1. Мар вера кылчин но мае возьмато солэн кылъёсыз?

 ТӤЛЕДЛЫ кылчин вазиськысал ке, тӥ сое кылзысалды-а? Асьме нуналъёсы кылчин «вань выжыослы, пӧртэм кылын вераськисьёслы, калыкъёслы» вазиське. Мар со вера? «Инмарлэсь кышкалэ, Сое данъялэ... Инмез но музъемез, зарезез но, ву потонъёсты но Кылдытӥсьлы йыбырттэ» (Усьт. 14:6, 7). Иегова гинэ — зэмос Инмар. Соин ик котькин солы гинэ йыбыртъяны кулэ. Ми туж тау кариськомы Иеговалы, быдӟым духовной храмаз йыбыртъяны быгатӥськомы шуыса!

2. Мар со сыӵе Иеговалэн духовной храмез? (Озьы ик учке  «Маин сурано ӧвӧл духовной храмез» рамкаез.)

² Мае возьматэ духовной храм но кытысь со сярысь тросгес тодыны луэ? Духовной храм — со кыӵе ке юрт ӧвӧл. Со Иеговалы йыбыртъян амал, кудзэ со ярамонэн лыдъя. Ми озьы йыбыртъяны быгатӥськомы, Иисус Христослэн мозмытӥсь курбонэзлы луыса гинэ. Та храм сярысь гожтӥз апостол Павел еврей калыкысь христианъёслы, кудъёсыз Иудеяын улӥзы b.

3, 4. Малы Павел Иудеяысь христианъёс сярысь сюлмаськиз но кызьы со соослы юрттӥз?

³ Малы Павел Иудеяысь христианъёслы гожтэтсэ гожтӥз?  Нырысетӥез муг — солэн соослэсь мылкыдзэс ӝутэмез потэ вал. Азьло, Инмарлы йыбыртъян понна, соос храме ветлӥзы, курбонъёс вайылӥзы, озьы ик соослэн священникъёссы вал. Нош христианъёс луэмзы бере религиозной кивалтӥсьёс соосты серем каро вал, вылды, табере соослэн номырзы ӧвӧл шуыса. Соин христианъёслэн мылкыдзы куашканы но осконзы лябӟыны быгатэ вал (Евр. 2:1; 3:12, 14). Оло нош, куд-огъёсызлэн малпанзы кылдылӥз Инмарлы азьло сямен йыбыртъяны.

⁴ Кыкетӥез муг — Павел адӟиз, вын-агайёс но сузэр-апайёс Инмарлэн Кылысьтыз мур но выль зэмлыкъёсты валаны уг тыршо шуыса (Евр. 5:11—14). Куд-огъёсыз Моисейлэн законэзъя уло на вал, луоз. Нош Павел валэктӥз, Законъя ваёно курбонъёс адямиосты сьӧлыкъёслэсь быдэсак мозмытыны уг быгато шуыса. Соин ик Моисейлэн законэз воштэмын вал. Собере Павел мур зэмлыкъёсты валэктӥз. Со христианъёслы тодазы вайытӥз «ӟечгес оскиськон» сярысь, кудзэ Иисус Христослэн курбонэз вае но кудӥз Инмарлы матэ кариськыны юрттэ (Евр. 7:18, 19).

5. Мар сярысь милемлы тросгес тодоно но малы?

⁵ Павел вын-агайёсызлы валэктӥз, азьвыл сямен Инмарлы йыбыртъямзы «вуонолэн-лыктонолэн вужерез гинэ» вал шуыса. Нош со, кызьы соос али Инмарлы йыбыртъяло, трослы умойгес шуыса (Кол. 2:17). Адямилэн вужерезъя солэсь тусбуйзэ валаны уг луы. Еврейёслэсь вашкала дыръя Инмарлы йыбыртъямзэс вужерен ӵошатыны луэ, нош выль йыбырттон амалэз — асэныз адямиен. Выль йыбырттон амалэз, яке духовной храмез, Иегова тупатӥз, сьӧлыкъёсмы простить каремын мед луозы но ми Инмарлы солы ярамон амалэн йыбыртъяны мед быгатомы шуыса. Соин ик милемлы духовной храм сярысь тросгес тодоно. Ойдолэ ӵошатомы сое, кызьы еврейёс вашкала дыръя Инмарлы йыбыртъязы, соин, кызьы христианъёс солы йыбыртъяло. Озьы ми умойгес валаломы, мар со сыӵе  духовной храм но кызьы со милемын герӟаськемын.

