Khuyini ongayenza nange ufuna ukuya endaweni ongakhenge khewuye kiyo?

1. 1. Ungakhamba ngendlela ocabanga bona kufuze ukhambe ngayo.

2. 2. Ungalandela abanye, unethemba lokuthi bayayazi indlela.

3. 3. Ungasebenzisa umthombo othembekileko, njenge-GPS, umebhe namkha umngani omthembako oyaziko indlela.

Nasingakhetha indlela yokuthoma namkha yesibili, singafika endaweni ethileko kodwana ingasi endaweni esifuna ukuya kiyo. Nasikhetha indlela yesithathu singaqiniseka ngokuthi sizokufika endaweni esiya kiyo.

Ukuphila kwethu kufana nekhambo, esinethemba lokobana lizosilethela ingomuso elithabisako. Ukuthi sizokufika namkha awa, kuyame endaweni esifuna kiyo iseluleko nasithatha iinqunto.

Nanyana iinqunto ezinengi esizithathako zingakuthinti kangako ukuphila kwethu, ezinye ziqakatheke khulu. Ziveza lokho esikukholelwako nendlela esiqala ngayo okulungileko nokungakalungi. Iinqunto ezinjalo zizokuthinta ukuphila kwethu nekwabantu esibathandako isikhathi eside, kungaba ngendlela ehle namkha embi. Iinquntwezi zihlanganisa nokulandelako:

• Zomseme nomtjhado

• Ukuthembeka, umsebenzi nemali

• Indlela yokukhulisa abantwana

• Indlela yokusebenzelana nabanye

Ungaqiniseka njani bona okukhethako eendlelenezi kuzokulethela wena nomndenakho ingomuso elithabisako?

Umbuzo soke esizibuza wona uthi: Khuyini engangisiza ngithathe iinqunto ezihle malungana nokulungileko nokungakalungi?

Umagazini lo uzokuhlathulula bona kubayini singasithemba isinqophiso sokuziphatha esifumaneka eBhayibhelini nokuthi singasisiza njani.