O ka etsang haeba o batla ho etela sebakeng seo o eso ye ho sona?

1. 1. Na o ka tsamaya ka tsela eo o nahanang hore e nepahetse?

2. 2. Na o ka latela ba bang hobane feela o nahana hore ba tseba tsela?

3. 3. Kapa na o ka sebedisa GPS, mmapa kapa o ka botsa motswalle eo o mo tshepang ya tsebang tsela?

Haeba re kgetha ho sebedisa ntlha ya pele kapa ya bobedi, re ka nna ra lahleha. Empa haeba re kgetha ho sebedisa ntlha ya boraro, re ka kgodiseha hore jwang kapa jwang re tla fihla moo re batlang ho ya teng.

Re ka tshwantsha bophelo ba rona le leeto le re isang bokamosong bo tjhabileng. E le hore re atlehe leetong lena, ho itshetlehile ka hore na ha re etsa diqeto re tshepile eng.

Le hoja diqeto tse ding tseo re di etsang di le nyenyane, tse ding tsa tsona di bohlokwa haholo. Diqeto tsena tsa bohlokwa di bontsha ka moo re ikutlwang ka teng ka se nepahetseng le se fosahetseng. Ebang re etsa diqeto tse nepahetseng kapa tse fosahetseng, di tla ama rona le batho bao re ba ratang ka nako e telele. Diqeto tsena di akarelletsa ditaba tse amanang le:

• Thobalano le lenyalo

• Botshepehi, mosebetsi le tjhelete

• Ho hodisa bana

• Ho sebedisana le batho

O ka kgodiswa keng hore diqeto tseo o di etsang di tla ba molemo bakeng sa hao le ba lelapa la hao?

Potso eo motho e mong le e mong a lokelang ho e araba ke ena: Keng e tla nthusa ho etsa diqeto tse nepahetseng?

Makasine ena e tla hlalosa hore na Bibele e ka re thusa jwang ho etsa diqeto tse nepahetseng.