Kon gusto mo magkadto sa isa ka lugar nga wala mo pa gid nakadtuan, ano ang himuon mo?

1. 1. Magkadto sa direksion nga sa banta mo insakto.

2. 2. Magsunod sa iban kay basi nakahibalo sila sang alagyan.

3. 3. Magsunod sa masaligan nga giya, pareho sang GPS, mapa, ukon sa isa ka masaligan nga abyan nga nakahibalo sang alagyan.

Kon pilion naton ang una ukon ikaduha, may malab-utan gid man kita pero basi indi sa lugar nga gusto naton kadtuan. Pero kon pilion naton ang ikatlo, makasalig kita nga makaabot gid kita sa aton destinasyon.

Ang aton kabuhi daw pareho sa pagbiyahe kag gusto naton nga makalab-ot ini sa malipayon nga palaabuton. Para makalab-ot didto, nagadepende ini sa kon diin kita nagapangita sang giya kon nagahimo sang mga desisyon.

Ang kalabanan nga mga desisyon nga ginahimo naton may gamay lang nga epekto sa aton kabuhi pero ang pila sa sini importante gid. Ining importante nga mga desisyon nagapakita kon ano ang aton ginapatihan nga husto kag sala. Ini nga mga desisyon may maayo ukon malain nga epekto sa aton kag sa aton mga pinalangga sa malawig nga tion. Ini nagalakip sa:

• Sex kag pag-asawahay

• Pagka-honest, obra, kag kuarta

• Kon paano padakuon ang kabataan

• Kon paano trataron ang iban

Paano ka makasigurado nga ang imo mga desisyon sa sini magaresulta sa malipayon nga palaabuton para sa imo kag sa imo pamilya?

Ang pamangkot nga dapat sabton sang kada isa sa aton amo ini: Ano ang makabulig sa akon nga makahimo sang maayo nga mga desisyon kon ano ang husto kag sala?

Ini nga magasin magapaathag kon ngaa ang Biblia masaligan nga giya sa kon ano ang husto kag sala kag kon paano ini makabulig sa imo.