Kidwaro dhi kamoro ma pok nidhiyega, onego itim ang’o?

1. 1. Ichom kama iparo ni onego idhiye.

2. 2. Iluw jomamoko kigeno ni ging’eyo yo.

3. 3. Iti gi map, GPS, kata ipenj osiepni moro migeno mong’eyo yorno maber.

Ka watiyo gi paro mokwongo kata mar ariyo, en adier ni wabiro chopo kamoro, en mana ni samoro ok obi bedo kama ne wadwaro dhiye. Kata kamano, ka watiyo gi paro mar adek, wanyalo bedo gadier ni wabiro chopo kama ne wadwaro dhiye.

Ngima ma wadakie sani chal gi wuoth ma rabora ma wageno ni gikone biro kelonwa mor madier. Chopo e giko wuodhno biro luwore gi gima wayiero mondo otawa.

Kata obedo ni thoth yiero ma watimo nyalo loko ngimawa mana kuom kinde machuok, yiero moko to nyalo loko ngimawa chuth. Gibiro nyiso paro ma wan-go e wi gik mabeyo kod gik maricho. Yiero ma watimo nyalo mulowa kod osiepewa kuom kinde malach e yo maber kata e yo marach. Yiero ma kamago oriwo weche kaka:

• Nindruok kod kend

• Bedo jaratiro, tich, kod pesa

• Pidho nyithindo

• Kaka waneno jomamoko

Ere kaka inyalo bedo gadier ni yiero mibiro timo e wechego biro keloni mor madier kaachiel gi joodi?

Penjo ma ng’ato ka ng’ato kuomwa onego openjre en ma: Ang’o ma nyalo taya mondo atim yiero mabeyo?

Gasedni lero gimomiyo Muma e buk monego otawa kod kaka onyalo konyowa.