Ngati mufuna kuluta ku malo kwamukaliyolutako, kansi mungacite cinji?

1. 1. Kukonkha njila yamuona kuti ikufwikisheni kwamukuya.

2. 2. Kukonkha munthu wamene ooneka kuti oziŵako kwamukuya.

3. 3. Kukonkha malangizo odalilika monga kampasi, mapu olo muyanu wamukhulupilila kuti oziŵako kwamukuya.

Ngati mwakonkha njila yoyamba olo yaciŵili, mungayofwika kuyakine koma osati kwemwenzofuna kuluta. Ngati mungasankhe njila yacitatu, mungankhale na cidalilo cakuti mufwike kwamukuya.

Moyo wasu uli monga ni ulwendo wamene tuyembekezela kuti utifwikishe kusogolo yacimwemwe. Kaya tingafwike olo yai zudalila pa kwatutola malangizo popanga zosankha.

Zosankha ziyakine zatupanga kaya ni zitontho-zitontho olo zikulu-zikulu zingakhuze umoyo wasu. Nkhalidwe yasu yuonesha maganizo yasu pa nkhani ya cabwino na ciipa. Zosankha zasu zingatikhuze nokhuza okondeka ŵasu m’njila yabwino olo iipa. Zosankha izi zuyangizhyilapo:

• Kulalana na ukwati

• Kuona mtima, nchito na ndalama

• Molelela ŵana

• Mwatucitila zinthu na ŵanthu ayakine

Kansi mungaziŵe tyani kuti zosankha zanu pa nkhani izi zisogolele mweo na a m’banja yanu ku sogolo yacimwemwe?

Konsho yamene yuvutisha pafupifupi munthu aliyense ni yakuti: Kansi ni cinji cinganiyavye kupanga cosankha coyenela pa nkhani yokhuza cabwino na ciipa?

Magazini ino ifotokoze cifukwa cake Baibo ili na malangizo odalilika pa nkhani yokhuza cabwino na ciipa na mwaingakuyavyileni.