Mu 40 a mivu yabhange akwa Izalayele mu kikangalakata, o maná kwene o kudya kwabetele o kudya dingi. (Mak. 16:35) Mu veji jiyadi, Jihova wa abhanene we tungumbe. (Mak. 16:​12, 13; Dya. 11:31) Maji phe, o akwa Izalayele exile we ni makudya amukwa.

Mu kifika sayi ithangana Jihova wexile mukwambata o mundu we mu “ididi ya kwa nyohesa,” mwexile menya ni kudya phala ene. (Dya. 10:33) Kididi kimoxi bhwa ambatele akixana Elimi, “kwexile dikwinyi ni kiyadi kya jifixi ja menya ni makwinyi a sambwadi a maye”—nange o maye otumbule bhabha exile o mixi a ixana tamareira mu dimi dya Phutu. (Mak. 15:27) O divulu ni dyambu Jimbutu ja Bibidya, mu dimi dya Kingileji, dizwela kwila, “o ji tamareira jikudila mu ididi yavulu, ni kwila yene o mixi ibhana dingi kudya mu kikangalakata. Yene ibhana we maji ni kilembeketa phala mazunda athu.”

Nange o akwa Izalayele emanene phala kunyoha we mu kididi ene mukixana lelu kala Feiran, kyene kibhanga mbandu ku kididi akixana Wadi Feiran (honga ya Feiran). a O divulu ni dyambu Kutungula o Ididi Yotumbule mu Bibidya, mu dimi dya Kingileji, dizwela kwila o honga yiyi mba ngiji, “yala ni 130 a jikilometulu mu kulebha, yene ibhanga mbandu ku jihonga ja beta o kulebha, ja fwama dingi, jala dingi ni fuma, ku Sinai. Phala kutunda bhu kididi kiki (Feiran), phala kubhixila bhu kididi bhu disangela o ngiji ni musanza wa kalunga, o dikanga dye 40 a jikilometulu. O kitala kye mu kulebha, kya 600 a jimetulu mu kukondala tunde bhwasuku o menya a kalunga. O kuzanza kwe kukamba ngo bhofele phala kutenesa 5 kya jikilometulu. Kyene kyezala ni maye, kyawabha kyavulu kate akisokesele kya ni Njaludin ya Edene. O athu ene mukwiza mu kididi kiki mukonda dya ji tamareira.”

Kyoso kyatundu ku Ijitu, akwa Izalayele ambatele fuba yo umbe kya phala kubhanga jimbolo, ima phala ku ji umbilabhu, nange ambatele we maji ni jimbundu. Kidi kwila o imbamba yiyi ki yalaleka kubhwa. Ene ambatele we “ibhaku yavulu kala, jimbudi, jihombo ni jingombe.” (Mak. 12:​34-39) Maji kupholo dya kwenda mukonda dya ibhidi mu kikangalakata, nange ibhaku yavulu yafwile. Sayi ibhaku o akwa Izalayele nange a idile. O yamukwa nange a ibhana kala sata, kate mwene phala o jinzambi ja makutu. b (Ika. 7:​39-43)  Maji ne kiki, kwasubhukile hanji ibhaku. Tutena kuzwela kiki mukonda dya izwelu ya Jihova ku akwa Izalayele kyoso kyamubhukumukina, mwene wambe: “O an’enu a kala abidi, a nyungana mu kikangalakata mu makwinyi awana a mivu.” (Dya. 14:33) Kyenyiki, nange o ibhaku yawu, ya abhanene lete, ni xitu. Maji se phata kiki ki kyasokele phala kudikila mazunda atatu a athu mu 40 a mivu. c

Abha phe kwebhi kwatundu o kudya ni menya phala o ibhaku? d Mu thembu yenyoyo, nange kwexile munoka kyavulu anga o yangu yavudile. O divulu Estudo Perspicaz das Escrituras, Volume 1, dyambe kwila 3.500 a mivu kudima “bhu kididi bhwexile akwa Izalayele bhwexile dingi menya, o lelu ndenge. O jihonga jazongo ni ja kukuta jalaku, jilondekesa ni kidi kyoso kwila, m’ukulu kwenyoko kwexile munoka kyavulu, anga kwexile jingiji ni menya avulu.” Maji ne kiki, o kikangalakata kyexile kididi kyadikota, kikwatesa woma. (Mate. 8:​14-16) Se Jihova ka abhanene menya bhu kaxi ka madiwanu, o akwa Izalayele ni ibhaku ya, se phata ejifwa.—Mak. 15:​22-25; 17:​1-6; Dya. 20:​2, 11.

Mozé watangela akwa Izalayele kwila Jihova wa abhane o maná phala kudya, “phala kwa ijidisa kwila muthu ka layela ngó ku mbolo, maji ku ima yoso itunda ku dikanu dya Jihova kwene kulayela o muthu.”—Mate. 8:3.