Ye ŋcaɣ se ŋɖɔ nʋmɔʋ nɛ ŋwolo ɖenɖe ŋtiwolo wiɖiyi nɛ ŋna yɔ, ɛbɛ ŋkaɣ labʋ?

1. 1. Ŋpɩzɩɣ nɛ ŋkpaɣ paa nʋmɔʋ ŋgʋ ŋsɔɔlaa yɔ.

2. 2. Ŋpɩzɩɣ nɛ ŋtɩŋ lalaa nɛ lɩmaɣzɩyɛ se pɩtɩla pasɩm nʋmɔʋ.

3. 3. Ŋpɩzɩɣ nɛ ŋlabɩnɩ tʋmɩyɛ wonuu ŋgʋ papɩzɩɣ nɛ pataa-kʋ liu yɔ ɛzɩ GPS, tɛtʋ anjaʋ, yaa ŋpɔzɩ ña-taabalʋ weyi ŋtaɣ-ɩ liu se ɛsɩm nʋmɔʋ ŋgʋ yɔ.

Ye ɖɩkpaɣ lɩmaɣzɩyɛ kajalaɣ ñɩnɖɛ yaa naalɛ ñɩnɖɛ yɔ ɖɩkaɣ talʋʋ ɖoli, ɛlɛ pɩtɩla pɩɩkɛɣnɩ ɖenɖe ɖɩɩsɔɔlaa se ɖiwolo yɔ. Ɛlɛ ye ɖɩkpaɣ lɩmaɣzɩyɛ naadozo ñɩnɖɛ yɔ pɩtʋʋ fɛyɩ se ɖɩkaɣ talʋʋ ɖenɖe ɖɩɩsɔɔlaa se ɖiwolo yɔ.

Ðe-wezuu wɛ ɛzɩ nʋmɔʋ ɖɔm yɔ, nʋmɔʋ ɖɔm mbʋ ɖɩtaɣ liu se piyeki nɛ ɖihiɣ koboyaɣ cee wayɩ yɔ. Sakɩyɛ taa lɛ, lɔŋ tasʋʋ mbʋ ɖɩlakɩnɩ tʋmɩyɛ nɛ ɖɩkpakɩɣ lɩmaɣza yɔ mbʋ yekina se ɖɩtalɩ yaa ɖɩtaatalɩ ɖenɖe ɖɩɖʋwa se ɖiwoki yɔ.

Lɩmaɣza wena ɖɩkpakɩɣ yɔ, paa a-taa hɔɔlʋʋ sɔsɔʋ ɩkaɣ wɛnʋʋ ɖoŋ pazɩ na ɖɔ-yɔɔ yɔ, a-taa naayɛ lɛ akaɣ wɛnʋʋ ɖoŋ siŋŋ ɖɔ-yɔɔ nɛ pɩkɩlɩ. Lɩmaɣza wena ɖɩkpakɩɣ yɔ awɩlɩɣ mbʋ ɖɩmaɣzɩɣ se pɩkɛ kɩbam nɛ kɩdɛkɛdɩm wezuu kɩbaŋʋ caɣʋ nʋmɔʋ taa yɔ. Lɩmaɣza ana akaɣ wɛnʋʋ ɖoŋ kɩbaŋ yaa kɩdɛkɛdɩŋ ɖa-maɣmaɣ nɛ mba ɖɩsɔɔlaa yɔ pɔ-yɔɔ alɩwaatʋ sakɩyɛ. Lɩmaɣza ana a-taa naayɛ yɔ:

• Kʋzʋʋ nɛ nesi ɖɔkʋʋ

• Toovenim wɛʋ, tʋmɩyɛ, nɛ liidiye

• Piya yɔɔ cɔnʋʋ

• Wɛtʋ ndʋ pɩwɛɛ se ɖɩwɛɛnɩ lalaa yɔɔ yɔ

Ɛbɛ pɩzɩɣ pɩsɩnɩ-ŋ nɛ ña-taa tɛ se lɩmaɣza wena ŋkpakɩɣ hɔɔlɩŋ ɛnɩ ɩ-taa yɔ akaɣ yebu nɛ ña nɛ ñɔ-hɔʋ ihiɣ koboyaɣ cee wayɩ?

Tɔm tʋnɛ ɖa-taa paa anɩ pɔzʋʋ ɛ-tɩ: Ɛbɛ pɩzɩɣ pɩsɩnɩ-m nɛ mankpaɣ lɩmaɣza kɩbana mbʋ pɩkɛ kɩbam nɛ kɩdɛkɛdɩm yɔ pɩ-hɔɔlʋʋ taa?

Takayaɣ kanɛ kawɩlɩɣ mbʋ pʋyɔɔ ɖɩpɩzɩɣ nɛ ɖɩtaa liu tɔm ndʋ Bibl yɔɔdʋʋ kɩbam nɛ kɩdɛkɛdɩm yɔɔ nɛ ɛzɩma kɩpɩzɩɣ nɛ kɩsɩnɩ-ŋ yɔ.