Ti lac pejtelel miʼ mejlel lac mel chuqui wem bʌ
Cheʼ añic baqui a wom majlel pero mach a cʌñʌyic baqui cʌylem, ¿chuqui maʼ mel?
1. Maʼ majlel ti jiñi bij muʼ bʌ a ñaʼtan chaʼan jiñʌch muʼ bʌ caj i pʌyet majlel yaʼ baqui a wom cʼotel.
2. Maʼ tsajcañob majlel jiñi muʼ bʌ a ñaʼtan chaʼan i cʌñʌyob jiñi bij.
3. Maʼ sʌclan ti jumpʼejl mapa o maʼ cʼajtiben juntiquil a wamigo i cʌñʌ bʌ jiñi bij.
Mi jin tsaʼ yajca jiñi ñaxam bʌ chaʼpʼejl, tajol añʌch baqui mi caj a cʼotel, pero mach yaʼic baqui tsaʼ ñaʼta. Mi jin tsaʼ yajca jiñi i yuxpʼejlel, mucʼʌch caj a cʼotel yaʼ baqui tsaʼ ñaʼta.
Ti lac pejtelel lajal bajcheʼ añonla ti jumpʼejl viaje i yaʼ baqui la com cʼotel yaʼʌch baqui an tijicñʌyel, i chaʼan mi lac taj yaʼʌch cʌyʌl ti chuqui tac mi lac yajcan lac mel. Jin chaʼan, ñuc i cʼʌjñibal cheʼ mi lac wen qʼuel baqui mi caj lac sʌclan laj coltʌntel.
Isujmʌch chaʼan ñucʌch i cʼʌjñibal pejtelel chuqui mi lac mel, pero añʌch muʼ bʌ i mejlel i qʼuextan laj cuxtʌlel. Jiñʌch muʼ bʌ i pʌs mi la cujilʌch chuqui jiñi wem bʌ yicʼot mach bʌ weñic. I jiñi muʼ bʌ lac yajcan lac mel, ti wiʼil mi caj laj qʼuel mi mucʼʌch caj i coltañonla o maʼañic, mi mucʼʌch caj i coltan lac familia o maʼañic. I yaʼ ochem tac iliyi:
Jiñi piʼleya yicʼot jiñi ñujpuñel.
Cheʼ mi la cʌl chuqui i sujm o mi lac mel chuqui wem bʌ, jiñi eʼtel (troñel) yicʼot jiñi taqʼuin.
I cosʌntel la calobilob.
Bajcheʼ an la quicʼot yambʌlob.
¿Bajcheʼ miʼ mejlel a ñaʼtan chaʼan jiñi muʼ bʌ a mel mucʼʌch caj i yʌqʼueñet a tijicñʌyel yicʼot a familia?
Ti lac pejtelel yom mi laj cʼajtiben lac bʌ: ¿Chuqui mi caj i coltañon chaʼan mic mel chuqui wem bʌ?
Ti ili revista mi caj a qʼuel chucoch miʼ mejlel a ñop chaʼan jiñi Biblia mi caj i coltañet chaʼan maʼ mel chuqui wem bʌ.