Kumbi mungachita wuli asani mungakhumba kuluta kumalu nganyaki ngachilendu?

1. 1. Mungaserere ko muŵanaŵaniya kuti nkhweniko.

2. 2. Mungalondo anyinu wo muwona kuti aziŵaku ko muluta.

3. 3. Mungagwiriskiya ntchitu mapu pamwenga mungafumba munthu yo waziŵaku umampha ko muluta.

Asani tingasankha kugwiriskiya ntchitu mapu, tingachifika nadi kuchigaŵa chenicho kweni pamalu chayipu cha po tikhumba pamwenga tiluta. Kweni asani tingasankha kuti tifumbi munthu yo waziŵaku, tigomezga kuti tamufika nadi ko tikhumba.

Umoyu tingawuyeruzgiya ndi ulendu, wo tigomezga kuti utitilutiska ku umoyu wakukondweska. Ulongozgi wo titende pakusankha vakuchita ndiwu ungatiwovya kuti tikafiki ko tiluta pamwenga cha.

Vakusankha vinyaki vo tisankha vija vimanavimana kweni vinyaki vija vikuluvikulu. Vakusankha vikuluvikulu venivi vilongo fundu zo tigomezga pakusankha cho ntchamampha ndi chiheni. Ndipu venivi vingakwaska isi pamwenga ŵanthu wo titiŵayanja kwa nyengu yitali, munthowa yamampha pamwenga yiheni. Vakusankha venivi visazgapu nkhani nge:

• Kugonana kweniso nthengwa

• Kuchita vinthu mwauneneska, ntchitu ndipuso ndalama

• Mo tingalere ŵana

• Mo tingachitiya vinthu ndi anyidu

Kumbi mungaziŵa wuli kuti vo mwasankha vingakuwovyani kweniso kuwovya banja linu kuti muje ndi umoyu wakukondwesa?

Fumbu lo weyosi wangajifumba ndakuti: Kumbi ntchinthu wuli cho chingandiwovya kuti ndisankhengi umampha pankhani ya cho ntchamampha ndi chiheni?

Magazini iyi yikonkhoskengi chifukwa cho tigomezge vo Bayibulu likamba pankhani ya chamampha ndi chiheni kweniso mo lingakuwovyiyani.