1-2. (a) Come che le nostre dificoltà ancoi le se someia a quele che i giudei i ga bio nel passà? (b) Parla de arquante dificoltà che i giudei i ga infrontà. (Varda anca el quadro “ I giorni de Ageo, Zacaria e Esdra”.)

 GHETO pensieri sora el futuro? Pol esser che te ghè perso el laoro e te te domandi come che te ndarè darghe de magnar ala to fameia. Fursi te resti preocupà cola so seguransa parché ghen’è perseghission o problemi nel governo del to paese. Alora, el esémpio dei israeliti del passà el va mostrarte come che Geovà el pol giutarte a dàrghene fora con queste dificoltà.

² I giudei che i era de star in Babilònia i gavea una bona vita e i gavea fin fato capital. Arquanti de lori no i cognossea quasi gnente de Gerusalen. Par quela, ghe ga tocà gaver tanto coraio par assar tuto indrio e ndar de star in Gerusalen. E quando lori i ze rivadi, i ga bio dificoltà par darghe de magnar ala so fameia, i ga infrontà oposission dele nassion che ghen’era intorno e ghen’era tanti problemi nel governo che el comandea quel posto. Par quela, tanti de lori i ze restadi desanimadi e sensa forsa de far su el témpio par Geovà. Alora, intorno del ano 520 vanti de Cristo, Geovà el ga mandà i profeti Ageo e Zacaria par incoraiar la nassion. (Ageo 1:1; Zac. 1:1) Cossita, quei giudei i ga bio el coraio che i gavea de bisogno par far quel laoro. Ma, intorno de 50 ani dopo, i giudei i ze restadi desanimadi nantra volta. Alora, Geovà el ga fato che Esdra el ndesse de Babilònia fin Gerusalen par incoraiar la nassion a adorar a Geovà dela maniera giusta. — Esd. 7:1, 6.

3. Che domande ndaremo risponder in questo stùdio? (Proverbi 22:19)

³ Le professie de Ageo e Zacaria le ga giutà tanto i giudei del passà a seitar a fidarse in Geovà. Queste professie le  ndarà assarne sicuri che Geovà el ndarà giutarne, no importa cossa che suceda. (Ledi Proverbi 22:19. b) In questo stùdio, ndaremo veder cossa che Geovà el ga parlà par meso de Ageo e Zacaria e cossa imparemo col esémpio de Esdra. Noantri anca ndaremo risponder a queste domande: Che dificoltà i giudei i ga infrontà nel passà? Parché che ghemo de seitar a far el nostro meio par Geovà intanto che semo drio tribolar? Come che podemo fidarse ancora de pi in Geovà se semo drio passar par un bruto colpo?

4-5. Parché che tanti giudei i ze restadi desanimadi de far su el témpio?

⁴ Quando i giudei i ze rivadi in Gerusalen, lori i gavea tanto de far. Alora, suito i ga fato su el altar par Geovà e i ga tacà far la fondassion del témpio. (Esd. 3:1-3, 10) Ma lori anca i gavea de far su le so case, piantar e darghe quel che ghe ocorea ala so fameia. Par quela, pena dopo che i ze rivadi a Gerusalen, lori belche i ze restadi desanimadi. (Esd. 2:68, 70) Lori anca i ga infrontà oposission dei nemighi che i volea fermarli de far su el témpio. — Esd. 4:1-5.

⁵ I giudei anca i era drio tribolar parché ghe manchea soldi e ghen’era tanti problemi nel governo. In quela època, Ciro l’era el rè dela Pèrsia e l’era drio comandar Gerusalen. Dopo che lu l’è morto, nel ano 530 vanti de Cristo, el rè Cambises el ga scominsià a governar e el ga volesto far guera contra el Egito. E pol esser che i soldadi che i ndea ala guera i passesse par el posto ndove i israeliti i stea e i ghe domandesse magnar, àqua e un posto de star. Par quela, i israeliti i ga bio ancora de pi dificoltà. Pi tardi, quando el rè Cambises l’è morto, Dario el ga scominsià a governar e tanti problemi i ze vegnesti fora anca nel so governo. Par quela, i giudei che i era tornadi a Gerusalen i gavea tanti pensieri e no i savea se i saria boni de darghe ala so fameia quel che ghe ocorea. Con tuti questi problemi, arquanti de lori i pensea che no l’era mia la ora giusta de far su el témpio de Geovà. — Ageo 1:2.

