Ényí a ba ná yi fí e a ma ko yi kpɔ́n ǎ é ɖé ɔ, étɛ́ a ka ná wa?

1. 1. Mlɛ̌ ali e a lin ɖɔ émí ɖó ná mlɛ́ é ɖé.

2. 2. Xwedó mɛ ɖěvo lɛ́ kpó linlin ɔ kpó ɖɔ yě tuun ali ɔ.

3. 3. Ba nǔ e ná xlɛ́ ali we, bo ɖó gǎnjɛwú é, ɖi tuto alǒkan alǒ ɔdinatɛ́ɛ jí tɔn e nɔ xlɛ́ ali mɛ é, ɖiɖe to tɔn, abǐ xɔ́ntɔn e wú a ɖeji dó ɖɔ é tuun ali e yi fí ɔ é ɖé.

Ényí mǐ sɔ́ nukɔntɔn ɔ, alǒ wegɔ́ ɔ ɔ, mǐ ná yi tɔ́n dó fí ɖé, é ka ná nyí fí e mǐ ba ná yi é dandan ǎ. Amɔ̌, ényí mǐ sɔ́ atɔngɔ́ ɔ ɔ, mǐ sixú ɖeji ɖɔ mǐ ná yi fí e mǐ xwe é.

Gbɛ mǐtɔn cí tomɛyiyi ɖé ɖɔhun, bɔ nǔ e ɖó nukún wɛ mǐ ɖe é wɛ nyí ɖɔ mǐ ná ɖó sɔgúdo awǎjijɛnɔ ɖé. Nǔ ka ná nyí mɔ̌, alǒ gbɔ ɔ, é ná sín fí e mǐ nɔ ba wěɖexámɛ lɛ́ ɖe hwenu e mǐ ja gbeta lɛ́ kɔn wá gbé é wú.

Gbeta e kɔn mǐ nɔ wá lɛ́ é gěgé nɔ nyí kléwún kléwún lɛ́, amɔ̌, ɖěvo lɛ́ tíin bo nɔ ɖo tají tawun. Gbeta tají énɛ́ lɛ́ wɛ ka nɔ ɖe linlin e mǐ nɔ ɖó dó nǔ e nyí nǔ ɖagbe kpó nǔ nyanya kpó é wú é xlɛ́. Gbeta énɛ́ lɛ́ ná wa ɖagbe alǒ nyanya nú mɛ ɖěɖěe mǐ yí wǎn ná lɛ́ é nú hwenu línlín. Nǔ élɔ́ lɛ́ ɖo gbeta énɛ́ lɛ́ mɛ:

• Xóɖóxámɛ kpó alɔwlíwlí kpó

• Nǔgbóɖiɖɔ, azɔ̌ kpó akwɛ́ kpó

• Lěe è ná kplɔ́n vǐ lɛ́ gbɔn é

• Lěe è ná wa nǔ xá mɛ ɖěvo lɛ́ gbɔn é

Nɛ̌ a ka sixú kú d’é jí ɖɔ gbeta e kɔn a ná wá ɖo ali énɛ́ lɛ́ nu é ná zɔ́n bɔ hwi kpó xwédo towe kpó ná ɖó sɔgúdo awǎjijɛnɔ ɖé gbɔn?

Nǔkanbyɔ́ e kan mǐ bǐ ɖo égbé é wɛ nyí: Étɛ́ ka sixú d’alɔ mì bɔ un ná wá gbeta ɖagbe lɛ́ kɔn dó nǔ e nyí nǔ ɖagbe kpó nǔ nyanya kpó é wú?

Xójláwéma élɔ́ ná tínmɛ nǔ e wú mǐ sixú ɖeji dó nǔ e Biblu ɖɔ dó nǔ e nyí nǔ ɖagbe kpó nǔ nyanya kpó é wú é wú, bo ná lɛ́ tínmɛ lěe é sixú d’alɔ mǐ gbɔn é.