No kayatmo ti agpasiar iti lugar a saanmo pay a napnapanan, ania ti aramidem?

1. 1. Surotem ti dalan nga ammom a husto.

2. 2. Surotem ti dadduma bareng ammoda ti dalan.

3. 3. Agusarka iti GPS wenno mapa, wenno agdamagka iti mapagtalkam a gayyem a makaammo iti dalan.

No pilientayo ti umuna wenno maikadua, mabalin nga adda met pakadanonantayo, ngem saan nga iti kayattayo a papanan. Ngem no ti maikatlo ti pilientayo, masiguradotayo a makadanontayo iti destinasiontayo.

Ti biagtayo ket kas iti panagbiahe nga agturong iti namnamaentayo a naragsak a biag. Makadanontayo iti dayta a destinasion no umiso ti pagpatulongantayo nga agaramid kadagiti desision.

Kaaduan kadagiti desisiontayo ket mabalin a bassit ti epektona iti biagtayo. Ngem adda met dagiti dakkel ti epektona. Ipakita dagita no ania ti ibilangtayo nga umiso ken di umiso. Ti epekto dagiti desisiontayo ket mabalin a pagsayaatan wenno pagdaksantayo ken dagiti ay-ayatentayo iti nabayag a panawen. Karaman kadagiti desisionantayo ket ti:

• Seks ken panagasawa

• Panagbalin a mapagtalkan, trabaho, ken kuarta

• Panangpadakkel kadagiti annak

• Panangtrato iti dadduma

Kasanom a masigurado a dagiti desisionmo kadagita ket mangparagsakto kenka ken iti pamiliam?

Masapul a panunotentayo daytoy a saludsod: Ania ti makatulong kaniak tapno maammuak ti umiso ken di umiso no agdesisionak?

Ilawlawag daytoy a magasin no apay a makapagtalektayo iti ibagbaga ti Biblia nga umiso ken di umiso ken no kasano a makatulong kadatayo dagita.