Vyuma muka mweji kulinganga kachi nge muli nakuya kuchihela kuze kamwatachikizako?

1. 1. Uno mweji kuyanga mujila yize munashinganyeka ngwenu mwatela kuya tahi?

2. 2. Kutala mweji kukavangizanga vatu mwomwo yakushinganyeka ngwenu vanatachikiza jila tahi?

3. 3. Uno mweji kuzachisanga GPS, chipwe mapu, chipwe kuhulisa sepa lyenu uze mwafwelela atachikiza jila tahi?

Kachi nge natusakula nambala yatete chipwe yamuchivali, kaha tunahase kuya ungeji oloze pamo katweshi kuheta kuchihela tuli nakuyako. Oloze nge natusakula nambala yamuchitatu kaha natuheta chikupu kuchihela kuze tunakusaka kuya.

Nakuyoya chetu chinafwane nge tuli nakutambuka ungeji, kaha twafwila kukapwa vakuwahilila kulutwe. Kuheta chipwe kuhona kuheta kuchihela tuli nakuya chapendamina hajindongi tweji kukavangizanga hakusakula vyakulinga.

Numba tuhu vyuma tweji kusakulanga kavyakwata chikuma hakuyoya chetuko, oloze vyuma vimwe vinahase kwalumuna kuyoya chetu chosena. Evi vyuma vyavilemu tweji kusakulanga vikiko vyeji kusololanga vyuma vize twamona kupwa vyakwoloka navize twamona kupwa vyakuhenga. Kaha vinahase kulingisa chiyoyelo chetu nechi chavatu twazanga chipwenga chamwaza chipwe chachipi. Vyuma tweji kusakulanga mwaliweza vyuma vyakufwana nge:

• Kulisavala naulo

• Kashishi, namilimo najimbongo

• Mwakulelela vana

• Mwakuyoyela navakwetu

Munahase kutachikiza ngachilihi ngwenu vyuma namusakula kutalisa kuvihande kana navikalingisa enu natanga yenu mukapwe vakuwahilila?

Chihula twatela kulihulisa tuvosena shina: Jindongi muka jatela kungukafwa hakusakula vyakulinga?

Yino mangazini nayilumbununa ovyo Mbimbiliya yapwila najindongi jize jinahase kumitwaminyina nomwo yinahase kumikafwa.