El mana amo el comon comida del maga Israelita adentro de 40 año cuando talla sila na desierto. (Ex. 16:35) Ya dale tambien si Jehova pugo na dos ocasion. (Ex. 16:12, 13; Num. 11:31) Pero, tiene tambien otro maga comida que ya come el maga Israelita.

Por ejemplo, tiene maga tiempo, ya guia si Jehova con el de suyu maga siervo para na “un lugar onde sila puede descanza” donde tiene agua para toma y comida para come. (Num. 10:33) Uno na aquel maga lugar amo el Elim, “donde tiene 12 tuburan de agua y 70 pono de palma.” (Ex. 15:27) El libro Plants of the Bible ta habla que el fruta del palma que “ta crici na manada diferente lugar amo el de con todo comon comida na desierto. Por causa na pono de palma, tiene comida, aceite y lugar onde esta el millones de maga gente.”

Posible, ya descanza tambien el maga Israelita na un grande lugar que ta llama ahora como Feiran que parte del Wadi Feiran. a Este wadi que “81 milla [130 km] el largor amo el uno na de con todo largo, bonito y conocido wadi na Sinai,” ta habla el libro Discovering the World of the Bible. El libro ya habla tambien que si tiene quien viaja por 28 milla [45 km] estaba na lugar onde el wadi tan encuentro na mar, hay llega le na Feiran Oasis. Este lugar amo maga 2,000 feet [610 m] above sea level y 3 milla [4.8 km] el largor. Bien manada gayot pono de palma aqui y bien bonito poreso ya compara con este na jardin de Eden. Por miles de maga año, manada gente el ta anda aqui por causa na manada maga fruta de palma.

Cuando ya sale sila na Egipto, el maga Israelita ya lleva maga masa de harina, lugar onde ta masa y posible cuanto grano y aceite. Siempre, unrato lang este ya acaba. Ya lleva tambien sila “bien manada maga carnero, cabrito y vaca.” (Ex. 12:34-39) Pero por causa na grabe condicion na desierto, manada animal el posible ya muri. El cuanto de ese posible ya come el maga Israelita. El otro maga animal posible ya ofrece sila como sacrificio, maskin na maga falso dios. b (Act. 7:39-43) Maskin pa ansina, tiene siempre el maga Israelita maga carnero y cabrito. Puede kita este habla ciendo ya habla si Jehova con el de suyu maga siervo cuando ya desobedece sila: “El de ustedes maga anak hay queda maga pastor  na desierto por 40 año.” (Num. 14:33) Entonces, posible que por causa con ese maga animal, tiene sila leche y cuanto carne. Pero asigurao que gendeh se bastante para sustene con el maga tres millon gente por 40 año. c

Onde ya busca comida y agua el maga animal? d Aquel tiempo, posible manada tiempo que tan ulan y mas manada siembra na desierto. El Insight on the Scriptures, Volume 1, ta habla que 3,500 año ya el ya pasa, “mas manada agua na lugar onde ya esta el maga Israelita de antes contra ahora. Sabe este kita cay manada hondo y seco valle aqui por causa na maga rio que tiene de antes aqui.” Pero, un maka-miedo lugar el desierto y nuay tanto quien ta queda aqui. (Deut. 8:14-16) Si nuay el agua que ta dale si Jehova na milagroso manera, el maga Israelita y diila maga animal asigurao hay muri.—Ex. 15:22-25; 17:1-6; Num. 20:2, 11.

Ya habla si Moises con el maga Israelita que ya dale si Jehova el mana “para sabe [sila] que el gente gendeh ta vivi na pan lang sino na cada palabra que ta habla si Jehova.”—Deut. 8:3.