¿Tlake tijchiuaskia tlaj tijneki tiasiti kampa amo kema tiajtok?

1. 1. Tiaskia san kampa ta timoiljuia kinamiki tias.

2. 2. Tikintokiliskia katli timoiljuia kimatij kenijkatsa asitij.

3. 3. Tijtekiuiskia GPS, se mapa o tijtlajtlaniskia se mouampox katli kimati kenijkatsa asiti.

Tlaj tias kampa timoiljuia eli nopa ojtli o tlaj tikintokilis sekinok, kena tiasiti kanajya, pero amo tiasiti kampa ta tijnekiyaya. Pero tlaj tijtekiuis se GPS o se mapa, temachtli tiasiti kampa tijneki.

Tonemilis eli kej kema tijnekij tiasitij kanajya, uan nochi tijnekij tijpantisej nopa ojtli tlen techuikas kampa tiyolpakisej. Tlen nama tijtlapejpenisej uelis kichiuas ma tiasitij nopaya, yeka moneki tijpiasej tlen techpaleuis kuali ma tijtlapejpenikaj tlen tijchiuasej.

Se keski tlamantli tlen tijtlapejpeniaj amo tlauel kipatlas tonemilis, pero sekij kena. Uan tlen tijtlapejpeniaj kinextia tlake tlamantli tikitaj kuali uan tlake amo. Nojkia, tlen tijtlapejpeniaj uelis kichiuas kuali ma tiitstokaj o amo, o uelis kichiuas ma mopatla ininnemilis katli tikinikneliaj. Kiampa pano kema moneki tijtlapejpenisej ni tlamantli:

• ¿Timotekas iuaya se akajya, timonamiktis o timosiuajtis?

• ¿Titlakajkayauas, ipan tlake titekitis uan kenijkatsa tikitas tomij?

• ¿Kenijkatsa tikiniskaltis mokoneuaj?

• ¿Kenijkatsa timouikas ininuaya sekinok?

¿Tlake mitspaleuis kuali xijtlapejpeni se tlen ni tlamantli uan kiampa ta uan mochampoyouaj inyolpakisej?

Nojkia, moneki timotlatsintokisej: “¿Ika tlake uelis nimoyakanas para nijmatis tlake kuali uan tlake amo?”.

Ipan ni pilamochtsi tikitas kenijkatsa Biblia uelis mitsyakanas para tijmatis tlake kuali uan tlake amo, uan kenijkatsa uelis mitspaleuis.