6. Мар каро вал скинияын?

⁶ Еврейёслэн йыбыртъямзы. Апостол Павел Иеговалэсь духовной храмзэ ӵошатӥз скинияен, кудзэ пуктӥз Моисей асьме вакытлэсь азьло 1512-тӥ арын. (Учке «Еврейёслэн йыбыртъямзы. Христианъёслэн йыбыртъямзы» схемаез.) Интыысь интые ветлыкуз, израиль калык та скинияез сьӧраз нуллӥз. Еврейёс отын Инмарлы йыбыртъязы но курбонъёс вайылӥзы 500 ар ӵоже, Иерусалимын храмез пуктытозь (Пот. 25:8, 9; 29:43—46; Лыд. 9:22).

7. Ку кылдӥз духовной храм?

⁷ Христианъёслэн йыбыртъямзы. Вашкала скиния «инмысь скиниялэн вужерез» вал. Павеллэн верамезъя, со возьматэ сое, мар али вань,— Иеговалэсь быдӟым духовной храмзэ (Евр. 8:5; 9:9, ВД). Озьыен, куке Павел Еврейёслы гожтэтсэ гожъяз, духовной храм вал ини. Со кылдӥз асьме вакытысь 29-тӥ арын. Со арын Иисус пылатӥськиз, святой духен зырӟемын вал но Иеговалэн духовной храмаз Быдӟым священник луыса ужаны-тыршыны кутскиз (Евр. 4:14; Ап. уж. 10:37, 38) c.

8, 9. Маин Израильысь быдӟым священникъёс пӧртэм вал милям Быдӟым священникмылэсь, Иисус Христослэсь? (Еврейёслы 7:23—27).

⁸ Еврейёслэн йыбыртъямзы. Быдӟым священникъёс калыклы юртто вал Инмарен умой кусыпъёс возьыны. Нырысетӥез быдӟым священник, Аарон, ужаны-тыршыны кутскиз, куке скиния усьтэмын вал. Но, кызьы валэктӥз Павел, «священникъёс трос вал, малы ке шуоно одӥг муртлы священникын кема возиськыны кулон маза ӧз сётылы» d. (Лыдӟе Еврейёслы 7:23—27.) Со быдӟым священникъёс сьӧлыкоесь вал. Соин ик асьсэлэн сьӧлыкъёссы понна курбонъёс вайылӥзы. Нош Иисус Христослы сое лэсьтоно ӧй вал.

⁹ Христианъёслэн йыбыртъямзы. Иисус Христос Быдӟым священникмы ужа-тырше «зэмос скинияын», кудзэ «адями ӧз, Кузё-Инмар пуктӥз-ӝутӥз» (Евр. 8:1, 2). Павел валэктӥз, Иисус «пумтэм вапумъёс ӵоже улӥсь, священник луонэз но Солэн пумтэм вапумъёс ӵоже улэ» шуыса. Озьы ик со ватсаз, Иисус дун-шектэм, «сьӧлыкоослэсь висъямын» шуыса. Со сяна, Израильысь быдӟым священникъёслы кадь, Иисуслы «нуналлы быдэ... аслаз сьӧлыкъёсыз понна... курбон сётыны кулэ ӧвӧл». Нош табере ӵошатомы еврейёслэсь но христианъёслэсь курбон сётон ӝӧкъёссэс но курбонъёссэс.

10. Мае возьмато вал курбонъёс, кудъёссэ еврейёс ыргонлэсь лэсьтэм курбон сётон ӝӧк вылын вайылӥзы?

¹⁰ Еврейёслэн йыбыртъямзы. Скиния азьын сылэ вал ыргонлэсь лэсьтэм курбон сётон ӝӧк. Со вылын пудо-животъёсты курбонлы вайылӥзы (Пот. 27:1, 2; 40:29). Но со курбонъёс адямиосты сьӧлыкъёссылэсь быдэсак мозмытыны уг быгато вал (Евр. 10:1—4). Курбонъёс,  кудъёссэ скинияын вайылӥзы, возьмато вал, азьланяз курбон ваемын луоз шуыса, кудӥз адямиосты сьӧлыкъёссылэсь быдэсак мозмытоз.

