TA-A TÖI chuh in ngam kun panam tö Sëngkir Pēsār minë-eny, ngam mi-i Intōnēsiā. Lūöi tak yin më sistör hī mi-i kūö kuyayö, akahkūö më tarik mi-i kūö ngam panam tö më sistör nö vamënyö ṙô ngam Paipöl in më tarik. Tahëng pöri ngam la-en cha nö ikūö kuyayö.

Chuh el mai cha-a nö chap nuk tökiröng ihong nö chuh kūö kuyayö tī. Ōt minë ihong tö sā ṙôkö futpòl. Ūichngöre anga-aṅ nö ikui ngam istūl ngaich pong minë ihong nö kun kūönö tī, ngaich chaplen u cha-a nö el nuk plastik paltī ngaich yôn minë tayôhö cha-a nö kumtö minë paltī nö chuh patīre tī. Unôichrit e cha-a nö chaplö minë ihong nö el minë sāk, hòṅ cha nö chaplen u nö el ngam lôri. Yūsö minë ihong nö i vīni-i ngam talöökö.

Hěng tak ngam in cha sistör tö Hultā minë-eny. Anga-aṅ tö pōyen kahëti tö ṙētakre nö la-evṙen. Rö-ö pön fūra kūö ngam mikūönö ò nö in minë hamūl ò pësa. Hēk pöri anga-aṅ nö ṙūöhlö ngam inlahenre nö hamūl ngam pësa. Kūö yòh? Kūö ò nö hòṅ havah tëp (electronic tablet), pön hòṅ yūs ngam JW Laëprërī ëp anga-aṅ. Akahakūö ang sistör Hultā töre min hēk nö ṙūöhölre heuneū-en nö löktö in minë vitiō hēk minë tahëng inrē līpöre, kūöten inrē min anga-aṅ nö haköpmat ngam Paipöl.

Örheūheu ang sistör Hultā nö nët kanta rò-òten nö la-evṙen tö peuheū in minë töhěng ròngti chingëṅt. Uroh ngaich ngam sistör nö tööḵlö tī tö minë ihong nö el ngam trök. Hamūlngöre tī ngaich ngam sistör tö ṙāi ngam tëp re.

Ngö ṙô ang sistör Hultā: “Tayēḵngöre ngam alaha chu i rò-òtö tī chu pong ngam ihong, löktö in ngam tëp pöri chū-ö öich vë-eny nang më tarik tö ngam tölöök inhānga hēk möl inrē öich vai inlahen tī öich halēn minë sanapṙô re el mīting. Tö öp lökten chu vaichngö tö minë lumṙāḵ re.” Vë-enyre inrē ngam sistör töre nö yöölen nö löktö im tëp, ik ranūlten ök tölëlngökūö invah. Pön höng löktö el ngam vitiō kònfrëns cha-a hē e nö kēken ngam mīting tö ngam la-en inhānga inrē. Kirööngen ṙanamlōn in kūö ngam la-en sistöre Hultā nö vāyö ṙòng.