Niinzi nzukonzya kuchita kuti kuyanda kuswaya bumwi busena mbutazi?

1. 1. Ulatobelezya nzila njuyeeya kuti njiyo na?

2. 2. Ulatobela bamwi na kuyeeya kuti baliizi nzila?

3. 3. Ulabelesya mepu na naakuti kubuzya mweenzinyokwe ngusyoma uyizi nzila?

Kuti twasala kaambo 1 a2 tulakonzya kusika kuliimwi ndawu pesi kutali kundawu njitwali kuyanda kwiinka pe. Kuti twasala kaambo kachitatu, zilaantanganana kuti tulakonzya kuyoosika nkutuyanda kuya.

Toonse tulangilila kupona buumi lino munzila itazoope kuti tukabotelwe muchiindi chilikunembo. Malayilile ngitubelesya chiindi nituyanda kusala zyakuchita ngawo aatugwasya kuti tukonzye kusala kabotu naakuti tutasali kabotu.

Zimwi zintu nzitusala nziniini alubo zimwi ziyandikana loko mubuumi bwesu. Zintu nzitusala zitondeezya maboneno ngitulaawo atala achibotu achibi. Zintu eezi zilaachakuchita andiswe abantu mbituyanda alubo zilakonzya kutugwasya naakuti kutupambanisya kwachiindi chilamfu. Zintu eezi ziswaanizya makani aali mbuli:

• Koonana alukwatano

• Kusyomeka, mulimu amali

• Mbutweelede kukomezya bana

• Mbutweelede kujata bamwi

Niinzi chikonzya kukugwasya kuti ube aachoonzyo chakuti zintu nzusala mumakani aaya zilakonzya kukugwasya kuti uzoobe aalyajuunza lilikabotu kuswaanizya abamumpuli yako?

Umwi awumwi wesu weelede kulibuzya kuti: Niinzi chikonzya kundigwasya kuti ndisale kabotu mumakani aali atala achibotu achibi?

Magazini eeyi, ilapandulula kuti nkamboonzi nweelede kusyoma nzilyaamba Bbayibbili atala achibotu achibi akuti kujana lyakugwasya biyeni?