I yini lexi u nga xi endlaka loko u lava ku ya endhawini leyi u nga yi tiviki?

1. 1. U ta famba hi ndlela leyi u ehleketaka leswaku yi ta ku fikisa laha u yaka kona.

2. 2. U ta landzela van’wana, u tshemba leswaku va yi tiva ndlela.

3. 3. U ta tirhisa nkongomiso lowu u wu tshembaka wo tanihi GPS, mepe kumbe u vutisa munghana loyi a tivaka ndlela.

Loko ho hlawula xiringanyeto xo sungula kumbe xa vumbirhi, hi nga kota ku fika eka ndhawu yo karhi kambe ku nga ri kona laha hi lavaka ku ya kona. Loko ho hlawula xiringanyeto xa vunharhu, hi nga tiyiseka leswaku hi ta fika laha hi yaka kona.

Vutomi bya hina byi fana ni riendzo leri nga endlaka leswaku hi tsaka. Leswaku hi fika laha hi yaka kona swi titshege hileswaku hi tirhisa nkongomiso wihi loko hi endla swiboho.

Swiboho swin’wana leswi hi swi tekaka a hi swa nkoka ngopfu evuton’wini bya hina, kasi swin’wana i swa nkoka. Swi kombisa leswaku hi swihi leswi hi swi tekaka swi ri swinene kumbe swi ri swo biha. Swiboho swo tano swi ta khumba hina ni lava hi va rhandzaka nkarhi wo leha, ku nga ha va hi ndlela leyinene kumbe yo biha. Swiboho sweswo swi katsa timhaka to tanihi:

• Timhaka ta masangu ni vukati

• Ku tshembeka, ntirho ni mali

• Ndlela yo kurisa vana

• Ndlela leyi hi khomaka van’wana hayona

U nga tiyiseka njhani leswaku swiboho swa wena swi nga tisela wena ni ndyangu wa wena ntsako enkarhini lowutaka?

Hinkwerhu ha tivutisa leswaku: I yini leswi nga ta hi pfuna hi endla swiboho leswinene swa mahanyelo?

Magazini lowu wu ta hlamusela swivangelo leswi endlaka hi tshemba leswi Bibele yi swi vulaka hi leswinene ni leswi hoxeke ni ndlela leyi yi nga hi pfunaka hayona.