11. Кыӵе курбон сётон ӝӧк вылын Иисус ассэ курбонлы вайиз? (Еврейёслы 10:5—7, 10).

¹¹ Христианъёслэн йыбыртъямзы. Иегова Иисусэз музъем вылэ ыстӥз, со тырбыдэс улонзэ адямиос понна мед сётоз шуыса (Матф. 20:28). Пылатӥськеменыз Иисус возьматӥз, Иеговалэсь эриксэ быдэстыны дась шуыса (Иоанн 6:38; Гал. 1:4). Инмарлэсь эриксэ ӵошатыны луэ курбон сётон ӝӧкен, кудӥз вылын Иисус кулӥз. Аслэсьтыз улонзэ одӥг пол сётыса, Иисус солы оскись адямиосты сьӧлыкъёссылэсь быдэсак мозмытӥз. (Лыдӟе Еврейёслы 10:5—7, 10.) Нош али ойдолэ тодомы, мар скиния пушкын вал.

12. Кин пыраны быгатэ вал скинияе?

¹² Еврейёслэн йыбыртъямзы. Скиния но Иерусалимын берлогес пуктэм храмъёс пуш ласянь ог-огзылы кельшо вал. Пушказы кык люкет вал: Святой инты но Святойлэсь но святой инты. Соос вискы катанчи ошемын вал (Евр. 9:2—5; Пот. 26:31—33). Святой интыын пуктэмын вал зарни лампада, фимиамез сутон ӝӧк но вӧсям нянез тырон ӝӧк. Отчы «вӧйын зырӟыса пуктэм... священникъёс» гинэ пыраны быгато вал (Лыд. 3:3, 7, 10). Святойлэсь но святой интыын сылэ вал  сӥзён-косонэн зарни ковчег, кудӥз возьматэ вал, Иегова отын шуыса (Пот. 25:21, 22). Отчы араз огпол, Чылкытатӥськон-сузяськон нуналэ, быдӟым священниклы гинэ пыраны яра вал (Лев. 16:2, 17). Арысь аре быдӟым священник отчы пыра вал аслаз сьӧлыкъёсыз понна но калыклэн сьӧлыкъёсыз понна ваем пудолэн вирыныз. Дыр ортчыса, Иегова ужась-тыршисьёсызлы возьматӥз, мае возьмато скиниялэн люкетъёсыз (Евр. 9:6—8) e.

13. Мае возьмато Святой инты но Святойлэсь но святой инты?

¹³ Христианъёслэн йыбыртъямзы. 144000 зырӟем христианъёс Иисусэн ӵош инмын священникъёс луозы (Усьт. 1:6; 14:1). Музъем вылын улонзы дыръя Инмар соосты святой духеныз зырӟе но, соос солэн пиосыз луо. Вераны луоз, музъем вылын улыкузы, соос духовной храмлэн Святой интыяз шуыса (Рим. 8:15—17). Святойлэсь но святой инты возьматэ инмез, кытын улэ Иегова. Катанчи, кудӥз Святой инты но Святойлэсь но святой инты вискы ошемын вал, возьматэ Иисуслэсь мугорзэ. Музъем вылын адями кадь улыкуз, со инме ӝутскыны уг быгаты вал. Нош мугорзэ курбонлы сётэмез бере Иисус инме ӝутскиз но вань зырӟем христианъёслы инмын улон понна сюрес усьтӥз. Инмын улон понна, соослы но мугоръёссэс кельтыны кулэ (1 Кор. 15:50; Евр. 10:19, 20). Улӟемез бере Иисус духовной храмлэн Святойлэсь но святой интыяз пыриз. Пумен вань зырӟем христианъёс но отчы пырозы.

14. Малы йыбыртъян амал, кудзэ Иегова туннэ ярамонэн лыдъя, вашкала йыбыртъян амаллэсь умойгес? (Еврейёслы 9:12, 24—26).

