Kä 40 te nitre israelita nänbare kä nötare te ye ngwane, maná ye kwetani bäri kwetre (Éx. 16:35). Ne madakäre, Jehovakwe codorniz ye biani bobu jire ietre kwetakäre (Éx. 16:​12, 13; Núm. 11:31). Jondron mada nämäne kwetadre nitre israelita ie, akwa nämäne bäri chi kwetre.

Ñodre, Jehová nämäne jie ngwen “kä ruäre känti ja dükakäre”. Yete ñö aune mrö ruäre nämäne kwen ietre (Núm. 10:33). Ñö okwä Elim yete “ñö nämäne nen krä jätä biti krobu jire aune palmera ye nämäne 70 jire”. Palmera ye abokän ño ye mikadre ñärärä üai página 31 kukwe ja tötikara nebätä (Éx. 15:27). Tärä Plants of the Bible ye tä mike gare palmera ye abokän “keta kabre aune kwetata bäri kä nötare yete. Arato, tä aceite aune ja kriemikara bien nitre millón kwati ie”.

Arato, nitre israelita namani nünentubu ñö okwä Farán yekänti, ye nemenkä kä kiare Farán yete. aDiscovering the World of the Bible tä niere: “Ñö (o ñö nen) ye abokän bäri nga 81 millas [130 km] ngare. Ñö ye abokän bä nuäre aune gare bäri kä Sinaí yekänti”. Tärä ye ara tä mike gare: “Ñö nen nga tibien 28 millas [45 km] niken krüte yekänti, ñö okwä bä nuäre Farán ye tä. Yete palmera nirien krubäte. Ñö okwä Farán ye abokän 3 millas [4,8 km] nga tibien, 2,000 pies [610 m] mrenbiti ta. Ñö okwä ye abokän kä bä nuäre Sinaí. Kirabe nükebe nengwane palmera mil kabre bä nuäre tä yete yebätä nitre kwati tä niken kä yekänti”.

Nitre israelita kämikaninkä Egipto ye ngwane, nikanintre harina mritani ngwena jabätä aune jondron harina mritakäre ye jänikani kwetre arato. Ne madakäre, harina, aceite ye ngwan nämäne kwetre, akwa ñaka nuani raire ietre raba ruin nie. Arato “oveja, nibi aune jondron nire keta kabre nämäne ngwen” (Éx. 12:​34-39). Kä nötare yebätä jondron nire ye ngatani o nitre israelita käkwe kwetani. Ruäre abokän kukwani kwe Jehovai o ngöbö ngwarbe ie raba ruin nie (Hech. 7:​39-43). b Yebiti ta nitre israelita käkwe oveja aune nibi ngübabare jankunu. Gare nie ñobätä ñan aune niaratre Jehová mikani ngwarbe jai ye ngwane, Jehovakwe kukwe ne niebare ie: “Mun ngäbriänkätre rabadi oveja aune nibi ngübaka kä 40 te kä nötare nekänti” (Núm. 14:33). Ye medenbätä, ngri aune kian nämäne kwetre,  akwa ñaka krubäte, nitre millón krämä jire bukakäre kä 40 te. c

¿Ñö aune mrö ye nämäne kwen medente ietre jondron nire kräke? d Kä ye ngwane, ñü nämäne näkäin bäri tibien kä nötare yekänti. Ye medenbätä, kri mu nämäne nirien bäri. Kukwe kadekata “Arabia” tä tärä Perspicacia para comprender las Escrituras, yebätä tä mike gare kä 3.500 nikanina ta “ye ngwane, kä Arabia yekänti ñö nämäne nen bäri kä nengwane ye kräke, yebätä nämäne kä jie dikete nguse. Ye tä mike gare kä ye ngwane ñü nämäne näkäin krubäte tibien, yebätä ñö ye nämäne nen ñö kri ye kwrere”. Kä ye nämäne nötare aune käme krubäte yebätä nämäne jürä ngwandre (Deut. 8:​14-16). Jehovakwe ñö biani nitre israelita ie ye kukwe ñan tuabare nuainbare kwe. Kukwe ye ñan nuaindre kwe akräke, nitre israelita aune jondron nire kwetre ye tu reketadre (Éx. 15:​22-25; 17:​1-6; Núm. 20:​2, 11).

Jehovakwe nitre israelita bukani manante yebiti mikani gare kwe ietre “nitre kä tibienbätä ye ñan raba nüne mrö ye aibebiti, ñakare aune kukwe jökrä Jehovakwe yebiti raba nüne” niebare Moisekwe ietre (Deut. 8:3).