Konni albaanni horo hadhe egennoottokki bayicho haˈra hasiˈrittoro maa assatto?

1. 1. Atera labbinohe doogo amadde sammi yite haˈratto?

2. 2. Wolootu doogo affinoha ikkara dandaanno yite insa harunsatto?

3. 3. Raga leellishshanno GPS (saatelayitete neetiworkenni loosanno uduunnicho), kaartu, woy doogo afinohu ammaˈnatto jaali kulannohe doogo haˈratto?

Umiha woy layinki doorsha doodhittoro mitto bayicho iillatto; kayi hasiˈrootto bayicho iilla hoogattora dandaatto. Sayikki doorsha doodhittoro kayinni haˈra hasiˈrootto bayicho iillattota woˈmunni woˈma addaxxa dandaatto.

Heeshshonke doogo haˈrate gedeeti; tenne doogo haˈnanni heeˈnoommohu albillitte hagiirru noo heeshsho heeˈrateeti. Togoo heeshsho heeˈneemmo woy heeˈneemmokki gede assannohu mitto doorsha doodhineemmo woyite harunsineemmo biddishshaati.

Doodhineemmohu rooru doorshi hakkeya qarra diafiˈrinoho; mito woyite doodhineemmo doorshi kayinni shaaˈˈa diˈˈikkino. Togoo doorshi garanna gara ikkinokki coyira noonke lao hiittootero leellishanno. Qoleno togoo doorshi ninkeno ikko banxeemmo manna seeda yanna kaaˈlara woy gawajjara dandaanno. Konni doorshi giddo mitu aane nooho:

• Siimu xaadooshshenna adhama

• Ammanama, loosonna woxe

• Ooso lossiˈnanni gara

• Wolootu ledo noonke aante

Kuri coyibba lainohunni doodhatto doorshi atinna maatekki albillitte hagiirru noo heeshsho heedhinanni gede assannohoronna teˈee afa dandaattohu hiittoonniiti?

Mittu mittunku ninkeneeto togo yine xaˈma hasiissannonke: Garanna gara ikkinokkire lainohunni dancha doorsha doodheemmo gede kaaˈlannoeri maati?

Tini metseete, Qullaawu Maxaafi garanna gara ikkinokkiri daafira kulanno amaale addaxxa dandiineemmohu mayiraatironna tini amaale kaaˈlitannonkehu hiittoonniitiro kultanno.