1. Ngirozi irikubhuyei, uye ngei izvona zvecikosha katiri?

 KANA ngirozi ikareketa na imwimwi maizopurutana zvairikuda kubhuya here? Nyamasi uno, pano ngirozi irikubvunza “madzinza, mireketero uye anhu ese.” Asi iyona irikubhuyei? Irikubhuya kuti: “Ithyai Mwari uye mukudzei . . . Namatai Uya akasika denga no nyika.” (Zvak. 14:6, 7) Djehovha ndiye ega Mwari wecokwadi wekuti anhu ese anodikana kumunamata. Isusu tinotenda maningi ngekuti iyena akatipasa mukana wekumunamata mu tempro yake huru ye ku mwiya!

2. Cinyi cinozwi tempro ye ku mwiya ya Djehovha? (Onai bhokisi rakazwi: “ Zvisikazi Kuita Tempro.”)

² Cinyi cinozwi tempro ye ku mwiya, uye ngakupi katingaona masoko akadzara nge zvayo? Tempro ye ku mwiya ainyumbapi kamare. Tempro ye ku mwiya inotsamira pa zvese zvakaizwa na Djehovha eciseenzesa cibairo ca Djesu kuitira kuti anhu akwanise kumunamata. Muphostori Pauro wakanyasa kupanganidza izvi pa tsamba yaakatarira Akristu e Cihebheru aigara ku Djudhiya. b

3-4. Pauro wakasanangura kutara tsamba ku Ahebheru nge cinangwa cipi, uye iyena wakaitei kuti aabetsere?

³ Ngei Pauro wakatarira tsamba Akristu e Cihebheru aigara ku Djudhiya? Pamweni wakaita izvona nge zvikonzero zviiri zvinokosha. Cokutanga, kuti aabambise. Akawanda akhona ainga akarerhwa ku nharunda ye Cidjudha. Atungamiriri awo e kare aiashora ngekuti awona ainga agara Akristu. Ngei? Ngekuti Akristu ainga asina tempro yekuti anamate Djehovha. Awona ainga  asina tempro kamare kana kuti apristi kuti apire zvibairo kuna Mwari. Pamweni izvona zvakaita kuti Akristu adzirhye mwoyo uye zvorembesa kutenda kawo. (Aheb. 2:1; 3:12, 14) Amweni awo pamweni akagara no cido cekuhwirira ku Djudha.

⁴ Cocipiri, ngecekuti Pauro waida kukohomedzesa Akristu e Cihebheru kuti apete masimba kuti azwisise cokwadi cipsva uye cakadzika, kana kuti “zvekurhya zvakakora” zvatinoona mu Soko ra Mwari. (Aheb. 5:11-14) Zvinoita hingana kuti Ahebheru amweni ainga acakabatisisa Mutemo wa Mozesi. Asi Pauro wakapanganidza kuti zvibairo zvaikumbirhwa ngo Mutemo zvainga zvisikacaseenzi pakupfudza zvitema. Ndiyo ndaa, Mutemo wainga “usikacaseenzi.” Hino Pauro wainga aakufundisa cokwadi ici cakadzika. Iyena wakaaedzurira kuti “kariro ye zvirokwazvo” ye rusudzunuro ra Djesu ndiyo yaizokwanisa kuabetsera kuti akhwedere “dhuze na Mwari.”—Aheb. 7:18, 19.

5. Tinodikana kuzwisisei mu bhuku ra Ahebheru, uye ngei?

⁵ Pauro wakapanganidzira hama dze Cihebheru kuti kunamata ke Cikristu kainga kakakhwirira kupinda kunamata kaaita kare. Zvaaiita kuti anamate Djehovha maererano no Mutemo wa Mozesi “zvinopangidza zviro zvinozouya, asi cokwadi kamare cina Kristu.” (Ako. 2:17) Bvute ro ciro rinopangidza mushobo wakaita ciro, haiwa ciroco. Ngo mushobo umwewo, mushobo wainamata Adjudha kare wainga wakaita hingana bvute, ngekuti zvino awona aizonamata Djehovha ngo mushobo wakanaka. Isusu tinodikana kunyasa kuzwisisa zvese zvakaizwa na Djehovha kuti zvitema zvedu zvirekererhwe uye kuti tikwanise kumunamata ngo mushobo waanoda. Mu fundo ino, ticaezanisa “bvute” (kana kuti mushobo wainamata Adjudha kare) no “zvirikuizwa mazuwa ano” (kana kuti mushobo unonamata Akristu mazuwa ano) maererano no zvinopanganidzwa pana Ahebheru. Ngo kuita izvona, ticakwanisa kuzwisisa mushobo wakaita tempro ye ku mwiya uye kukosha kainoita katiri.

