Ubungenzani nxa ufuna ukuya endaweni ongakaze ufike kuyo?

1. 1. Ubungaphonguhamba ngendlela oyicabangayo.

2. 2. Ubungalandela abanye uthembe ukuthi bayayazi indlela.

3. 3. Ubungasebenzisa i-GPS kumbe imephu loba ubuze umngane omthembayo.

Nxa ubungakhetha okubili okokuqala kulalapho ozafika khona, kodwa hatshi lapho oyabe uhlose ukuyakhona. Nxa ubungakhetha okokucina awusoze uthandabuze ukuthi uzafika lapho ofuna ukuyakhona.

Impilo yethu layo injengohambo futhi silethemba lokuthi sizafika lapho esifuna ukuyakhona. Kodwa ukuthi sizafika yini kumbe hatshi kuzakuya ngokuthi siqondiswa ngubani nxa sisenza izinqumo.

Lanxa ezinye izinqumo esizenzayo zizincane, kulezinye eziqakatheke kakhulu okokuthi ziyayitshintsha impilo yethu. Izinqumo lezo zitshengisa ukuthi siqakathekisani empilweni lokuthi siyakwazi yini okuqondileyo lokungaqondanga. Zingasinceda kumbe zisilimaze njalo zingatshintsha lempilo zabantu esibathandayo. Phela esikukhethayo kunganceda abantu esibathandayo kumbe kubalimaze. Izinqumo zakhona zigoqela lezi ezilandelayo:

• Indaba zemacansini lomtshado

• Ukuthembeka, ukusebenza kanye lemali

• Ukukhulisa abantwana

• Indlela okumele siphathe ngayo abanye

Manje ungakwazi njani ukuthi indlela okhetha ngayo endabeni lezi ingakunceda wena kanye lemuli yakho futhi ilenze libe ngabantu abathokozayo?

Ngamunye wethu kumele azibuze umbuzo lo: Kuyini okuzanginceda ukuthi ngibekwazi okuqondileyo lokungaqondanga?

Imagazini le izakunceda ubone ukuthi kungani kumele uvume ukuqondiswa liBhayibhili nxa usenza izinqumo lokuthi ukwenza njalo kuzakunceda njani.