¹⁴ Ми адӟимы, йыбырттон амал, кудзэ туннэ Иегова ярамонэн лыдъя, трослы умойгес шуыса. Израильысь быдӟым священник адями киын лэсьтэм Святойлэсь но святой интые пудолэн вирыныз пыра вал. Нош Иисус самой святой интые, инме, ӝутӥськиз Иегова азе султыны. Отын, «сьӧлыкъёсты быдтон понна», со тырбыдэс адями кадь улыны правозэ Инмарлы сётӥз. (Лыдӟе Еврейёслы 9:12, 24—26.) Иисуслэн курбонэз сьӧлыкъёслэсь пырак ӵожелы мозмытэ. Азьланяз ми тодомы, инмын но, музъем вылын но улӥсьёс Иеговалэн духовной храмаз йыбыртъяны быгато шуыса.

15. Кин ужаз-тыршиз скиниялэн азбараз?

¹⁵ Еврейёслэн йыбыртъямзы. Скиния котыр азбар лэсьтэмын вал. Со азбарын священникъёс ужазы-тыршизы. Отын пуктэмын вал ыргонлэсь лэсьтэм тылын сутӥськись курбон сётон ӝӧк но ыргонлэсь мисьтӥськон, кудӥз вуэн тырмытэмын вал. Отысь вуэн священникъёс мисьтӥськизы соослы оскем ужез быдэстэмзылэсь азьло (Пот. 30:17—20; 40:6—8). Берлогес пуктэм храмъёсын педпал азбарзы но вал. Отын мукет адямиос но Инмарлы йыбыртъяны быгатӥзы.

16. Кин ужа-тырше духовной храмлэн пуш азбараз, нош кин — педпал азбараз?

¹⁶ Христианъёслэн йыбыртъямзы. Зырӟем христианъёс Иисусэн ӵош инмын священникъёс луыса ужалозы-тыршозы. Но инме ӝутскемзылэсь азьло соос духовной храмлэн пуш азбараз ужало-тыршо.  Вуэн тырмытэм бадӟым мисьтӥськон соослы но, милемлы но тодамы вайытэ, милемлы Иеговалы гинэ йыбыртъяно но солэн вылӥ эсэпъёсызъя улоно шуыса. Нош кытын Инмарлы ужа-тырше «туж-туж трос калык», кудӥз Иисуслэн зырӟем вынъёсызлы юрттӥське? Апостол Иоанн адӟиз, соос «престол азьын... сыло», яке духовной храмлэн педпал азбараз «уй но нунал... [Инмарлы] служить каро» шуыса (Усьт. 7:9, 13—15). Ми туж тау кариськомы Иеговалы, со милемлы быдӟым духовной храмаз солы йыбыртъяны лэзиз шуыса!

17. Кыӵе курбонъёс ми Иеговалы вайыны быгатӥськомы?

¹⁷ Туннэ вань христианъёслы бадӟым дан сётэмын Иеговалы курбонъёс вайылыны. Кылсярысь, ми солы сётыны быгатӥськомы дырмес, кужыммес но коньдонмес. Со сяна, Павел вераз, мае ми эшшо сётыны быгатӥськомы на. Со шуиз: «Инмарлы дугдылытэк ушъян-данъян курбон вайыломе,— ымысьтымы потӥсь Солэсь нимзэ данъясь емышез» (Евр. 13:15). Иеговалы самой умойзэ сётыса, ми возьматомы, солы йыбыртъяны луонлыкез дунъяськомы шуыса.

18. Мар сярысь милемлы ноку вунэтыны уг яра? (Еврейёслы 10:22—25).

¹⁸ Лыдӟе Еврейёслы 10:22—25. Еврейёслы гожтэтэзлэн пумаз Павел вера, мар сярысь милемлы ноку вунэтыны уг яра. Кылсярысь, со вера вӧсяськон, тодытон уж, кенешлэн пумиськонъёсыз но ог-огмылы юрттӥськон сярысь. Инмарлэн «нуналэзлэсь матэгес вуэмзэ» шӧдыса, милемлы эшшо но зол тыршоно та ужъёсты быдэсъяны. Усьтӥськон книгалэн пумаз Иеговалэн кылчинэз кык пол вера: «Инмарлы йыбыртты» (Усьт. 19:10; 22:9). Та кылъёсты кылчин кык пол вераз бере, соослэсь кылзӥськыны туж кулэ. Ойдолэ котьку тодамы возёмы Иеговалэн быдӟым духовной храмез сярысь мур зэмлыкъёсты но Инмарлы ужаны-тыршыны луонлыкез дунъяломы!