Pero niku kakninanikgo Dios «lhuwa latamanin» tiku kamakgtayakgo xatalaksakni  kstalaninanin Cristo? Apóstol Juan akxilhli pi «xyakgolh kxlakatin pumapakgsin» chu xmaxkimakgo Dios «xasanto xtaskujutkan kxtemplo tantaku chu tantaskaka». Lhuwa latamanin chuna tlawamakgo unu kKatiyatni, anta kxliʼakgtiy kxkilhtin templo xaʼespiritual (Apoc. 7:​9, 13-15). ¡Lu tlan pi putum akinin kgalhiyaw niku tlan nakakninaniyaw Jehová kxtemplo xaʼespiritual!

17. ¿Tuku tamakamastan tlan namaxkiyaw Jehová?

¹⁷ Putum kstalaninanin Cristo kgalhiyaw talakgalhaman pi namakamaxkiyaw Jehová tamakamastan. ¿La tlan chuna natlawayaw? Namaklakaskinaw kinkilhtamakujkan, kilitliwakgakan chu tuku lhuwa xtapalh kgalhiyaw xlakata natatayayaw xTamapakgsin. Chuna la kawanilh apóstol Pablo kstalaninanin Cristo tiku hebreos xwankgonit, akinin tlan namalankiyaw Dios akxni «nalichuwinanaw xtukuwani kxlakatinkan latamanin» (Heb. 13:15). Komo naskujnaniyaw Jehová xliputum kinakujkan, nalimasiyayaw pi lu xtapalh liʼakxilhaw pi tlan kakninaniyaw.

18. Chuna la wan Hebreos 10:​22-25, ¿tuku lu kuenta kilitlawatkan, chu tuku putum kilhtamaku kililakapastakatkan?

¹⁸ (Kalikgalhtawakga Hebreos 10:​22-25). Xaʼawatiya tuku lichuwinalh Pablo ktatsokgni nema kamalakgachanilh hebreos, pulaklhuwa tuku lichuwinalh xlakata la kakninaniyaw Dios nema kuenta kilitlawatkan. Akgtum liʼakxilhtit, lichuwinalh pi lu xlakaskinka natlawaniyaw oración Jehová, nakalitachuwinanaw amakgapitsin kintakgalhkgalhinkan, nakatatamakxtumiyaw kinatalankan chu nalamakgpuwantiniyaw kinchatunukan, liwaka xlakata «akxilhmaw pi xkilhtamaku Dios talakatsuwima». Kxaʼawatiya capítulos xla Apocalipsis, chatum xʼángel Jehová wan: «¡Wa Dios kakakninani!». Chu asta makgtiy wan xlakata nalimasiya pi uma lu xlakaskinka (Apoc. 19:10; 22:9). Putum kilhtamaku kalakapastakwi tuku katsininitaw xlakata xtemplo Jehová xaʼespiritual chu talakgalhaman nema kgalhiyaw pi tlan kakninaniyaw.