Nookora ki waaba nooyenda kuza omu mwanya ogu otakazamuga?

1. 1. Nootoora omuhanda ogu orikuteekateeka ngu nigwo guhikire.

2. 2. Nookuratira abandi, oriteekateeka ngu nibamanya omuhanda.

3. 3. Nookoresa ebirikwesigwa nka GPS, maapu, nari omunywani ou orikwesiga kukuhwera kumanya omuhanda.

Twatoorana eky’okubanza nari ekya kabiri, titurahikye ahu turikwenda kuza. Kwonka twatoorana ekya kashatu, nitubaasa kugira obwesigye ngu nituza kuhika ahu turikwenda kuza.

Amagara gaitu gari nk’orugyendo, kandi twine amatsiko ngu nirwija kutuhitsya omu kushemererwa. Okuhikayo kwaitu nikurugiirira ahu turikusherura obuhabuzi twaba nitwenda kucwamu.

N’obu bingi ebi turikucwamu birikutukwataho bwanyima y’obwire buraingwa, ebimwe nibiba biri bikuru munonga. Nibyoreka emitindo yaitu ey’emicwe erikukwata aha kihikire n’ekigwire. Ebirikuruga omu bi turikucwamu yaaba birungi nari bibi, nibitukwataho n’abakundwa baitu kumara obwire buraingwa. Ebi turikucwamu nibibaasa kutwariramu enshonga nk’ezi:

• Okuteerana n’obushwere

• Okuba ow’amazima, omurimo, n’esente

• Oku orikubaasa kworora abaana

• Oku orikubaasa kutwariza abandi

Noobaasa kuhamya ota ngu ebi orikucwamu omu nshonga ezo nibiija kukureetera kugira okushemererwa n’abakundwa baawe omu biro by’omumaisho?

Buri omwe aine kwebuuza ati: Niki ekiraampwere kucwamu gye aha bikwatiraine n’emicwe?

Magaziini egi neeza kushoboorora ahabw’enki noobaasa kwesiga obuhabuzi bwa Baibuli oburikukwata aha micwe, n’oku erikubaasa kukuhwera.