Kuti naa muyanda kuunka kubusena bumwi nkomutanasikide, ncinzi ncomweelede kucita?

1. 1. Kutozya nzila njomuyeeyela.

2. 2. Kutobela baabo mbomuli limwi, mbomuyeeyela kuti baliizyi nzila.

3. 3. Kubelesya maapu naa kubuzya mulongwe ngomusyoma iwiizyi nzila.

Ikuti naa twabelesya nzila yakusaanguna naa yabili, inga tiitwasika kubusena nkotuyanda kuunka. Pele kuti naa twasala kubelesya nzila yatatu, tulakonzya kuba alusyomo lwakuti tuyoosika kubusena nkotuunka.

Buumi bwesu buli mbuli lweendo ilukonzya kutusololela kubuumi bukkomanisya. Aboobo, icipa kuti tusike naa kutasika ooko nkotuunka, mbusolozi mbotulomba katutanapanga cakusala.

Nokuba kuti zyakusala zimwi nzyotupanga inga kazili zisyoonto, zimbi zilayandika kapati. Zyakusala eezyi zitondezya mbotucibona ciluzi acitaluzi. Zilatujatikizya kapati swebo alimwi abayandwa besu kwaciindi cili mbocibede. Zyakusala eezyi zibikkilizya makani mbuli:

• Koonana alimwi acikwati

• Kusyomeka, mulimo alimwi amali

• Mbotukonzya kukomezya bana

• Mbotweendelezya bamwi

Mbuti mbomukonzya kuzyiba kuti zyakusala nzyomupanga mumbazu eezyi ziyoopa kuti nywebo amukwasyi wanu mukajane lukkomano?

Mubuzyo umwi aumwi wesu ngwayelede kulibuzya ngwakuti: Ncinzi cikonzya kundigwasya kwiindanya ciluzi acitaluzi ciindi nondipanga zyakusala?

Magazini eeyi ilapandulula ncomweelede kuzisyoma zintu nzyolyaamba Bbaibbele kujatikizya ciluzi acitaluzi alimwi ambolikonzya kumugwasya.