Indu tji mo vanga okuyenda koṋa ku u hi ya rora okuyenda, ove mo tjiti vi?

1. 1. Okuyenda mondjira ndji mo munu kutja ondji ri yo.

2. 2. Okukongorera varwe, nokuzera kutja owo mave tjiwa ondjira.

3. 3. Okutara kotjikarata tjehi tji matji raisa ondjira, poo okupura epanga ndi mari tjiwa ondjira.

Indu tji twa toorora epu etenga noritjavari, matu kara nomuhunga posi ya mape ya atu ha kavaza koṋa ku matu vanga okuyenda. Nungwari indu tji twa toorora epu oritjatatu, eṱe matu yenene okukara nongamburiro kutja matu kavaza koṋa ku matu vanga okuyenda.

Ehupo retu ri ri tjimuna okutoora ouyenda mbu matu zeri kutja mau tu twara koruyaveze oruwa. Kutja twa kavaza ngo poo katu kavazere, matji zu kweṱe kutja matu paha pi omuhunga indu tji matu tjiti ozondando.

Potuingi tu tjita ozondando nḓe he ri ozonanḓengu, posi ya zarwe ze rira ozonanḓengu tjinene. Ozondando inḓa ozonanḓengu, ze raisa oumune wetu pokati kouwa nouvi. Nu ozondando otja inḓo ze ṱuna kweṱe na imba mbu twa suvera oure woruveze orure, momuano omuwa poo omuvi. Ozondando nḓo ze kamburira mo omapu tjimuna nga:

• Omahakaeneno wonyama norukupo

• Ouatjiri, oviungura, novimariva

• Omuano wokukurisa ovanatje

• Omuano wokutjinda varwe

Omomuano uṋe mu mo yenene okutjiwa kutja ozondando nḓu wa tjiti maze tjiti kutja ove neṱunḓu roye mu kare noruyaveze oruwa?

Atuhe matu sokuripura epuriro ndi: Ovikwaye mbi mavi ndji vatere okutjita ozondando ozombwa kutja mbi pangure pokati kouwa nouvi?

Okambo nga make kahurura kutja ongwaye tji matu yenene okukara nongamburiro mu imbi Ombeibela mbi i hungira ohunga nouwa nouvi, nokutja omomuano uṋe mu mai yenene okukuvatera.