Kana nge ke zola kukwenda kisika mosi ya nge me kwendaka ntete ve, nki nge ta sala?

1. 1. Nge ta kwenda na nzila yina nge ke yindula nde yo kele mbote.

2. 2. Nge ta landa bantu ya nkaka ti ngindu nde bo ke zaba nzila.

3. 3. Nge ta sosa kima mosi ya bo ke tudilaka ntima, mu mbandu karti mosi to kuyula nduku mosi ya nge ke tudilaka ntima na kusonga nge nzila.

Kana nge pona mvutu ya ntete to ya zole, yo ta nata nge na kisika mosi buna kansi kisika yango lenda vanda ve yina ya nge kanaka kukwenda. Kansi kana nge pona mvutu ya tatu, nge lenda vanda sire nde nge ta kuma kisika nge kanaka kukwenda.

Luzingu na beto kele bonso kusala vwayaze yina lenda nata beto na kuzinga na kiese na bilumbu ke kwisa. Kisika ya beto ke sosa bandongisila sambu na kubaka balukanu ta sala nde beto kuma to ve.

Badesizio mingi ya beto ke bakaka ke vandaka ya fioti, kansi ya nkaka ke vandaka mpenza mfunu mingi. Badesizio yina ya mfunu ke monisaka mambu yina beto ke yindulaka nde yo kele mbote to mbi. Yo lenda soba luzingu na beto mpi ya bantu ya beto ke zolaka sambu na ntangu ya nda, yo vanda na mutindu ya mbote to ya mbi. Badesizio yango ke tadilaka mambu bonso:

• Kuvukisa nitu mpi kubala

• Kuvanda masonga, kisalu mpi mbongo

• Mutindu ya kusansa bana

• Mutindu ya kusadila bantu ya nkaka mambu

Inki mutindu nge lenda zaba kana badesizio ya nge ke baka na mambu yai ta sala nde nge ti dibuta na nge kuzinga na kiese na bilumbu ke kwisa?

Ngiufula ya beto yonso fwete kudiyula yo yai: Inki lenda sadisa mono na kuzaba mambu ya mbote mpi ya mbi sambu mono baka balukanu ya mbote?

Zulunalu yai ta monisa sambu na nki beto fwete ndima mambu yina Biblia ke tubaka nde yo kele mbote to mbi mpi mutindu yo lenda sadisa beto.