Questions Readas Get
Da Israel peopo had anyting else fo eat in da boonies odda den manna an quail birds?
Da main food fo da Israel peopo wen dey was in da boonies fo 40 years was manna. (Egypt 16:35) Two times Jehovah wen give da Israel peopo quail birds. (Egypt 16:12, 13; Cens 11:31) But dey had some odda stuff fo grind too.
Fo exampo, Jehovah wen sometimes show his peopo “wea fo res” wea had watta an food. (Cens 10:33) One of dose places was Elim, “wea get twelve puka wea da watta come outa da groun, an get seventy . . . palm tree.” Pretty much garans dose was date palms. (Egypt 15:27) Da book Plants of the Bible tell dat da date palm “grow all ova da place . . . az da main plant fo food inside da desert dat give food, oil, an shelta to uku plenny peopo.”
Da Israel peopo wen maybe stop at da big watta puka dat today dey call Feiran, az part of da Wadi Feiran. a Da book Discovering the World of the Bible tell dat dis wadi, o riva valley “is 81 miles long an is one of da mos longes, mos beautiful, mos famous wadis in Sinai.” Da book also tell, “In da wadi, if somebody go 28 miles from da place wea da riva an da ocean meet up, he going reach da Feiran Watta Puka, dass about 2,000 feet above sea level an 3 miles long. Get plenny palm trees an az so beautiful dat dey call um da Eden of Sinai. Fo tousands of years peopo go ova dea cuz of da date palms.”
Date palms in da Feiran watta puka
Wen da Israel peopo wen go outa Egypt, dey wen bring dough, bowls fo mix um, an probly some grain an oil. But dose tings no was going las. Dey even wen bring “plenny sheeps an plenny cows.” (Egypt 12:34-39) Cuz was real ruff inside da boonies plenny of da animals wen mahke. An dey wen eat some an use oddas fo make sacrifice, even to fake kine gods. b (Jesus Guys 7:39-43) Still yet, da Israel peopo wen breed some animals. We know dat cuz Jehovah wen tell dem wen dey neva lissen to him dat “yoa kids goin take kea sheeps ova hea inside da boonies fo forty year.” (Cens 14:33) Maybe da animals wen give dem milk an meat sometimes, but dat no ways was nuff fo feed three million peopo fo 40 years. c
Wea da animals wen find food an watta? d Dat time maybe had moa rain an moa plants inside da boonies. Insight on the Scriptures, Volume 1, tell dat 3,500 years ago, “had moa watta ova dea wea da Israel peopo was den get today. We know dis cuz get plenny deep, dry valleys dat was rivas befoa.” Still yet, da boonies was one skery place dat was all dry up. (Rules 8:14-16) If Jehovah neva give da Israel peopo an da animals watta, garans dey was going mahke.—Egypt 15:22-25; 17:1-6; Cens 20:2, 11.
Moses wen tell da Israel peopo dat Jehovah wen give dem manna fo let dem know “dat peopo no can live ony wit food. Gotta lissen eryting Da One In Charge tell too!”—Rules 8:3.
a Go look da May 1, 1992, The Watchtower, pp. 24-25.
b Get two times inside da Bible wea it talk about using animals fo sacrifice to Jehovah inside da boonies. Da firs time was wen dey wen go set up da prieses. Da second time was at da Passova. Both dose times wen happen in 1512 B.C.E., about one year afta Israel wen come outa Egypt.—Pries 8:14–9:24; Cens 9:1-5.
c Wen da 40 years da Israel peopo had fo stay inside da boonies was almos pau, dey wen take choke plenny animals as part of da stuff da army guys wen take. (Cens 31:32-34) But still yet, dey wen eat manna until dey wen go inside da Promise Land.—Josh 5:10-12.
d No can find notting fo show da animals wen eat manna cuz Jehovah wen tell da peopo fo pick ony how much ery person could eat.—Egypt 16:15, 16.
