O le ā e te faia pe a e manaʻo e te malaga atu i se nofoaga e te leʻi oo muamua i ai?

1. 1. Agaʻi saʻo i le auala e te manatu e tatau ona e alu i ai.

2. 2. Mulimuli i isi ma faamoemoe o loo latou iloa le auala.

3. 3. Fesili atu i se uō maufaatuatuaina e iloa lelei le auala, pe faaaogā se taʻiala maufaatuatuaina e pei o se faafanua.

Pe afai e te filifilia le manatu muamua po o le lona lua, atonu o le a e taunuu ai i se nofoaga e ese mai i le mea o loo e fia alu i ai. Ae pe a e filifilia le manatu lona tolu, e mautinoa o le a e taunuu i le nofoaga tonu lea e te fia alu i ai.

E pei o tatou olaga o se faigāmalaga, lea e tatou te faamoemoe e iai se taunuuga fiafia. E faalagolago le mauaina o lenā taunuuga, i taʻiala ma fautuaga e faavae ai a tatou filifiliga.

E ui o le tele o filifiliga e tatou te faia o ni filifiliga lāiti, ae e iai foʻi filifiliga tāua e manaʻomia ona tatou faia i le olaga. E atagia atu i na filifiliga tāua la tatou vaaiga i le mea e saʻo ma le mea e sesē. O filifiliga faapena e ono umi se taimi o iai se aafiaga lelei pe lē lelei foʻi iā i tatou, ma i latou e tatou te alolofa i ai. E aofia i na filifiliga mataupu e pei o le:

• Feusuaʻiga ma faaipoipoga

• Faamaoni, galuega, ma tupe

• Auala e tausia aʻe ai fanau

• Auala e feutagaʻi ai ma isi

E faapefea ona e mautinoa o au filifiliga i nei mataupu, o le a iʻu i se taunuuga fiafia mo oe ma lou aiga?

E tāua ona fesili ifo le tagata lava ia: O le ā e mafai ona fesoasoani iā te aʻu e filifili ai le mea e saʻo ma le mea e sesē?

O le a faamatalaina i lenei lomiga, le māfuaaga e tatou te maufaatuatuaina ai le taʻitaʻiga ma fautuaga a le Tusi Paia e tusa ai o le mea e saʻo ma le mea e sesē, ma pe faapefea ona fesoasoani iā te oe.