Efu yu wani go na wan presi pe yu no go noiti ete, dan san yu ben o du?

1. 1. Yu ben o bigin waka a pasi di yu denki taki yu musu go?

2. 2. Yu ben o waka baka tra sma èn howpu taki den sabi a pasi?

3. 3. Yu ben o gebroiki wan GPS, wan karta, noso yu ben o aksi wan bun mati di sabi a pasi?

Efu wi ben o du a fosi sani noso a tweede sani, dan wi ben o doro wan presi, ma kande wi no ben o doro pe wi wani go. Ma efu wi du a derde sani, dan wi kan ferwakti taki wi o doro na a presi pe wi wani go.

A libi fu wi de leki wan pasi di wi e waka fu doro wan presi. Wi wani waka na so wan fasi taki wi kon abi wan koloku libi. Efu wi wani a libi dati, dan a de prenspari fu suku yepi na a yoisti presi fu man teki bun besroiti.

Aladi wi e teki furu pkinpkin besroiti, tòg son besroiti de prenspari srefsrefi. Den besroiti disi di wi e teki e sori san wi e si leki bun sani noso ogri sani. Den besroiti dati kan kenki wi libi èn a libi fu den lobiwan fu wi gi wan langa pisi ten. Den kan abi bun bakapisi noso takru bakapisi. Wan tu fu den prenspari besroiti disi abi fu du nanga afersi soleki:

• Seks nanga trowlibi

• Eerlijkfasi, wroko nanga moni

• Fa fu kweki pkin

• Fa wi musu libi nanga tra sma

Fa yu kan de seiker taki den besroiti di yu e teki na ini den afersi disi o meki yu nanga yu osofamiri de koloku?

Na aksi di ibriwan fu wi o abi fu luku now na: San o yepi mi fu teki bun besroiti fu san bun noso ogri?

A tijdschrift disi o sori fu san ede yu kan bribi san Bijbel e taki fu san bun noso ogri, èn fa a kan yepi yu na ini yu libi.