El̦aññe kwaar kõn̦aan etal ñan juon jikin kwõjjañin kar etal ñane, ta eo kwõn kar kõm̦m̦ane?

1. 1. Bõk ial̦ eo kwõj l̦õmn̦ak bwe em̦m̦an ñan bõke.

2. 2. Anõke ro jet im kõjatdikdik bwe rejel̦ã ia eo rej etal ñane.

3. 3. Bõk jipañ jãn juon kein jipañ me ejineete jikin eo ãinwõt juon GPS, juon mab, ak juon m̦õttam̦ me kwõj lõke im el̦ap an jineete jikin eo.

El̦aññe jej kããlõte men eo kein kajuon ak karuo, jenaaj tõpare juon jikin ak bõlen eban jikin eo jaar kõn̦aan jibadeke. Bõtab, ñe jenaaj kããlõte men eo kein kajilu, jemaroñ lõke bwe jenaaj tõpare ijo jekõn̦aan jibadeke.

Mour eo ad ej ãinwõt juon ial̦ jej etetal ie ñan jibadeke juon jikin—jej kõtmãne bwe ial̦ in enaaj tõll̦o̦k kõj ñan juon ilju im jekl̦aj elem̦õn̦õn̦õ. Ad tõpare jikin in ak jaab ej wawa ioon ia eo jej kappok jipañ jãne ñan jipañ kõj kõm̦m̦ani pepe ko.

Em̦ool bwe ewõr jet pepe ko jej kõm̦m̦ani me reddik, bõtab ewõr pepe ko jet jej kõm̦m̦ani me rel̦l̦ap im raorõkl̦o̦k. Pepe ko ad rej kaalikkar ta ko jej l̦õmn̦ak bwe rejim̦we im rebõd. Pepe rot kein renaaj l̦ap an jelõt kõj im ro jej yokwe er, im emaroñ ilo juon wãween em̦m̦an ak juon wãween enana. Pepe kein rej kitibuj pepe ko ikijjeen:

• Ad babu ippãn juon armej im mourin m̦are

• Jerbal, jããn, im ad kwal̦o̦k m̦ool

• Wãween ad katakin im lale ajri ro nejid

• Wãween ad kõm̦m̦an ñan ro jet

Ewi wãween am̦ maroñ jel̦ã bwe jokãlõt ko am̦ ikijjeen men kein renaaj tõll̦o̦k kwe im baam̦le eo am̦ ñan juon ilju im jekl̦aj em̦m̦an?

Kajjitõk eo elõñ iaad jej jelm̦aiki ej eñin: Ta eo emaroñ jipañ eõ ñan kõm̦m̦ani jokãlõt ko rem̦m̦an ñe ej itok ñan ta ko rejim̦we im ta ko rebõd?

Naan in Keeañ in enaaj kõmel̦el̦e unin am̦ maroñ lõke ta eo Baibõl̦ ej ba ikijjeen ta ko rejim̦we im rebõd im wãween an maroñ jipañ eok.