Ngele owa hala okuya kehala hoka inoo enda nando onale, oto ka ninga po shike?

1. 1. Mbela oto ka ya nondjila kehe ndjoka wa hala?

2. 2. Mbela oto ka landula yalwe, wu na einekelo kutya oyu uka hoka to yi?

3. 3. Nenge oto ka longitha GPS, okaalita, nenge wu pule kuume omwiinekelwa ngoka e shi kehala hoka to yi?

Ngele owa hogolola po eetopo lyotango nenge etiyali otashi vulika wu ka iyadhe kehala limwe li ili, ihe haahoka wa hala okuya. Ngele owa hogolola po eetopo etitatu, kapu na omalimbililo kutya oto ka vula oku ka thika kehala hoka wa hala okuya.

Onkalamwenyo yetu oya fa olweendo, ndoka tu na einekelo kutya otali ke tu etela onakuyiwa ombwanawa. Kutya nduno otalu ke tu thikitha kethikilo nenge hasho, shoka osha ikolelela konzo hoka hatu kongo ewiliko uuna tatu ningi omatokolo.

Omatokolo gamwe ngoka hatu ningi ihaga gumu lela onkalamwenyo yetu, ihe gamwe oge yi gumu. Omatokolo ga simana, ngoka hatu ningi, ohaga holola etaloko lyetu li na ko nasha naashoka shi li mondjila naashoka sha puka. Ohaga vulu oku tu etela uuwanawa tawu kalelele nenge uuwinayi, nohaga gumu wo yalwe. Omatokolo ngono oga kwatela mo iinima ngaashi:

• Omilalo nondjokana

• Okukala omunashili, iilonga niimaliwa

• Nkene wu na okuputudha aanona

• Nkene wu na okuungaunga nayalwe

Ongiini to vulu okukala nuushili kutya omatokolo ngoka to ningi ngele tashi ya piinima mbyoka otage ke ku etela onakuyiwa ombwanawa nosho wo yaandjeni?

Atuheni otatu vulu okwiipula kutya: Oshike tashi ka kwathela ndje ndi ninge etokolo lyomondjila?

Oshifo shika otashi yelitha kutya omolwashike tatu vulu okwiinekela shoka Ombiimbeli tayi ti kombinga yaashoka shi li mondjila naashono sha puka nonokutya ongiini tayi vulu oku tu kwathela.