Nawufuna kuya endzaweni longazange sewuye kuyo, yini longayenta?

1. 1. Ungavele uhambe ngendlela locabanga kutsi itakufikisa khona yini?

2. 2. Ungalandzela labanye wetsembe kutsi bayayati indlela?

3. 3. Ungasebentisa i-GPS, i-map nobe uhambe nemngani loyatiko leyondzawo?

Nasikhetsa lokwekucala nobe lokwesibili angeke sifike lapho sifuna kuya khona. Nasikhetsa lokwesitsatfu, singaciniseka kutsi sitawufika lapho sifuna kuya khona.

Kuphila kwetfu kufana nekutsatsa luhambo lesetsemba kutsi lutasiholela elikusaseni lelihle. Kufika kwetfu lapho siya khona kutawuya ngekutsi sititsatsa kuphi teluleko letisisita sente tincumo.

Letinye tincumo lesitentako ekuphileni atikabaluleki kangako, kantsi letinye tibaluleke kakhulu. Letincumo lesitentako tiveta kutsi yini lesiyibona ikahle nalesiyibona ikabi. Ngekuhamba kwesikhatsi letincumo tingasitsintsa tsine kanye nalabo lesibatsandzako, kungaba ngendlela lekahle nobe lekabi. Letincumo tifaka ekhatsi tindzaba letinjenganati:

• Kuya ecansini kanye nemshado

• Kwetsembeka, umsebenti kanye nemali

• Indlela yekukhulisa bantfwana

• Indlela yekuphatsa labanye

Yini lengakwenta uciniseke kutsi tincumo lotitsatsako kuletindzaba tingenta wena kanye nemndeni wakho nibe nelikusasa lelihle?

Umbuto sonkhe lokufanele sitibute wona ngulotsi: Yini letangisita ngente tincumo letikahle nakutiwa endzabeni yekukhetsa emkhatsini walokuhle nalokubi?

Lomagazini utakuniketa sizatfu lesitakwenta usetsembe seluleko seliBhayibheli nakufanele ukhetse emkhatsini walokuhle nalokubi.