Wọ da guọnọ kpo asan wo ji te dẹvo-o, die wo che ru?

1. 1. Kpo ẹbẹre wo rorori nẹ ọyen asan na.

2. 2. Nene ihwo efa vẹ ẹwẹn nẹ ayen riẹn asan na.

3. 3. Reyọ GPS yẹrẹ imapu vwo ruiruo, yẹrẹ nene ugbeyan wọ vwẹroso rọ nabọ riẹn idjerhe na.

E de nene iroroẹjẹ rẹsosuọ yẹrẹ ọrivẹ na, e che te asan, ẹkẹvuọvo, ọ diẹ asan avwanre guọnọ ra-a. E de rhe nene iroroẹjẹ rẹ erha na, e se vwo imuẹro nẹ e che te asan a ra.

Akpeyeren rẹ avwanre pha kerẹ oyan re vwo nẹ asan kpo asan, ọnana oyan ra guọnọre nẹ o sun vwo kpo akpọ rẹ omavwerhovwẹn vwẹ obaro na. Asan rẹ a ra da guọnọ odjekẹ ọke re de che brorhiẹn, yen che djephia sẹ avwanre che te asan a ra yẹrẹ e che te-e.

Dede nẹ erhiẹn evo rẹ avwanre brẹ che djobọte akpeyeren avwanre ọmọke, jẹ buebun rayen pha ghanghanre. Erhiẹn eghanghanre nana djephia sẹ oborẹ avwanre vwo imuẹro kpahen yovwirin yẹrẹ chọre. Erhiẹn nana che djobọte avwanre vẹ ihwo rẹ avwanre vwo ẹguọnọ kpahen ọke grongron, te ọ dia ọ rẹ erhuvwu yẹrẹ umiovwo. Erhiẹn nana churobọ si eta kerẹ:

• Ehware vẹ orọnvwe

• Igho, owian, vẹ a vwọ ta uyota

• Obo ra yọnrọn emọ ghwanra wan

• Obo ra vẹ ihwo efa yerẹn wan

Mavọ yen wọ sa vwọ riẹn se orhiẹn wẹn cha nẹrhẹ owẹ vẹ orua wẹn yeren akpọ rẹ omavwerhovwẹn vwẹ obaro na?

Onọ rẹ avwanre ohwo ọvuọvo cha nọ kọna: Die yen sa vwẹ ukẹcha kẹ vwẹ vwo brorhiẹn rẹ obo ri yoma vẹ obo re chọre?

Imagazini nana che dje oboresorọ avwanre sa vwọ vwẹroso oborẹ Baibol na ta kpahen obo ri yoma vẹ obo re chọre, kugbe obo rọ sa vwọ cha wẹ uko.