Lekbʼi ja weʼn waxa kʼana oj wajan bʼa jun lugar bʼa mito wajela, ¿jas oja kʼuluk?

1. 1. Oj maʼ akʼuluk ja jas wa xyala jawa pensari sok oja noch ja jas toj xa wila.

2. 2. Oj maʼ anoch ja tuk spensarajel ke wa snaʼawe sbʼaja bʼeji.

3. 3. Oj maʼ aleʼ bʼa jun GPS ma bʼa jun mapa ma oja jobʼyi jun lekila wamigo bʼa wa snaʼa sbʼaj ja bʼeji.

Ta ja atsaʼa june ja bʼa chabʼe bʼajtani, ojni kʼotan bʼa jun lugar, pe bʼobʼta mini ti oj yiʼa ja bʼa waxa kʼana. Pe ta atsaʼa ja bʼa yoxili, wani xbʼobʼ ajyan lek seguro ke oj kʼotan ja bʼa waxa kʼana.

Ja jsakʼaniltiki jach jastal jun biaje, jpetsaniltik wa xkʼana oj tatik jun bʼej bʼa oj yiʼotik ja bʼa wa xkʼana oj kʼotkotiki: bʼa ajyel gusto. Yuja ti chʼikan ja jas wa stsaʼatik skʼulajel bʼa oj kʼotkotik, jelni tʼilan oj ajyukujtik jun tojelal bʼa wa xbʼobʼ jip lek jkʼujoltik.

Ama tʼusan mi spetsaniluk ja jas wa stsaʼatiki mini jel xjomwani, pe jujuntik wani xbʼobʼ stukbʼes ja jsakʼaniltiki. Tini wa xkʼot jchiktestik, ja jas lek wa xkilatiki sok ja jas miyuki. Sok ja jas wa stsaʼatiki tini wa xchiknaji ta lek ma mi lekuk ja bʼa jsakʼaniltiki sok ja bʼa jpamilyatiki. Jitsan tini chʼikan soka jastik it:

• Ja stajel sbʼaj jun ixuk sok winik sok ja nupanel.

• Ja mi slejel abʼal, ja aʼtel sok ja takʼin.

• Ja yajel kʼiʼuk ja untik.

• Ja jastal wa xkila jbʼajtik soka tuk.

¿Jastal oj bʼobʼa naʼ ke ja jastik oja tsaʼ skʼulajel ja bʼa jastik jaw oj skoltaya ja weʼn sok jawa pamilya bʼa oj ajyanik gusto?

Chomajkil, tʼilani oj jobʼ jbʼajtik: «¿Jasa oj bʼobʼ skoltayon bʼa oj tsaʼ ja bʼa jas leki?».

Ja bʼa rebista it oja nebʼ jas yuj wa xbʼobʼa jipa kʼujol bʼa Biblia bʼa oja naʼ ja bʼa jas toji sok jastal oj bʼobʼ skoltaya.