6. Tabhernakuro yaiseenzeswa kudini?

⁶ Mushobo wainamata Adjudha. Pauro wakaseenzesa tabhernakuro yakawakwa ndi Mozesi muna 1512 K.A.A., kuti apanganidze ngezve tempro ye ku mwiya. (Onai bhokisi rakazwi “Mushobo Wainamata Adjudha—Mushobo Unonamata Akristu.”) Tabhernakuro cainga ciri ciro cakaita hingana tenda cekuti  Aisraeri paaithutha aikwanisa kucithwara kubuda ku mbuto yaainga ari kuti aende ku mbuto imweni. Iyona yakakwanisa kuseenzeswa ke makore anodarika 500 dakara tempro yawakwa ku Djerusarema. (Eki. 25:8, 9; Num. 9:22) Tabhernakuro, kana kuti “tenda re kuunganira” yainga iri mbuto yekuti Aisraeri aikwanisa kuungana kuti anamate Mwari uye apire zvibairo. (Eki. 29:43-46) Asi tabhernakuro yaiimirirawo ciro cakanaka maningi cekuti Djehovha aizopasa Akristu.

7. Tempro ye ku mwiya yakatanga kuoneka rini?

⁷ Mushobo unonamata Akristu. Tabhernakuro ye kare yainga iri “bvute ro zviro zve kudenga,” uye yaiimirira tempro huru ye ku mwiya ya Djehovha. Pauro wakabhuya kuti “tenda iyona [kana kuti tabhernakuro] ndiyona muezaniso we nguwa ino.” (Aheb. 8:5; 9:9) Hino mu nguwa yaakatarira Akristu e Cihebheru, tempro ye ku mwiya yainga yataayo kamare ku Akristu. Iyona yakatanga kuoneka mu gore ra 29 K.A. Mugore irona, Djesu akabhabhatidzwa, akadzodzwa no mwiya mucena uye akatanga kuseenza hinga “mupristi mukuru” wa Djehovha mu tempro ye ku mwiya. c—Aheb. 4:14; Zvii. 10:37, 38.

8-9. Maererano na Ahebheru 7:23-27, musiyano upi uripo pakati pe mupristi we Ciisraeri no Mupristi Mukuru, Djesu Kristu?

⁸ Mushobo wainamata Adjudha. Mupristi mukuru waiimirira anhu pamberi pa Mwari. Mupristi mukuru wekutanga we Aisraeri wainga ari Aroni, uye iyena wakagadzwa na Djehovha tabhernakuro payakadimurhwa. Asi hinga zvakapanganidzwa na Pauro, “zvaidikana kuti paoneke apristi akawanda kuti atsiye amweni ainga afa, ngokuti rufu raiaita kuti asarumbwe eciseenza.” d (Erengai Ahebheru 7:23-27.) Hino ngekuti ainga ari anhu asikazi kukwana, awona aidikana kupira zvibairo kuitira zvitema zvawo. Apa isusu tinoona musiyano wainga uripo pakati pe apristi akuru e Aisraeri no Mupristi Mukuru, Djesu Kristu.

⁹ Mushobo unonamata Akristu. Hinga Mupristi Mukuru, Djesu Kristu ndi “museenzi . . . we mu tenda re cokwadi, rakaimiswa na Djehovha, haiwa nge munhu.” (Aheb. 8:1, 2) Pauro wakapanganidza eciti: “Ngokuti [Djesu] anogara ari mupenyu nguwa dzese, apana anomutsiya pa upristi wake.” Pauro wakabhuyawo kuti Djesu aazi “kusvipiswa, akaparadzaniswa no ashaishi” uye mukusiyana no apristi akuru e Israeri, “iyena aadikani kupasa mipiro mazuwa ese” kuitira zvitema zvake. Parizvino, ngationei musiyano uripo pakati pe artari no zvibairo zve mu nguwa ye Adjudha uye zve mu nguwa ye Akristu.

10. Zvibairo zve pa artari ye kobre zvaipangidzei?

¹⁰ Mushobo wainamata Adjudha. Ngo dii re kunza pa musuwo we tabhernakuro kainga kuno artari ye kobre yaipirhwa zvibairo ye zvinyama kuna Djehovha. (Eki. 27:1, 2; 40:29) Asi, zvibairo izvi zvainga zvisikaiti kuti anhu arekererhwe nge mushobo wakakwana zvitema zvawo. (Aheb. 10:1-4) Zvibairo izvi zve zvinyama mu tabhernakuro zvaiizwa nguwa dzese uye zvaiizirhwa kuti zvipangidze kuti mune ramangwana kaizooneka cibairo cimwe basi caizosudzunura anhu ese pa citema.

