Wamanza erighenda eyo wuthewathahika, iwukendi kolhaki?

1. 1. Lhaba omwa nzira eya wukalengekanaya wuthi yikalholha eyo wukaya.

2. 2. Kwama abandi, iwunawithe amaha wuthi banasi enzira.

3. 3. Kolesaya obusondoli obwanga yiketherwa, nge GPS, emapu, kutse eribulya omunywani omuyiketherwa oyuwasi enzira.

Thwamasombolha eky’erimbere kutse ekyakabiri, ithukendi hika bulebe aliwe ithuthahika aho thwanzire eriya. Aliwe thwamasombolha ekyakasathu, ithukendi yikethera ku thukendi hika aho thukaya.

Engebe yethu yiri ng’olhughendo—olho thuyikethere ku lhukendi thukolya okwa bibuya. Erihikayo n’erithend’ihikayo bikasighikira okwa hawama sonderya obusondoli wukathwamu.

Ebingyi ebya thukathwamu byangana thuhambako kuke, ebindi ibyathuhambako kutsibu. Bikakanganaya amalengekania wethu okwa by’esyongeso—amalengekania wethu okwa kihikire n’ekithahikire. Erithwamu ng’eryo iryangana thuhambako ndeke kutse nabi haghuma n’abo thwanzire habw’omughulhu muuli. Eki mwamuli erithwamu okwa myatsi nga:

• Emyatsi y’engyingo n’obutheke

• Eribya mw’okwenene, omubiiri, n’esyosente

• Ngoku wanga lembera abaana

• Ngoku wanga kolongana n’abandi

Wanga kakasya wuthi ngoku erithwamu lyawu okw’ebi lyangana leka iwe n’ab’efamile yawu imwasyabana etseme?

Eky’obuli mughuma w’okw’ithwe akayibulhaya kya kino: Ni kyahi ekikendi sondolha erithwamu lyaghe okwa by’esyongeso?

Egazeti eno yikendi soborera ekikaleka e Biblia iyabya iyeyanga yiketherwa omw’ithuhererya obusondoli obuhambire okwa by’esyongeso kandi ngoku yanga kuwathikya.