1, 2. Canan wichan sasacunapa pasashganchino, ¿ima sasacunapataj Jerusalenman cutej judiucunapis pasargan? (“ Hageo, Zacarías y Esdras cawashgan wichan” recuadruta ricay).

 ¿SHAMOJ tiempuman yarpar manchacunquichu? Canan aruyniynaj caycar yarpachacuycanquichi familiayquita imano manteninayquipaj y politicaraycur imayca problemacuna captin y predicaciunninchita autoridäcuna michäcuycashganta ricarpis manchacunquichi familiayquita imalapis pasananta. Chayno captenga, canan yachacunapaj cajcho ricärishun imanotaj Jehová israelitacunata yanapargan chaycunapa pasaptin.

² Babiloniacho tiyaj judiucuna riquezancunata y imaycancunata jaguirinanpäga manami facilchu cargan, Jerusalenman cutinanpäga Diosmanraj ali yäracunan cargan. Jerusalenchona carcaycaptin imayca sasacunapa pasargan micuyraycur, politicaraycur y chiquicojnincunaraycurpis. Chaymi waquin judiucunapäga sasachi cargan yanapacunanpaj templuta sharcachiycho. Chaymi 520 watacho Jesús manaraj shamuptin Jehovaga Hageo y Zacarías profetacunata mandargan judiucunata shacyächinanpaj (Hageo 1:1; Zac. 1:1). Paycuna rurashganga alapa alimi cargan. Pero 50 watacuna pasariptin judiucunaga yapay guelanar galaycärirgan. Chaura Diospa Leyninpita alapa yachaj sacerdote Esdrasga Babiloniapita Jerusalenman cutirgan marca masincunata shacyächinanpaj y yanapänanpaj rasunpa caj aduraciunta puntaman churananpaj (Esd. 7:1, 6).

3. ¿Ima tapucuycunapitataj canan yachacushun? (Proverbios 22:19).

³ Hageo y Zacarías wilacushganga Diospa sirvejnincunata yanapargan chiquishga captinpis Jehovaman yäracunanpaj,  chayga noganchitapis yanapämäshunmi ima captinpis jinala Jehovaman yäracunapaj (leiriy Proverbios 22:19). Cananga yachacushun imanotaj Jehová sirvejnincunata yanapargan Hageo y Zacarías profetancunawan, nircur Esdraspitapis yachacushun. Jina cay tapucuycunapitapis yachacushun: judiucuna Jerusalenman chayaycur sasacunapa pasaptin, ¿imanotaj sienticurgan?, ¿imanirtaj imayca sasacunapa pasarpis Jehovata sirviytaga jaguishwanchu?, y ¿imaraj yanapämäshun ima captinpis Jehovalaman yäracunapaj?

4, 5. ¿Imacunapa pasartaj judiucunaga guelanacärirgan templuta sharcachinanpaj?

⁴ Judiucuna Jerusalenman chayapäcuptin ganas ganaswan caycargan arunanpaj. Chaymi walca tiempulacho Jehovapaj altarta y templupaj cimientutapis churapäcushgana cargan (Esd. 3:1-3, 10). Pero nircurga guelanäcurganmi. ¿Imanir? Templucho arunanpaj caycaptinpis wasincunacho, chacrancunacho y familianta manteninanpäpis arunanraj cargan (Esd. 2:68, 70). Jina chiquicojnincunaga imayca chapacunata churargan templuta mana sharcachipäcunanpaj (Esd. 4:1-5).

⁵ Jina politicaraycur y guellayraycurpis problemacuna captin judiucunapäga sasachi cargan cawacunanpaj. Chay wichan Jerusalenga Persia naciunpa munaynincho caycargan. Mandacoj Ciro wanuptin 530 watacho Jesús manaraj shamuptin, Cambises runana mandacur galaycurgan, y payga Egiptutapis munaynincho chararayta munargan. Chaura soldaduncuna Israel marcapa pasarga judiucunata yacutapis micuytapis mañacurganchi. Nircur Darío I mandacurna galaycuptin persa naciuncho politicaraycur imayca problemacuna cargan. Chay lapan pasashgancunata ricar Jerusalencho caycaj judiucunaga yarpachacurganchi familiancunata imano manteninanpaj. Chayraycur waquin judiucunaga yarpapäcurgan Diospa templuta sharcachinanpaj tiempo manaraj chayamushganta (Hageo 1:2).

