Si bu krê viaja pa un lugar ki nunka bu ka baba antis, kuzê ki bu ta fazeba?

1. 1. Bai na un kaminhu ki bu ta atxa ma é sértu.

2. 2. Bai tras di otus algen ku speransa ma es sabe kaminhu sértu.

3. 3. Djobe un gia di kunfiansa sima un GPS, un mapa ô un amigu ki bu ta kunfia na el ki konxe kel kaminhu.

Si bu skodje opson un ô dôs, talvês bu ta txiga na algun lugar, má kel-li ka krê fla ma bu ta txiga na undi ki bu krê baba. Má, si bu skodje opson três bu pode kunfia ma bu ta txiga na undi ki bu krê bai.

Nos vida é sima un viajen, i nu ta spera ma fin di kel viajen ta ser un futuru filís. Si nu ta txiga la ô nau, ta dipende txeu di undi ki nu ta djobe konsedju pa toma disizons.

Maioria di kes disizon ki nu ta toma ka ta afeta nos vida txeu. Má ten alguns disizon ki é txeu inportanti i es ta mostra kuzê ki nu ta kridita ma é dretu ô mariadu. Kes disizon li ta afeta, di manera dretu ô mariadu, nos vida i vida di kes algen ki nu ta ama pa txeu ténpu. Kes disizon li ta involve asuntus sima:

• Séksu i kazamentu

• Onestidadi, trabadju i dinheru

• Modi ki nu ta kria fidjus

• Modi ki nu ta trata otus algen

Modi ki bu pode ten serteza ma disizons ki bu ta toma ta djuda bo ku bu família ten un futuru filís?

Nos tudu nu debe pensa na kel pergunta li: Kuzê ki pode djuda-m toma bons disizon sobri kuzê ki é dretu i kuzê ki é mariadu?

Kel revista li ta ben splika pamodi ki nu pode kunfia na kuzê ki Bíblia ta fla sobri kuzê ki é dretu i kuzê ki é mariadu, i modi ki el pode djuda-nu.