11. Djesu akapasa upenyu wake hinga cibairo pa artari ipi? (Ahebheru 10:5-7, 10)

 ¹¹ Mushobo unonamata Akristu. Djesu aiziya kuti iyena ainga atumwa pa nyika na Djehovha kuti apase upenyu wake wakakwana hingana cibairo ce rusudzunuro ku anhu. (Mat. 20:28) Hino pa rubhabhatidzo rake, Djesu akadzipira kuti aite zvaidiwa na Djehovha. (Juau 6:38; Aga. 1:4) Djesu akapasa upenyu wake pa artari yekuezanisira, haiwa pa artari kamare. Artari iyona inoimirira “kuda” ka Djehovha. Kuda ka Djehovha kainga kekuti Mwana wake apase upenyu wake wakakwana hingana munhu we nyama. Djesu akapasa upenyu wake “kamwe basi nokusikaperi” kuti afukidze zvitema kamwe basi zve aya ese anopangidza kutenda maari. (Erengai Ahebheru 10:5-7, 10.) Zvino, ngatione kuti matii ari mukati me tempro anoimirirei.

12. Ndiani waidikana kupinda mu mbuto Cena uye mu mbuto Yakacenesesa?

¹² Mushobo wainamata Adjudha. Tabhernakuro uye tempro dzakawakwa ku Djerusarema dzainga dzakaezana ngo mukati. Mukati mayo mainga muno matii mairi—“mbuto Cena” uye “mbuto Yakacenesesa”—dzainga dzakasiyaniswa no kortina. (Aheb. 9:2-5; Eki. 26:31-33) Mukati me mbuto Cena mainga muno kandiyero ye oro, artari yekupisira ruseenzi, meza uye no pau dzo kupira. “Apristi akadzodzwa” basi ndiwo aidikana kupinda mu mbuto Cena kuti aite basa rawo cena. (Num. 3:3, 7, 10) Mu mbuto Yakacenesesa mainga muno areka ye citenderano yakatsurutsuthwa no oro matii ese. Iyona yaiimirira kuoneka ka Djehovha. (Eki. 25:21, 22) Mupristi mukuru basi ndiye ainga ano citenderhwa cekupinda ngo pa kortina uye oenda mu mbuto Yakacenesesa kamwe basi pa gore pa Zuwa re Kurekerera. (Rev. 16:2, 17) Iyena waipinda no ngazi ye zvinyama mu makore ese kuti arekererhwe zvitema zvake kamare uye zvitema zve dzinza rese. No kuhamba ke nguwa, Djehovha eciseenzesa mwiya wake mucena,  akapangidza pamhene kuti matii mairi aya e tabhernakuro aireyei kamare.—Aheb. 9:6-8. e

13. Mbuto Cena uye mbuto Yakacenesesa ye mu tabhernakuro inomirirei ku Akristu?

¹³ Mushobo unonamata Akristu. Akristu anganani akasanangurhwa arikudzodzwa no mwiya mucena uye nge ndaa yazvo awona ano ukama unokosha na Djehovha. Hama idzi dzinokwana kuita 144 000 dzicaseenza hinga apristi kudenga pamwepo na Djesu. (Zvak. 1:6; 14:1) Mbuto Cena ye mu tabhernakuro inoimirira mbuto yawo hingana ana akasanangurhwa na Mwari aciri pa nyika. (Aro. 8:15-17) Mbuto Yakacenesesa ye mu tabhernakuro inoimirira kudenga kuna Djehovha. “Kortina” yaisiyanisa mbuto Cena no mbuto Yakacenesesa inoimirira mwiri wa Djesu. Paainga ari pa nyika pano, iyena ainga ano mwiri we nyama, ngekudaro, ainga asikakwanisi kukwira kudenga kuti agare Mupristi Mukuru we tempro ye ku mwiya. Paakapasa upenyu wake hingana cibairo, Djesu akafunungura mukana kuti Akristu ese akadzodzwa akwanise kurarama upenyu wawo kudenga. Kuitawo hingana Djesu, Akristu akadzodzwa anodikana kusiyawo mwiri wawo we nyama kuti akwanise kutambira makomborero awo e kudenga kupasa upenyu wawo. (Aheb. 10:19, 20; 1 Ako. 15:50) Mumasure mekuti Djesu amutswa, iyena akapinda mu mbuto Yakacenesesa ye tempro ye ku mwiya, kana kuti kudenga mu mbuto yekuti anhu ese akadzodzwa acabatana pamwepo naye mu nguwa inoteera.

14. Maererano na Ahebheru 9:12, 24-26, ngei kunamata Djehovha mu tempro ye ku mwiya kakakhwirira kupinda kunamata kaiita Adjudha?

