Na phanh bal lonak hmun ah kal na duh ahcun zeidah na tuah lai?

1. 1. A hmaan lai tiah na ruahmi lam ning in na kal lai.

2. 2. Midang nih lam an hngalh ko lai timi ruahchannak he an hnu in na zulh hna lai.

3. 3. GPS le khuaram hmanthlak ti bantuk zumh khawh a simi lamhruainak kha na zoh lai asiloah lam a hngal i zumh khawh a simi na hawikom pakhat sinah na hal lai.

Pakhatnak asiloah pahnihnak kan i thim ahcun hmun pakhatkhat cu kan phan ko lai. Asinain kal kan duhnak hmun cu a si men lai lo. Asinain pathumnak kan i thim ahcun kal kan duhnak hmun kan phan lai ti kha kan zumh khawh.

Kan nunnak cu khualtlawnnak lam he aa lo. A nuammi hmailei ah a kan hruaimi lam bantuk si seh ti kan duh. A nuammi hmailei ah kan phan lai maw, phan lai lo timi cu biakhiahnak kan tuah tikah khoika ah dah lamhruainak kan kawl timi cung ah tampi aa hngat.

Biakhiahnak tam deuh cu kan cung ah caan saupi tiang huham a ngei lem lo. Asinain biakhiahnak cheukhat tu cu kan cung ah caan saupi tiang huham a ngei. Biakhiahnak kan tuahmi nih a hmaan le hmaan lo kong he aa tlaiin zeidah kan zumh ti kha a langhter. Cu bantuk biakhiahnak cu kanmah le kan dawtmi hna cung ah a ṭhatnak in asiloah a ṭhatlonak in caan saupi tiang huham a ngei kho. A tanglei kong hna he aa tlaiin biakhiahnak kan tuah tikah a si:

• Nupa sinak le ṭhitumnak

• Dinfelnak, rian le tangka

• Fale zohkhenh ning

• Midang he i pehtlaih ning

Mah kong he aa tlaiin na biakhiahnak nih nangmah le na chungkhar kha a nuammi hmailei aan ngeihter hna lai maw, ngeihter hna lai lo ti kha zeitindah na hngalh khawh?

A hmaan le hmaan lo kong he aa tlaiin a ṭhami biakhiahnak tuah awkah zeinihdah a ka bawmh khawh?

Mah mekazin ah Baibal cu zeicah zumh khawh a si i mah nih zeitindah aan bawmh khawh timi kong a fianter lai.