Ũtonya kwĩka ata ethĩwa nũkwenda kũthi vandũ ũtaathi ĩngĩ?

1. 1. Wĩsĩla o vala ũũsũanĩa nĩ vo waĩle kwĩsĩla?

2. 2. Ũatĩĩa angĩ wĩkwatĩtye kana nĩmesĩ nzĩa?

3. 3. Ũatĩĩa syĩndũ sya kwĩkwatwʼa ta GPS, mevu, kana mũnyanya ũmũĩkĩĩe na wĩsĩ nzĩa?

Twaatĩĩa ũndũ wa mbee kana wa kelĩ, no tũvike o vandũ ĩndĩ ndwĩthĩa ti vala twĩĩvangĩte kũthi. Ĩndĩ twanyuva ũndũ wa katatũ, no tũĩkĩĩe vyũ kana nĩtũũvika vala twĩĩendete.

Thayũ witũ wĩthĩawa ũilye o ta kyalo. O ũndũ twĩ kyalonĩ twĩthĩawa twĩkwatĩtye kũvika vala tũendete, nowʼo twĩkwatĩtye kwĩsa kũtanĩa thayũ ĩvinda yũkĩte. Na vala tũũmantha ũtao yĩla tũkwĩka motwi nĩvo vatonya kũtuma twĩsa kũtanĩa ĩvinda yĩu kana tũema kũyĩtanĩa.

O na kau motwi maingĩ twĩkaa thayũnĩ methĩawa mate ma vata mũno, amwe methĩawa me ma vata vyũ. Motwi asu mavuanasya woni witũ ĩũlũ wa ũla ũseo na ũla ũthũku. Motwi ta asu no methĩwe na mosyao maseo kana mathũku kwa ĩvinda yĩasa, kwitũ na kwa endwa maitũ. Makonetye maũndũ ta:

• Kũmanyana kĩ-mwĩĩ na mũtwaano

• Ũĩkĩĩku, wĩa, na mbesa

• Ũndũ ũtonya kũea syana

• Ũndũ waĩle kũkua ala angĩ

Ũtonya ata kũĩkĩĩa vyũ kana motwi maku maũndũnĩ asu makatuma we na mũsyĩ waku mwĩthĩwa na ĩvinda ĩseo yũkĩte?

Kĩla ũmwe witũ no ekũlye-ĩ: Nĩ kyaũ kĩtonya kũndongoesya nĩtwʼe ũla ũseo na ũla ũthũku?

Ĩkaseti yĩĩ nĩyĩeleetye nĩkĩ tũtonya kũĩkĩĩa kĩla Mbivilia ĩwetete ĩũlũ wa ũla ũseo na ũla ũthũku.