6. ¿Ima mastataj judiucunata pasargan, y imataj Zacarías yarpächergan? (Zacarías 4:6, 7).

⁶ (Leiriy Zacarías 4:6, 7). Judiucunaga manami politicaraycur y guellayraycurlachu nacargan, sinoga chiquishgapis cargan. 522 watacho chiquejnincunaga judiucunata michäcurgan Jehovapaj templuta mana sharcachinanpaj. Pero Zacariasga judiucunata yarpächergan Jehovapa espiritunwan paycuna chay templuta imanopapis sharcachinanpaj. Y chaynomi cargan, 520 watacho rey Dariuga judiucunata mandargan templuta sharcachipäcunanpaj, hasta guellaytapis gorganmi. Jina waquin marcacunapa autoridänincunatapis mandargan yanapänanpaj (Esd. 6:1, 6-10).

7. Diospa voluntäninta puntaman churashganpita, ¿ima bendiciuncunataj judiucuna chasquergan?

 ⁷ Hageo y Zacarías profetacunawan Jehovaga sirvejnincunata aunirgan paycunawan caycänanpaj calpachacäriptin templuta sharcachinanpaj (Hageo 1:8, 13, 14; Zac. 1:3, 16). Chayta wiyaycur judiucunaga yapay ganas ganaswan 520 watacho templuta sharcachiyta galaycurgan, y pichga watacunalacho ushargan. Imayca sasacunapa pasarpis Diospa voluntäninta puntaman churapäcushganpita, Jehovaga lapan necesitashgancunata camaripargan. Jina yanaparganpis cushi cushila sirvinanpaj (Esd. 6:14-16, 22).

8. ¿Imanotaj Hageo 2:4 textuga yanapämanchi Diospa Gobiernunta puntaman churanapaj? (Notatapis ricay).

⁸ Jatun nacayga caylachona caycan, chaymi canan wichan masraj calpachacunanchi runacunata yachachicunapaj (Mar. 13:10). Pero guellayraycur sasacunapa pasaycaptinchi o autoridäcuna michäcuptin predicanapaj, sasami canman Diospa voluntäninta puntaman churanapaj. Chauraga, ¿imaraj yanapämäshun? Yäracushwanmi lapanta mandaj Tayta Diosninchi noganchiwan imaypis caycashganta. b Payga yanapämäshunmi calpachacuptinchi Gobiernunta imapitapis más puntaman churanapaj. Chaymi imatapis manchacushunchu (leiriy Hageo 2:4).

9, 10. Mateo 6:33 texto nishganga, ¿imanotaj juc matrimoniuta yanapargan?

⁹ Ricärishun imacunapa pasargan Irina y Oleg c cristianucuna, paycunaga precursorcunano yanapacun. Juc congregaciuncho yanapacunanpaj aywashganpita chay marcacho problemacunaraycur aruyninta ogrargan. Casi juc wata aruyniynaj carcaycarpis, paycunaga ricapäcurgan Jehovapa y yäracoj masincunapitapis yanapacuyninta. ¿Imataj yanapargan laquicuycarla mana carcaycänanpaj? Galananlacho Oleg laquishga caycarpis cayno nin: “Cada cadala predicaciunman yargushgämi ishcäcunata yanapämargan masga Diospa voluntäninman yarpachacärinäpaj”. Paycunaga trabajunta tarishgancama lapan tiempunwan runacunata yachachicur carcaycargan.

¹⁰ Juc junaj predicaciunpita cutipäcamuptin juc vecinun wilapargan chay casaracushgacunapa carucho caycaj amigun viviriscunata paycunapaj apamushganta.  Oleg cayno wilacun: “Chay junajcho yapay ischcäcuna ricapäcurgä Jehovapis y hermanunchicunapis alapa cuyamashganchita. Chaymi segurumi carcaycä Jehovaga sirvejnincunata imaypis mana gongashganta” (Mat. 6:33).

11. ¿Imataj Jehová gomäshun pay mandamashganchita puntaman churaptinchi?