6. (a) De acordo con Zacaria 4:6, 7, che altre dificoltà i giudei i ga infrontà? (b) Come che Zacaria li ga giutadi?

⁶ Ledi Zacaria 4:6, 7. c Nel ano 522 vanti de Cristo, i nemighi i ga fato che el rè dela Pèrsia el mandesse fermar la costrussion del témpio. Alora, i giudei ghe ga tocà dàrghene fora anca con perseghission. Ma, Zacaria li ga giutadi a esser sicuri che Geovà el ndaria doperar el so poder par giutarli a far quel laoro. Cossita, nel ano 520 vanti de Cristo, el rè Dario el ga assà che i giudei i seitesse a far su el témpio. Dario el ghe ga dato soldi par far el laoro e el ga fin mandà che i governadori li giutesse. — Esd. 6:1, 6-10.

7. Che benedission i giudei i ga bio?

 ⁷ Par meso de Ageo e Zacaria, Geovà el ga prometesto una bela roba ai giudei. Se lori i se sforsesse del tuto par far su el témpio, lu el ndaria giutarli. (Ageo 1:8, 13, 14; Zac. 1:3, 16) Alora, nel ano 520 vanti de Cristo, i giudei i ga scominsià nantra volta a far su el témpio e i lo ga finio in manco de sinque ani. Come la costrussion del témpio la era la roba pi importante par  i giudei, Geovà el ga dato quel che ghe ocorea e li ga giutadi a gaver un forte fede. Cossita, i giudei i ze stati boni de seitar a adorar a Geovà con alegria. — Esd. 6:14-16, 22.

8. Come che Ageo 2:4 pol giutarne a seitar a servir a Geovà? (Varda anca la nota.)

⁸ Come la granda tribolassion la ze pròpio darente, ghemo de sforsarse par far el nostro meio nela predicassion. (Mar. 13:10) Magari, pol esser che sìpia fadiga seitar a predicar se ne manca soldi o se semo drio infrontar perseghission. Alora, no ne ocore gaver paura de gnente, parché “Geovà dei esèrsiti” d l’è dela nostra banda. Se la roba pi importante dela nostra vita la ze servir a Geovà, podemo esser sicuri che lu el ndarà giutarne. — Ledi Ageo 2:4. e

9-10. Come che Oleg e Irina i ga visto che le parole de Gesù in Mateo 6:33 le ze vera?

⁹ Varda cossa che ga sucedesto con Oleg e Irina, f che i ze pionieri. Lori i ze ndati de star in nantro posto par giutar una congregassion. Ma, tanti problemi i ze vegnesti fora nel governo de quel paese, e lori i ga perso el so laoro. Par de pi de un ano, lori no i ze stati boni de catar un laoro, e ghe ga tocà far diversi laoreti par mantegnerse. Ancora cossita, Geovà sempre li ga giutadi e, dele volte, anca i fradei ghe dea quel che i gavea de bisogno. Anca se Oleg el se sentia desanimà, lu el ga contà cossa che lo ga giutà a dàrghene fora con queste dificoltà. Lu el ga dito: “Ghemo  proà predicar de pi che podeino.” Cossita, Oleg e so dona Irina i ze stati boni de far el so meio nela predicassion intanto che i seitea ndar in serca de un laoro.

¹⁰ Un giorno, dopo che i ze tornadi dela predicassion, lori i ga savesto che un amigo el gavea fato intorno de 160 chilòmetri par portarghe due sacole de magnar. Oleg el ga dito: “Quel giorno ghemo visto che Geovà e la congregassion i se preocupa tanto con noantri. Anca se ne par che le robe le ze massa fadiga, semo sicuri che Geovà no’l se desméntega mai dei so servi.” — Mat. 6:33.

