Kon gusto kang moadto sa usa ka lugar nga wala pa nimo maadtoi sukad, unsay imong himoon?

1. 1. Moagi sa ruta nga gihunahuna nimong sakto.

2. 2. Mosunod sa uban ug manghinaot nga nakatultol sila sa dalan.

3. 3. Mokonsulta sa kasaligang giya, sama sa GPS, mapa, o kasaligang higala nga nakatultol sa dalan.

Kon pilion nato ang una o ang ikaduha, naa tay maadtoan pero dili tingali ang lugar nga gusto natong adtoon. Pero kon pilion nato ang ikatulo, makaseguro ta nga makaabot gyod ta sa atong destinasyon.

Ang atong kinabuhi samag pagbiyahe ug gusto nato nga motultol ni sa usa ka malipayong kaugmaon. Pero kini nga kaugmaon nagdepende kon asa ta mangitag giya dihang mohimog mga desisyon.

Kada adlaw, daghan tag ginagmayng mga desisyon nga ginahimo, pero naay mga higayon nga mohimo pod tag dagkong desisyon. Kini ang magpakita kon unsay husto ug sayop para nato. Ang maong mga desisyon naay dakong epekto nato ug sa mga tawo nga atong gimahal. Apil niini nga mga desisyon ang bahin sa:

• Sekso ug kaminyoon

• Pagkamatinud-anon, trabaho, ug kuwarta

• Pagpadakog mga anak

• Pagtratar sa uban

Unsaon nimo pagseguro nga ang imong mga desisyon niining mga butanga moresultag malipayong kaugmaon para nimo ug sa imong pamilya?

Mao ni ang pangutana para sa matag usa nato: Unsay makatabang nako sa paghimog maalamong mga desisyon bahin sa kon unsay husto ug sayop?

Kini nga magasin maghisgot kon nganong ang Bibliya kasaligan nga giya sa pag-ila kon unsay husto ug sayop ug kon sa unsang paagi kini makatabang nimo.