¹¹ Jehovaga munan imapitapis masga runacunata yachachicunapaj paycunapis salvacärinanpaj.  Ganchis caj parrafucho ricashganchino, Hageo judiucunata shacyächergan templuta yapay sharcachinanpaj. Chaywanga nergan mana pësacunanpaj unaycho imanir mana rurashganpita, sinoga calpachacunanpämi. Y paycuna cäsucäriptenga Jehová bendicinanpämi aunirgan (Hageo 2:18, 19). Noganchitapis Jehovaga bendicimäshunmi imapitapis masga pay mandamashganchita ruranapaj calpachacuptinchi.

12. ¿Imanirtaj Esdras y waquin judiucunapis Jehovamanraj yäracunan cargan?

¹² 468 watacho Jesús manaraj shamuptin, Esdrasga waquin judiucunawan Babiloniapita Jerusalenman aywargan. Pero chunyaj nänicunapa viajar y templupaj guellaytapis goritapis apaycarga manchacurganchi suwacojcunapita. Chaymi Diosmanraj yäracunan cargan (Esd. 7:12-16; 8:31). Jina Jerusalenman chayaycur ricapäcurgan walcala judiucuna caycashganta, y chay marcapa murallancunapis y puncunpis juchuchishga caycashganta. ¿Imataj yachacunchi Esdraspita Jehovaman alapa yäracushganpita?

13. ¿Imataj Esdrasta yanapargan Jehovaman masraj yäracunanpaj? (Notatapis ricay).

¹³ Esdrasga ricashgami imano Jehová sirvejnincunata yanapashga sasacunapa pasaptin. 484 watacho rey Asueruga persa naciunpa munaynincho caycaj judiucunata ushacächinanpaj mandargan, y Esdrasga chay wichan Babiloniachochi caycargan (Est. 3:7, 13-15). Cawayninga peligruchomi caycargan. Chaymi judiucunaga pasaypa laquicärishpan gachga ropata jaticuycur ayunapäcurgan y Jehovatapis ruwacurganchi yanapänanpaj (Est. 4:3). Y Esdraswan waquin judiucunaga alapachi cushicärirgan chiquejnincuna guerucho wanushganta ricar (Est. 9:1, 2). Esdras cawaynincho imacunapa pasashganga yanaparganmi shamoj tiempucho pruebacunata aguantananpaj, yäracuyninpis masraj mirarganchi Jehová sirvejnincunata imaypis yanapänanpaj. d

14. ¿Imataj juc cristiana yachacurgan aruyniynaj quedacuptin?

¹⁴ Sasacunapa pasashganchi hora Jehová yanapämaptinchega, payman masraj yäracunchi. Ricärishun Anastasia imacunapa pasashganta, payga Europa del este cajcho tiyan. Arojmasincunaga imanopapis obligajshi politicaman jaticänanpaj, ichanga payga chayta rurayta mana munarmi trabajuntapis jaguirirgan. Anastasia wilacun: “Canancama imaypis guellayniynajga manami cargächu”. Caytapis nin: “Jehovata wilapargä päsamashganta y ricargä cuyacuywan cuidamashganta. Imaylapis yapay aruyniynaj quedacuptëga manami manchacushänachu, musyämi Taytä Jehová canan cuidamashganno imaypis cuidamangami”.

15. ¿Imataj Esdrasga ruraj Jehovalaman yäracunanpaj? (Esdras 7:27, 28).

¹⁵ Esdrasga cawaynincho Jehovapa  yanapacuyninta ricargan. Payga yarpachacoj achca cuticunacho Jehová yanapashganman, chaymi payman yäracurgan. Esdrasga nergan Jehová paywan caycashganta (leiriy Esdras 7:27, 28). Jutinta apaj libruchopis Esdrasga achca cuticunacho nin Jehová paywan caycashganta (Esd. 7:6, 9; 8:18, 22, 31).

16. ¿Imacunapa pasaptinchitaj Jehová yanapämashganchita ricanchi? (Fotucunatapis ricay).