11. De cossa che podemo esser sicuri se noantri se sforsemo par far quel che Geovà el vol?

¹¹ Come ghemo visto nel  paràgrafo 7, Ageo el ga incoraià i giudei a ndar avanti. Lu el ga dito che Geovà el ndaria benedirli se i se sforsesse de finir la costrussion del témpio. (Ageo 2:18, 19) L’è cossita anca con noantri ancoi. Geovà el vol che el laoro de far dissìpoli el sìpia la roba pi importante dela nostra vita. E se noantri se sforsemo de far questo laoro, Geovà el ndarà benedir anca noantri.

12. Parché che Esdra e i altri giudei i gavea bisogno de fede?

¹² Nel ano 468 vanti de Cristo, Esdra l’è tornà a Gerusalen insieme a nantro grupo de giudei. Sicuro che ghe ga tocà gaver tanta fede par far quel viaio. Lori i passaria par strade pericolose e i saria drio portar una mùcia de oro e argento che el rè el ghe gavea dato par far su el témpio. Alora, saria fàcile che bandidi li ciavesse. (Esd. 7:12-16; 8:31) Magari, gnanca in Gerusalen lori no i saria mia in seguransa, parché ghen’era poca gente de star nela cità e i portoni e i muri i era tuti rovinadi. Alora, come che Esdra se ga fidà del tuto in Geovà e cossa che noantri podemo imparar de lu?

13. Come che Esdra el ga fato pi forte la so confiansa in Geovà? (Varda anca la nota.)

¹³ Esdra el ga visto che Geovà el giuta i so servi quando i ze drio tribolar. Vanti de ndar a Gerusalen, Esdra l’era de star in Babilònia insieme de altri giudei. Nel ano 484 vanti de Cristo, el rè Assuero el ga mandà copar tuti i giudei che i era de star nele tere che lu el comandea. (Est. 3:7, 13-15) Esdra e altri giudei i ze restadi pròpio spauradi parché i saria copadi. Alora, lori i se ga fermà de magnar, i ga tacà a piander e a pregar che Geovà li giutesse. (Est. 4:3) Sicuro che Esdra e altri giudei i se ga fidà ancora de pi in Geovà dopo che i ga visto che tuti i so nemighi i ze stati copadi! (Est. 9:1, 2) Tute queste robe che ga sucedesto ga giutà Esdra a far pi forte la confiansa che Geovà el ndaria proteger i so servi. g

14. Cossa che una sorela la ga imparà dopo che la ga visto come Geovà la ga tendesta?

¹⁴ La nostra confiansa in Geovà la resta pi forte quando vedemo che lu el tende de noantri intanto che semo drio tribolar. Varda cossa ga sucedesto con Anastasia, una sorela che la ze de star nela Europa. Anastasia ghe ga tocà ndar via del laoro parché i so coleghi i volea obrigarla a scòlier una banda nela polìtica. Ela la ga dito: “Questa la ze stata la prima volta che me go ciapà sensa soldi. Ma go pregà a Geovà e go visto come lu el ga tendesto de mi. Se me sucede nantra volta de perder el laoro,  no gavarò mia paura. Cossita come Geovà el me tende ancoi, el ndarà tenderme anca doman.”

15. Cossa che ga giutà Esdra a seitar a fidarse in Geovà? (Esdra 7:27, 28)

¹⁵ Esdra el ga visto che Geovà l’era drio giutarlo. Esdra l’è stà bon de seitar a fidarse in Geovà parché el pensea sora tute le volte che Dio lo gavea giutà nel passà. Nel libro dela Bìblia che Esdra el ga scrito, lu el ga dito sei volte la spression: “Geovà l’era con mi.” — Ledi Esdra 7:27, 28; h 7:6, 9; 8:18, 22, 31.

16. Quando che podemo veder che Geovà l’è drio giutarne? (Varda anca la ilustrassion.)

¹⁶ Quando semo drio tribolar, Geovà el pol giutarne. Metemo dir che te toca domandarghe a to paron par no ndar laorar nei giorni che te gavarè el congresso o dirghe che te ghè de ndar via del laoro pi bonora nei giorni che te ghè le riunion. Se sucede una roba cossita, te podarè veder che Geovà l’è con ti, e pol esser che te restarè maraveià de veder come lu el ndarà giutarte. Cossita, la to confiansa in Dio la restarà cada volta pi forte.

