Luungeñi kuli mubata kuyo pota kwa sibaka sesiñwi ko musika pota kale, ki lika mañi zene mukaeza?

1. 1. Kana nemukaya mwa nzila yemunahana kuli ki yona yelukile?

2. 2. Kana nemuka latelela feela babañwi ka kunahana kuli baziba nzila komuya?

3. 3. Kana nemuka bata ketelelo ka kuitusisa GPS ili mapa, kamba kana nemuka buza mulikanaa mina yomusepile yaziba komuya?

Haiba luketa akalezo yapili kamba yabubeli, lukayo fita kwa sibaka sesiñwi kono isiñi luli kwa sibaka kolubata kuya. Haiba luketa akalezo yabulaalu, lukaba ni buikolwiso bwa kuli lukafita koluya.

Bupilo bwaluna buswana sina musipili, mi lusepa kuli musipili wo uka lulibisa kwa bupilo bwa kwapili bobutabisa. Kuli lukone kuba ni bupilo bobunde kwapili, sihulu lutokwa kuziba kolukupa tuso halueza likatulo.

Fokuñwi likatulo zelueza likona kuama bupilo bwaluna ka nako yetelele kamba yekuswani, mi zeñwi haki za butokwa kono zeñwi ki za butokwa hahulu. Likatulo za butokwa ze, libonisa kuli zelulumela lilukile kamba halisika luka. Likatulo zeo likaama bupilo bwaluna hamoho cwalo ni batu bolulata ka nako yetelele, ibe kuli ki ka nzila yende kamba yemaswe. Likatulo zeo likopanyeleza lika zecwale ka:

• Somano ni linyalo

• Busepahali, mubeleko, ni masheleñi

• Mwakuhuliseza bana

• Mwakupilisanela ni babañwi

Mukona kuziba cwañi kuli likatulo zemuezize likatahisa kuli mukone kupila bupilo bobunde kwapili hamoho ni lubasi lwamina?

Kaufelaa luna lwaipuzanga puzo ye: Ki lika mañi zekona kunitusa kueza likatulo zende ka za lika zelukile kamba zesika luka?

Magazini ye, ikatalusa libaka halukona kusepa zeibulela Bibele ka za lika zelukile ni zesika luka.