Ma ke men kohla wasa ehu me saikinte pak ehu ke kohla, dahme ke pahn wia?

1. 1. Keid nan ahl me ke medewe me pwung.

2. 2. Idawehn meteikan, oh koapworopworki me re ese ahlo.

3. 3. Doadoahngki mehn kaweid likilik, me duwehte GPS de map ehu, de idek rehn kompoakepahmw likilik men me ese ahlo.

Ma kitail pilada keieuo de keriauo, kitail pahn lella wasa ehu ahpw mwein kaidehn wasao me kitail men kohla ie. Ahpw ma kitail pilada kesiluhwo, kitail kak kasik me kitail pahn lella wasa me kitail men lel ieo.

Atail mour rasehng seiloak ehu—seiloak me kitail koapworopworki pahn kahluweikitaillahng mour nsenamwahu ni ahnsou kohkohdo. Ma kitail lella wasao de soh, met kin poahsoankihda wasa me kitail ale kaweid ie ni atail wiahda pilipil kan.

Pali laud en pilipil kan me kitail wiahda me tikitik, a ekei uhdahn kesempwal. Pilipil kesempwal pwukat kin kasalehda dahme kitail kamehlele duwen me pwung oh sapwung. Pilipil pwukat pahn kak mwahu de suwed ong kitail oh irail kan me kitail poakohng erein ahnsou reirei. Pilipil kan me duwehte:

• Wia nsenen pwopwoud oh pwopwoudida

• En kin mehlel, doadoahk oh mwohni

• Duwen apwalih seri kan

• Omw wiewia ong meteikan

Ia duwen omw kak ese me omw pilipil duwen mepwukat pahn kihong uhk oh omw peneinei mour nsenamwahu ni ahnsou kohkohdo?

Peidek me emenemen kitail anahne medemedewe iei: Dahme kak sewese ie I en wiahda pilipil mwahu kan duwen dahme pwung oh sapwung?

Makasihn wet pahn kawehwehda kahrepen atail kak likih dahme Paipel mahsaniheki duwen dahme pwung oh sapwung oh ia duwen eh kak seweseiuk.