Yika mulinga nyi unazange kuya wenyi ku chihela kuze kanda uchiyako kama?

1. 1. Kuya mu jila yize mbunge ye muyikusongwela.

2. 2. Kukaula akwenu mumu ngwo ayo kananyingika kanawa jila.

3. 3. Kufupa kunyingika kanawa jila kupalikila ha GPS, yimwe mapa, hanji muli umwe sepa yoze wakujikijila.

Nyi twasakula jila yitangu hanji yamuchiali, mutuhasa kuheta ha chihela chimwe, alioze hi ha chihela ko chize tunazange kuya. Alioze nyi twasakula jila yamuchitatu, mutupwa ni shindakenyo ngwetu mutuheta kanawa kuze tunazange kuya.

Mwono wetu uli ngwe umwe wenyi uze tunayi unatutwale ku matangwa a kulutwe kwa too ni uwahililo. Kashika, majila waze twakukwachilamo yiyulo yacho e matukwasa kumona nyi mutuhetako lume nyi ka.

Chipwe ngwe yiyulo yetu yinji yakukwata ku mwono wetu ha mashimbu anji hanji ha mashimbu akehe wika, nihindu yimwe yapwa yilemu chinji. Yiyulo yacho yakusolola yize twakunyonga hakutwala ku chipi ni chipema. Yiyulo yacho yakukwata nawa hali atu waze twazanga chinji ha mashimbu anji, chipwe ngwe muyipwa yipema hanji yipi. Yiyulo yino yinatale ha yuma ngwe:

• Kulimona cha pwo ni lunga ni ulo

• Mbunge yipema, mulimo ni mbongo

• Chize muhasa kulela ana

• Chize muhasa kutwama kanawa ni akwenu

Kuchi muhasa kunyingika nyi yiyulo ye muyikukwasa kuwahilila kulutwe lia matangwa hamwe ni usoko we?

Mutu ni mutu mahasa kulihula chihula chino: Yika muyingukwasa kukwata yiyulo yipema hakutwala ku chipi ni chipema?

Kaposhi yono malumbununa mumu liaka watamba kujikijila ha usongwelo uze uli mu Mbimbiliya hakutwala ku chipi ni chipema ni chize mahasa kukukwasa.