¹⁴ Kunamata kakacena ka Djehovha kunobva pa rusudzunuro rakaizwa na Djesu Kristu uye pa basa rake hingana Mupristi Mukuru. Zviri pamhene kuti mushobo uu wekunamata unopinda mushobo wainamathwa Djehovha nge Adjudha kare. Mupristi mukuru we Israeri waipinda no ngazi ye zvibairo zve zvinyama mu mbuto Yakacenesesa, mbuto yainga yakagadzirhwa nge anhu. Asi Djesu “akapinda kudenga,” mbuto cena kupinda dzese kuti adzipangidze pamberi pa Djehovha. Paakapasa upenyu wake wakakwana nge ndaa yedu, Djesu ainga ano citenderhwa cekuti “afudze citema eciseenzesa cibairo cake kamare.” (Erengai Ahebheru 9:12, 24-26.) Mumasure me cibairo ca Djesu painga pasikadikanizve cibairo cipi haco kuti zvitema zvirekererhwe. Hinga zvaticaona, azvinei nokuti kariro yedu ngeye kurarama kudenga kana kuti pa nyika, tese isusu tinokwanisa kunamata Djehovha mu tempro yake ye ku mwiya.

15. Ndiani waiseenza pa ruwanze re tabhernakuro?

¹⁵ Mushobo wainamata Adjudha. Tabhernakuro yainga ino ruwanze. Ruwanze irona rainga rakakura, rakadziirirhwa uye apristi aikwanisa kuita basa rawo ipona. Artari ye kobre yekupira cibairo cakapiswa yaigara pa ruwanzepo pamwepo no basiya ro kobre rakadzara no mvura yaiseenzeswa no apristi kuti adzicenese asati aita basa rawo cena. (Eki. 30:17-20; 40:6-8) Tempro dzakazowakwa dzaingawo dzino ruwanze kunza, kuitira kuti aya ainga asiripi apristi akwanisewo kunamata Djehovha ari ipona.

16. Ndiani unoseenza pa ruwanze re mukati uye ndiani unoseenza pa ruwanze re kunza re tempro ye ku mwiya?

¹⁶ Mushobo unonamata Akristu. Asati aenda koseenza kudenga hinga apristi pamwepo na Djesu, akadzodzwa aciri pa nyika arikuseenzera Djehovha akatendeka, kana kuti, mu ruwanze re mukati ro tempro ye ku mwiya. Basiya rakakura rino mvura riri pa ruwanze, i ciedzuriro cekuti Akristu akadzodzwa pamwepo no Akristu ese anodikana kurumbwa akacena pa marangariro awo uye maitiro awo e ku mwiya. Hino  “anhu akawanda maningi” arikubetsera akatendeka hama dza Kristu dzakadzodzwa arikunamata kupi Djehovha? Muphostori Juau wakaona grupo rakakura “rakaima pamberi pe cigaro ce umambo,” mu tempro kamare zvecida kureya ruwanze re kunza, umo “maanoitira [Mwari] basa rakacena usiku no masikati mu tempro yake.” (Zvak. 7:9, 13-15) Isusu tinokoshesa maningi makomborero atakapaswa na Djehovha e kumunamata ngo mushobo wakacena mu tempro yake huru ye ku mwiya!

17. Zvibairo zvipi zvatino makomborero e kupasa Djehovha?

¹⁷ Nyamasi uno, Akristu ese ano makomborero e kupasa cibairo kuna Djehovha eciseenzesa nguwa, simba uye zviro zvawo kuti atsigire zvese zvirikuizwa no Umambo wa Mwari. Hinga zvakarekethwa no muphostori Pauro ku Akristu e Cihebheru, isusu “tingagara tecipasa Mwari cibairo ce kumukudza, kureya cibereko ce miromo yedu inoziisa pamhene zina rake.” (Aheb. 13:15) Isusu tingapangidza kuti tinokoshesa maningi makomborero aya patinonamata Djehovha tecimupasa zvakanakisisa zvedu.

18. Maererano na Ahebheru 10:22-25, zviro zvipi zvatinodikana kuita nguwa dzese uye ngazvipi zvatisikambodikani kukanganwa?

¹⁸ Erengai Ahebheru 10:22-25. Mu tsamba yake yekupedzesera yaakatumira Ahebheru, Pauro wakareketa zviro zvakawanda zvatinodikana kuita kuti tinamate Djehovha. Zviro izvona zvinobatanidza kuita munamato nguwa dzese kuna Djehovha, kuparidzira anhu amweni ngezve kariro yedu, kupinda misangano no ungano uye kubambisana “maka-maka [teciona] zuwa ra [Djehovha] recikhwedera.” Mu bhuku ra Zvakapangidzwa tinoerenga ngezve ngirozi ya Djehovha yakabhuya kuti: “Namatai Mwari!” Iyona yakabhuya izvona kairi kese kuti ipangidze kuti i ciro cinokosha maningi. (Zvak. 19:10; 22:9) Isusu atidi kukanganwa zvese zvatiri kufunda ngezve tempro huru ye ku mwiya uye ngezve cikomborero cinoshamisa catinaco cekunamata Mwari wedu mukuru Djehovha!