MU INDONESIE mu ka kibundi kapeela ka mu Sangir Besar, mmushaale bakuetu bakashi basatu. Bipua bi bungi kumpala, babaadi abafubu pamune kuifua. Mbebaukie kalolo muamua mu kisangisangi pa muanda wa mudimo wabo wa bulungudi, kuamba’shi kukuasha bantu buabadia kupusha Bible. Anka ingi misuusa namu, babaadi abakitshi ingi midimo ilekeenelekeene.

Kumpala, babaadi abatuele mu aa meema akata, abakunku na maboko bua kuata mabue beatushanga ku kiese. Mu angi mabue abaabadi abatusha, kubaadi angi akata abaadi ebumbe nka bu ndundo. Kunyima, bana bakashi babaadi abashaala ku tubasa tua mabaya batanga bitotua bua kubanga kutanya mabue mu tupese tupeela kukila eyi dia nsoolo. Akupu, abeele aa mabue apeela apeela mu kambeketshi ka ndundo, ababanga kukaamina nao muengie mpaa na p’abakafiki pa mbalo ibaabadi bashalele. Kunyima abeele mabue mu mifuko ikata bua’shi bamone bia kuiasemuna kui miotoka ikata bakape bantu abebakaa bilayi.

Umune aku baaba bakuetu bakashi baadi nyi Hulda. Nshalelo aaye baadi amutakula mu kukisha nsaa i bungi buadia kufuba mudimo wi bungi. Muanda baadi atusha makuta abaadi apete bua’shi ekale aulu bia kudia bia ku nshibo bi’efuku dioso bua kifuko kiaye. Ngi buakinyi baadi afubu dingi na kepatshila ka’shi, apete Tablete mulombene ku mukuasha buadia kutuela mu JW Library^®. Hulda baadi auku’shi ma video na ingi mikanda biapete mu yawa application eetu, mbilombene kulumbuula mudimo waye wa bulungudi na mpushiisho e buwa a Bible.

Hulda baadi afubu nsaa ibidi kunakashika kooso munda a mueshi na kipindi. Baadi atanya mabue e bungi buadia kuusha ka motoka kapeela. Na ku nfudiilo a bioso, baadi muule Tablete aaye.

“Hulda amba’shi: sunga mbinaadi nakooko ngofu, bua wawa mudimo ubaadi autekie bukome bui bungi bua kumbudi bua kutanya mabue, naadi muiluankane aa makienga ooso na yaya mitanyo yooso nka musuusa umune p’ami kubanga kufubisha tablete ande mupia bua kunkuasha bua’shi ngikale nakitshi mudimo wa bulungudi kalolo, na kulumbuula bisangilo bia kakongie mu mushindo upeelepeele.” Akula dingi’shi: Tablete abaadi mupete mumukuashe mu kipungo kia Corona virus, muanda midimo yooso ya kakongie ibaadi ayikitshikila ku vidéo conférence. Tui na muloo pa kumona’shi Hulda mmulombashe kano kepatshila kaaye.