17. Come che Esdra el ga mostrà che l’era ùmile? (Varda la ilustrassion dela prima pàgina.)

¹⁷ Esdra l’è stà ùmile e l’è ndato in serca del aiuto de Geovà. Sempre che Esdra el se sentia preocupà cole robe che el gavea de far, lu el preghea a Geovà. (Esd. 8:21-23; 9:3-5) Cossita, lu el ga mostrà che el se fidea in Geovà e el so esémpio ga giutà altri a far compagno a lu. (Esd. 10:1-4) Alora, sempre che te te senti preocupà cola seguransa dela to fameia o de darghe quel che ghe ocore, fìdate in Geovà e prega a lu.

18. Cossa che pol giutarne a far pi forte la nostra confiansa in Geovà?

¹⁸ Noantri ghemo de esser ùmili, ndar in serca del aiuto de Geovà e acetar el aiuto dei fradei. Cossita, la nostra confiansa in Dio la restarà ancora pi forte. Varda cossa che ga sucedesto con una sorela de nome Erika, che la ga due fioi e una fiola. In poco tempo, l’è morto so omo e anca una bambina che no la era gnancora nassesta. Erika la ga sofrio tanto, ma la ze stata bona de seitar a fidarse in Geovà. Ela la ga dito: “No ghen’è come saver de che maniera  Geovà el ndarà giutarne. Par quela, pol esser che restaremo maraveiadi con quel che lu el fà par giutarne. Tante volte, go visto Geovà risponder ale me orassion par meso de quel che me amighi i me ga dito e i ga fato par mi. Alora, se ghe conto ai me amighi quel che l’è drio suceder nela me vita, sarà pi fàcile che i me giute.”

19-20. Cossa che imparemo dei giudei che no i ga podesto tornar a Gerusalen?

¹⁹ Noantri anca podemo imparar dei giudei che no i ze stati boni de tornar a Gerusalen. Arquanti de lori no i ga podesto tornar par causa dela so fameia o parché deromai i era veci o maladi. Ancora cossita, lori i restea contenti de darghe soldi e altre robe ai giudei che i era drio ndar a Gerusalen. (Esd. 1:5, 6) E pol esser che intorno de 19 ani dopo, ancora ghen’era giudei in Babilònia che i seitea a giutar quei che i era in Gerusalen. — Zac. 6:10.

²⁰ Geovà el ga domandà che Zacaria el fesse una corona col oro e argento che i giudei de Babilònia i gavea mandà a quei de Gerusalen. (Zac. 6:11) Questa corona li giutaria a ricordarse de tuto quel che i giudei de Babilònia i ghe gavea mandà de volentiera. (Zac. 6:14) Cossa che imparemo? Anca se no semo mia boni de far tuto quel che volarìssino par Geovà, podemo esser sicuri che ghe piase tanto veder el nostro sforso par contentarlo. Lu mai el ndarà desmentegarse de quel che femo par servirlo, anca quando semo drio tribolar. — Ebr. 6:10.

21. Cossa che ndarà giutarne a dàrghene fora cole dificoltà che gavaremo nel futuro?

²¹ Sicuro che ancora ndaremo tribolar in questi ùltimi giorni e le robe le deventarà cada volta pedo. (2 Tim. 3:1, 13) Ma no ne ocore mia restar massa preocupadi. Invesse, ne toca ricordarse de quel che Geovà el ga dito ai so servi nei giorni de Ageo: ‘Mi son con valtri. No sté gaver paura.’ (Ageo 2:4, 5) Se metemo in pràtica quel che ghemo imparà de Ageo, de Zacaria e de Esdra, saremo boni de seitar a fidarse in Geovà no importa quel che suceda. Alora, se femo el nostro meio par contentar a Geovà, podemo fidarse che lu sempre el sarà con noantri.