Te Tika e te Tarevake: E Uianga ta Tatou ka Ui
Me inangaro koe i te teretere ki tetai ngai kare koe i tae ana i mua ana, eaa taau ka rave?
1. Aere ki te ngai taau i manako.
2. Aru i tetai ke ma te irinaki e kua kite ratou i te mataara.
3. Aru i tetai aratakianga irinakiia mei te GPS, te mapu me kore tetai oa taau i irinaki tei kite i te mataara.
Me iki tatou i te mea mua e te rua, ka tae tatou ki tetai ngai inara, kare ko te ngai ta tatou i inangaro i te aere. Me iki ra tatou i te toru, ka tae tatou ki to tatou akakoroanga.
To tatou oraanga, ka aite te reira mei tetai tere rai te tu e ka inangaro tatou kia mataora tatou. No reira, ka kimi tatou i tetai aratakianga no te rave i te au ikianga meitaki.
Te maataanga o te au ikianga ta tatou ka rave, kare e puapinga inara ko tetai pae e puapinga maata te reira. Te akaari maira teia au ikianga i to tatou manako no te tika e te tarevake. E ka akakeu teia au ikianga ia tatou e to tatou au akaperepere kia akaari i te tu meitaki me kore te kino no tetai tuatau roa. Ko teia au ikianga te ō maira te:
Pirianga ainga e te akaipoipo
Tu tika, te angaanga e te moni
Ravenga no te utuutu tamariki
Ravenga no te akono i tetai ke
Akapeea koe e kite ei e ko taau au ikianga ka rave, ka taki atu te reira ki te oraanga mataora noou e toou ngutuare?
Teia tetai uianga ta tatou ka ui: Eaa te ka tauturu iaku kia rave i te au ikianga meitaki no te tika e te tarevake?
Ka akamārama mai teia makatini i te tumu kia irinaki tatou i ta te Pipiria e tuatua ra no te tika e te tarevake, e akapeea te reira me tauturu ia koe.