¹⁶ Noganchipis pruebacunapa pasaptinchi Jehová listo caycan yanapämänanchipaj. Capazchi öraga patrunninchita permisuta mañacuyta munashwan asambleaman aywanapaj y aruyninchichopis juc horacunacho arunapaj reuniunninchicunaman mana faltanapaj. Chaypa pasarga alimi canman yarpachacunapaj imano Jehová yanapämashganchiman. Y mañacushganchita chasquiptinchega, Jehovaman yäracuyninchipis masraj winanga.

17. ¿Imanotaj musyanchi Esdras humilde cashganta sasacunapa pasaptin? (Garancho caycaj dibujuta ricay).

¹⁷ Esdras humilde carmi Jehovapa yanapacuyninta ashirgan. Imayca ruraynincuna captinmi Esdrasga Jehovata ruwacoj yanapänanpaj (Esd. 8:21-23; 9:3-5). Chayta ricarmi waquincunapis Esdrasta yanapargan, y Jehovamanpis yäracurgan (Esd. 10:1-4). Chaymi guellayraycur o familianchita imano yanapänapaj yarpachacuycarga, seguro caycashwan lapan shongunchiwan Jehovata mañacuptinchega pay yanapämänanchipaj cajta.

18. ¿Imataj yanapämäshun Jehovaman masraj yäracunapaj?

¹⁸ Jehovamanga masraj yäracushun humilde captinchi, yanapacuyninta ashiptinchi y hermanunchicunapa yanapacuynintapis ashiptinchi. Erika quimsa wamracunayoj caycar imayca sasacunapa pasarpis Jehovaman alapa yäracoj. Ichic tiempulacho pachancho caycaj itinta ogrargan y runanpis wanucurgan. Chaymi imapa pasashganman yarpar cayno nin: “Amigücunawan achca cuticunacho parlar cuentata gocurgä nishgancunaga mañacushgäcunapa respuestancuna cashganta. Ima pasamashgancunata wilapaptëga, paycuna musyapäcunmi imano yanapämänanpaj”.

19, 20. ¿Imataj yachacunchi Jerusalenman mana cutishgan judiucunapita?

¹⁹ Jina Jerusalenman mana cutishgan  judiucunapitapis yachacushwanmi. Paycunaga saludninraycur y edäninraycurpis cutiyta puedirganchu, chayno captinpis cuticojcunata yanapargan guellaywan, goriwan, micuycunawan y mascunawanpis (Esd. 1:5, 6). Y mana chaylachu, punta caj grupo judiucuna Jerusalenman cutishganpita 19 watacunano pasashgana captinpis, Babiloniacho caycaj judiucunaga jinala donaciunnincunata mandaycargan (Zac. 6:10).

²⁰ Jehovata sirvishganchicho lapan munashganchita rurayta mana puedirpis, Jehovaga cushicunmi puedishganchilata shongupita ruraptinchi. ¿Imanotaj chayta musyanchi? Jehovaga Zacariasta nergan Babiloniacho caycaj judiucuna apachicamushgan guellaywan y goriwanpis juc coronata rurananpaj (Zac. 6:11). Nircur chay coronata templucho churargan waquincuna yarpapäcunanpaj Babiloniacho caycaj judiucuna garacoj cashganta (Zac. 6:14). Chaymi seguro caycanchi sasacunapa pasarpis lapan puedishganchimanno sirviptinchega, Jehová manami imaypis gongangachu (Heb. 6:10).

21. ¿Imaraj yanapämäshun shamoj tiempuman yarpar mana manchacunapaj?

²¹ Cay ushanan tiempuchoga imayca nacaycunapa pasashun y cawayninchipis más sasamanraj ticranga (2 Tim. 3:1, 13). Pero chayman yarpachacurga ama manchacushwanchu. Profeta Hageupa tiempuncho Jehová sirvejnincunata nishganman yarpäshun, cayno nergan: “Qamkunawan kaykaptïqa ama mantsakäriytsu” (Hageo 2:4, 5). Noganchipis musyanchimi Jehovapa voluntäninta más puntaman churaptinchega pay noganchiwan caycangapaj. Chaura Hageo y Zacarías wilacushganta y Esdraspitapis canan yachacushganchita casucuptinchega, ima captinpis Jehovalamanmi imaypis yäracushun.